Read Kahua ISAIA 1 Bible Online

ISAIA 1 - Kahua bible

ISAIA 1

¹Igê na buka ikê ka oga igê na maruteha iana o Isaia, karena o Amose, renirerua i Juta ma i Jerusaleme, matena ga heheuri igê o Usia, mo Jotama mo Agasi mo Hesekia, ka marungia i Juta.

²Vavearo ma na ano, mu rongo! Mu karinga maninga, suria na Araha ki tamasi, ki vi: “Na kare, gê bani marupera, manga vi inê na vaemata, ka guguruga bâraha tangê.

³Na puruka ki girara na avanuna. Na tonki ki girara na tavani ngêra iana. Ma na Isiraelita ka pe girarê. Na kariaku ka bonobonoga ngavê.”

⁴Isiraelita, ki page era ngavê tangagamu! Igamu kamu ama ni tasitasi nga. Igamu kamu erataga ma kamu aharê. Na tasi ka higegamu ngavê. Igamu kamu bani murisigea na Araha. Igamu kamu bani usitenia na God iami.

⁵Renia ta mu ama ni guguruga nga? Mu obania kê nikâ vari na hagaitangiha? Na bêmi ka bani mamanu noga. Na bunaniami ka maeha. Na aitangihami ka pe ramo.

⁶Haganega i bêmi tari i ugami ki pe apekoro rârâ tagua. Na apemi hagenani ki mamanu, ki babasu ma ki mamari. Na babasumi ka nanaga, ka pe baraigi, ma ka pe purigi renigi na meresini.

⁷Ga bani erasia ngavê na apanena iami, ma ka bani hagasuhigi na hinua iami. Mu bâsira râ na mahuara, ga parênia na mako iami, ma ka erasigi na ara ni marâ hato, ka magahuru manga i Sotomo.

⁸Nga noga ma i Jerusaleme ki hita so, ma na merongata ka taharia. Ngaia ki manga na ruhu igê na pariki ni vaini, se manga na mamaruku igê na mu ni meloni.

⁹Manga na Araha raramohaga hunia, ma ke pe katora tani na enoni ke tahi, vikê i Jerusaleme ke bani aruhu ngavê, mangarerua i Sotomo me Gomora.

¹⁰Igamu na maneraha ma na ai ni Jerusaleme, igamu kamu maratorata na ai ni Sotomo me Gomora. Mu rongogi na tamasinga iana na Araha iami. Mu karingagi na hagesuringa iana God iami.

¹¹Ngaia ki vi: “Mu takusia vari, vi inê kê obanigi na ara ni vogasiha hato iami, mu ama ni nga vogasiê renigi? Igamu kamu susu tangê renigi na sipi mane ma na êbena na puruka binibinikaga. Inê kê mâmâaga renigi! I mâmâaga na obaku renigi na gaputa na puruka mane ma na sipi ma na goti.

¹²Ti ki vi tangagamu, kamu vogasiê renigi, matena mu ahi me kamu rahesiê? Ti ki bonasigamu, kamu râ me, kamu arârâ purua ma igê na mahera na Ruma ni Rotu?

¹³Siana kamu rahesiê renigi na vogasiha purua ma. Inê kê usitenigi ngavê na siginihani na marâ, mu sungigi. Igamu kamu hagarahasigi na Hageha Haoru ma na Tangiani ni Mamaroha, ma kamu hakuhaku me, kamu rahesiê. Ma na tarani ngegana inê kê kitenigi ngavê, suria ga era renigi na bagatarihami.

¹⁴Inê kê kitenigamu, matena mu hagahigasigi na Hageha Haoru ma na tangiani raha ni rotu ngegana. Igamu kamu higeê, ma ki usi na apeku renigamu.

¹⁵Matena mu nunginungi ma kamu avarasiê, inê kê bunigi na karingaku. Naka ma hagehita mu avarasiê igê, i asa hagetage be rongogamu, suria ga gagapuga ma ka purupuruaga na rimami.

¹⁶Mu mamanu, kamu matarotaro. Siana kamu katogi nikâ i maaku na bagatarihami. Mu kasigi vê nga na eraha!

¹⁷Ma kamu haganega kamu paronga koro ma ototo. Mu katogi na tarani, ga ototo. Mu rêra pusira na enoni, ga hagamamasiagara na enoni getera. Mu roherohe pusira na kare banogo ma na gete na nâ.”

¹⁸Na Araha ki vi: “Hoi, ge hagaotogi na marâ. Naka ma igamu kamu makoraga ngavê renigi na tasi, ga manga na mako memera, igamu kamu page matarotaro ngavê. Naka ma igamu kamu makoraga renigi na tasi, ga manga na mako rotorotoaga memera, igamu kamu page manga na gahu, i siki ahuru ngavê.

¹⁹Manga mu agana ma kamu têtê viteaku, ki page aharêsigamu na ngauha koro.

²⁰Ma ki manga mu ama ni guguruga ma tangê, mu page meme igê na hearihatana. Ngaia kani gê visia, inê na Araha.”

²¹Evaê, na hinua i Jerusaleme, i bani toto suriê i nago, i ngekê ki toto surira na ataro. Ngaia ki manga na êrâ. I nago ngaira i ngekana ka koro ma ka oto, ma i ngekê ngaira ka nahunahu enoni ma.

²²I nago igamu na ani ni Jerusaleme, kamu matarotaro manga na siliva, ma i ngekê igamu kamu mangagi na marâ, ga hegahegaraga. I nago igamu kamu manga na vaini koro, ma i ngekê igamu kamu manga na ve purua ma.

²³Na maneraha iami ka oga sutaga, ma ka hakunira na mane hanago. Ngaira ka vanasigi tare na haga ma na vatevate. Ngaira ki asa, vige roherohe pusira na kare banogo, ma ka usi, vige karinga na kotiha renira na gete na nâ.

²⁴Tahema na Araha God raramohaga hunia, na Isiraelita ka rahesia, ki vi: “Inê be naka na siva tangagamu. Inê be mangariaga tangagamu, na merongaku.

²⁵Inê be hagaitangigamu. Inê be hagamatarotarogamu manga na mane, i hagamatarotarogi na aiani renia na gi, ma be tananigamu tenigi na makoraha hato iami.

²⁶Na maneraha iami igê na kotiha ngaira ka page koro aporo mangara na ani i nago. Na enoni, ga hagaotogamu, ki hato, vige page hagabekasigamu nikâ. Ma ka page hêtana nikâ Jerusaleme, vi na Hinua ni Otoha ma ni Totosuriha.”

²⁷Na otoha ki na tahingana Jerusaleme. Na koroha ma na otoha ka na tahingata na enoni hato, ga urisi parongata maninga.

²⁸Ma na Araha ki page mutera ngavê na enoni hato, ga guguruga tanga. Ngaia ki page nahuira ka meme na enoni hato, ga murisigea.

²⁹Igamu kamu maki, suria mu vogasi igê na apinige, i apuna, ma kamu rahesira na ataro tangagi na mu iami.

³⁰Igamu kamu manga na apinige, i maria, se manga na mu berataga.

³¹Na enoni raha ka mangagi na go maria, ma na bagatarihata ka mangagi na aegani na gi. Na gi ki page ngaura henigi na bagaparongata, ma ki bara ngavê, vige hunia na gi ngekana.