Read Kahua ISAIA 10 Bible Online

ISAIA 10 - Kahua bible

ISAIA 10

¹I page era ngavê tangagamu na enoni, mu hagamamasiaga apeta na kariaku renigi na ramata, ga pe oto.

²Suria mu kato vikana, tahema mu pe surira oto na enoni, i bara tangara, ma kamu hanagogi tenira na enoni matareha na marâ, ga oto tangara, viga nahunigi. Suria mu kato vikana, tahema mu hanagogi na nahuninga iata na gete, ga nâ, ma na kare banogo.

³Mu katokato mara ta, matena God ki hagaitangigamu igê? Mu katokato mara ta, matena ga tarahugamu igê na bagabevoani, manga na roga raha, i arâ me hagatê? Ti kamu page togâna? I he kamu page pinihigi igê na ruruguha iami?

⁴Mu page meme igê na henahuita, se ga page henahuraugamu. Henaka, ma na mangariganiha iana na Araha ki asa, vige page hato. Na rimana ki nanê mênga, hanana i hagaitangigamu.

⁵Na Araha ki vi: “Hoi, Asiria! Asiria ki manga na bêata iaku, hanana gê hagaitangira re na ani, gê mangariaga tangara.

⁶Inê kê hagatorangenira na ai ni Asiria, ka taharira na enoni, ga pe botage reniê, ma ka hagamangariê ngavê. Inê kê hagatorangenira, ka rurugu ma ka hanago, ma ka purira so na enoni, mangagi na mako i tara.”

⁷Ma na maneraha teha i Asiria ki kato so marena, ki varoa na hearihatana. Ngaia ki togeaga, ki hagaerasira ngavê igê na agua rako getigi.

⁸Ngaia ki tamasi paroparo, ki vi: “Na mane, ga bêngenira na mane ni me iaku, ka hega, ga pe maneraha vari?

⁹Inê nga kê teharigi na hinua i Kalano, i Kagemisi, i Hamata me Arapata, i Samaria me Tamasiko.

¹⁰Inê nga kê teharigi na hinua ma na agua, ga hagarapera igê na ataro, ga rako teharira na ani i Jerusaleme me Samaria.

¹¹Inê nga kê teharira Samaria ma na ataro hato igê. I hega, i bara vari, vi ve kato vikana nikâ tangara Jerusaleme ma na ataro i ngekana?”

¹²Ma na Araha ki vi: “I murina gê hatungigi igê na katoha iaku renia Jerusaleme i hungana i Sione, inê kê page hagaitangia na maneraha teha i Asiria, suria ngaia ki tamasi paroparo ma ki hagarahasia marena.”

¹³Na maneraha i Asiria ki tamasi paroparo, ki vi: “Inê mareku nga kê katogi na marâ hato ngegana. Inê kê ramo, ki mave na bêku, ma kê tako mataha. Inê nga kê hatungigi na taritarihani na agua. Inê nga kê rurugugi na nahuninga iata. Inê kê purira so na enoni raha i ngegana manga na puruka mane i purira.

¹⁴Na enoni hato i maveta ka manga na robona na manu, ma na ruruguha iata ka mangagi na oruna. Inê kê rurugugi na nahuninga, manga gê rurugugi na oruna na manu. I bara tangara, vige hagamagusiê, se vige ngiriê.”

¹⁵Ma na Araha ki vi: I hega, na akesi ki teharia vari na mane, i tapitapi renia? I hega, na soa ki teharia vari na mane i soasoa renia? Na bêata ki pe tagarenia akê na mane. Na mane hete ki tagarenia akê na bêata.”

¹⁶Tahema na Araha raramohaga hunia ki page hagatorangenia na ringa, hanana i hagaitangira na me bigabigaraga ngegana. Ngaira ka page avasugusugu, ma na raramohata ma na bâkorohata ka page aru makaka.

¹⁷God, i apuna teha ngavê ma ki mavesigi na obata na Isiraelita, ngaia ki page manga na gi, manga na vavatana na gi, i page ngaugi na ara ni marâ hato, na rauga era ma na tone nikâ, i rarona ma na tangiana gi tage togo.

¹⁸Ngaia ki page ngaugi na vapuni koro ma na mu, manga na ringa, i hagamesira na enoni.

¹⁹Tani ma na apinige ka page hitahita so. I pe bara tanga na kere kare, vige tomanigi.

²⁰I na matena ngekana na Isiraelita, na ani ga tahi ma ka hita so, ngaira ki hato, vige page oga hagêgurira igê na ai ni Asiria, ga hagaerasira ngavê. Ngaira ka page hagêguri togo maninga hete renia na Araha, na God iata na Isiraelita, i apuna teha ngavê.

²¹Tani ma na Isiraelita ka page aharia God raramohaga hunia iata.

²²Henaka i ngekê na ai ni Isiraele ka rako teha ngavê mangagi na one i one, tani ma ka page aporo me i pasita. Na hagaitangiha raha teha ki nananêra na enoni, ma ki ararira.

²³Hoi, suria na agua hagenani na Araha God raramohaga hunia ki page hagaitangira ngavê, manga i bani vi.

²⁴Na Araha raramohaga hunia ki vi tangara na kariana, ga oga i Sione, ki vi: “Naka ma na ai ni Asiria ka hagamamasiaga apemi, mangara na ai ni Esipito i nago, siana kamu magutenira.

²⁵I sugia ma ge hato, vi ve hagaitangigamu igamu, ma hemuri kê page hagaerasira ngavê ngaira hete.

²⁶Inê nga, na Araha raramohaga huniê, kê page ramusira, manga gê bani ramusira noga na ai ni Mitiani i Hê ni Orebe. Inê be hagaitangia i Asiria, manga gê bani hagaitangia noga i Esipito.

²⁷Igê na matena ngekana inê kê hagatahigamu igê tenia na raramohata na ai ni Asiria, hanana i page hato, vige page hagahigegamu nikâ.”

²⁸Na me ni Asiria ka râ me tenia i Rimone. Ngaira ka bani rêa na hinua i Aiati, ma ka bani ri i Migironi. Ngaira ka naka na toraha iata i Migimasi.

²⁹Ngaira ka bani aharê igê na hungana, ma ka mêru i Geba. Na ai ni Rama ka bubununuga, ma na ai ni Gibea, i pasina na maneraha o Saulo, ka bani gava.

³⁰Ai ni Galimi, mu ngere! Ai ni Laisa, mu karinga! Ai ni Anatote, mu arami!

³¹Na ai ni Matemena me Gebimi ka migitanu manavata ma ka gava.

³²Na meronga ka tariha me noga i Nobo, ma ka hagaramo tanga na hungana i Sione, tanga na hinua raha i Jerusaleme.

³³Na Araha raramohaga hunia ki page uvera, ka mangagi na arani na apinige, ga maguhu i ano. Ngaia ki page hagamakira ngavê na ani, ga raha teha ma ka paroparo ngavê.

³⁴Na Araha ki page tapira so mangagi na apinige, ga tapigi so i gupu na toro renia na akesi, nakagi ma na apinige koro ngavê i Libanone.