Read Kahua ISAIA 13 Bible Online

ISAIA 13 - Kahua bible

ISAIA 13

¹God ki hagamarutea o Isaia, karena o Amose, renia na hagaitangiha tanga i Babilone.

²Na Araha ki vi: “Igê na harena na hungana hagarari igê tanga na hearihatana. Hagaramonira na mane ni me. Tagere rima, na girarana, vi ngaira ka taharigi na mani para i Babilone.

³Inê nga na Araha kê bêngenira na mane ni me iaku igê na hearihatana. Ngaira ka ageage ma ka ramoramo. Inê kê bonasira, ka hagaitangira na enoni, gê mangariaga tangara.”

⁴Rongo! Na ngerengereha igê na hungani. Rako teha vê na enoni. Na mane ni me. Rongo! Na heakuruhinga! Na maneraha i maveta ka haku me henira na mane ni me iata. Na Araha raramohaga hunia ki hagarêra na mane ni me iana, ka ura harahara.

⁵Ngaira ka râ me tenigi na agua hagatê, tenigi na akereni na maveta. Igê na mangariganiha iana na Araha ki hakura me, hanana i hagaerasia ngavê na agua hagenani.

⁶Gegege! I hagarangi me noga na tangiana ni hagaitangiha, i page arâ me igê na Araha raramohaga hunia.

⁷Vikê na enoni hato ka page rumakaka, ma ka page bagahagêguri ma ka page anumanuma.

⁸Ngaira hato ka page bubununuga. Ngaira ka page gasuga ni haharaniha, manga na gete i riki na gerina. Ngaira ka page heborete, suria ga magu ma ka tatata ma ka page ape ni makiha.

⁹Bâ, na tangiana iana na Araha ki râ me noga. Na tangiana ni mamasiganiha, i page rakaraka igê na mangariaganiha iana. Na agua ki page voravora re na bagamanihê raha. Ngaia ki page hagamagahurura ngavê na enoni era.

¹⁰Na higu ma na higu angapopo ki hato, vige mave. Na arito ki page roto, naka i raboa me. Ma na hageha ki page roto nogana.

¹¹Na Araha ki vi: “Inê be migirâ na hagaitangiha tanga na maveta, tangara na enoni era meni na tasi iata. Inê be hagamakira na enoni paroparo ma be hagavotarira na ani, ga hagarahasira mareta ma ka hagamamasiagara na enoni getera.

¹²Na enoni ki asa, vige page rako, manga na golo matarotaro i bara, vige tarahua rako; ki asa vige page rako, manga na golo ni Ofiri.

¹³Igê na tangiana ngekana inê, na Araha raramohaga huniê, inê kê page ngingigi igê na marâ i vavearo ma na maveta ki page gisigisi ma ki page guruguru tenia na atohana.

¹⁴Na ai mahuara, ga oga i Babilone, ka page gava vê tanga i pasita, mangara na goti, ga gavatenira na mane, ga hagavasi, se mangara na sipi i mareha na avanuta.

¹⁵Na me ka ahura tarasira ka meme na enoni, ga taura.

¹⁶Hagenago ngaira ka bâsira na me, ga rahutenira na kare gari iata i maata ma ka rurugugi na ruma iata ma ka tugurira na gete iata, ka tanu era henira.”

¹⁷Na Araha ki vi: “Inê kê hagaramonira na ai ni Metia, hanana ga taharia i Babilone. Ngaira ka pe tenigi na siliva ma ka pe vanasigi na golo.

¹⁸Ngaira ka page hanasira ka meme na mane haoru. Ngaira ka page nahuira nikâ na kare gari ma na kere kare.

¹⁹I Babilone ki bâkoro teharigi na hinua hato. Na ai ni Babilone ka agegagesia ngavê. Ma inê nga na Araha be hagamakaka i Babilone, mangarerua i Sotome me Gomora.

²⁰Babilone ki page hihiruga tare, ki bê ki arâ. Na ai ni Arabia ki asa, vige page taunga i ngekana. Ma na avanu ni sipi ki asa nikâ, vige page hagamamarora na totoha ni sipi iana i ngekana.

²¹Nga noga ma na marâ vasiga i bemu ka page oga i ngekana. Ma na ko makukuni ka page beabea igê. Na auvê ma ka page sikosiko igê. Ma na goti vasiga ka page hahane igê na ruma, ga aruhuruhu.

²²Na ringeta na o vasiga ma na marâ vigana ka page tagitagi igê na bebetehe ma na ruma raha. I ata me noga na matena tanga i Babilone, i hatohato igê!”