Read Kahua ISAIA 14 Bible Online

ISAIA 14 - Kahua bible

ISAIA 14

¹Na Araha ki page takuira aporo na kariana na Isiraelita, ma ki page atera aporo, ka voravora na anina. Ngaia ki page haganahunira aporo renia na apanena iata, ma na ai mahuara ka page arâ me, ka gâga henira.

²Na enoni tenigi na agua getegi ka page tamanira na Isiraelita, hanana ga aporo tanga i pasita. Ma na mane ma na gete tenigi na agua ngegana ka page vora re na kare vurivuri iata na Isiraelita. Na ani, ga bani henahuraura na Isiraelita, na Isiraelita ka page henahuraura nogata, ma na ai ni Isiraele ka page marungira na ani, ga bani hagamamasiagara.

³Na Araha ki page hagamamarora na Isiraelita tenigi na bagabevoani, ma na mamasiaganiha, ma na tagaraha na hagatotongoha.

⁴Igê na matena ngekana ngaira ka page varovarotora renia na maneraha i Babilone, ka vivi: “Na maneraha, i era, ki bani vota! I asa nikâ, vige hagamamasiagara na enoni.

⁵Na Araha ki bani hatungia na ramoha tenia ngaia ma tenira na tamana erataga.

⁶Ngaira ka mangariaga tangara na enoni getera, ma ka hagamamasiaga apeta, ma ka ama ni merongasira nga.

⁷E, ngaia ngekana! Na maveta hagenani ki vagevagesigi na mamaroha ma na marapeha, ma na enoni hato ka kiki vagevage.

⁸Na apinige sisite ka vagevage ma na ani raha i Libanone ka vagevage nogata, renia go vota, na maneraha. Ma ki hato ngavê, vigu page tapigi so.

⁹“Na agua iata na enoni ga me ki nanê, ki unigo banu na maneraha ni Babilone. Na râha iamu ki hagaritera na atarota na ani ga maneraha i maveta. Na atarota na maneraha ka aharaga tenigi na atohata, hanana ga arâ vurusigo.

¹⁰Ngaira ka tamasi haku, ka vivi, ‘I ngekê igia ka tagenaka ma. I hato nogana na raramohamu. Go manga igami!

¹¹I hato, vigo vagevagesigi nikâ na ringeni na gita. Na bâbâhamu raha ki bani magahuru. Na ta visia? Na agua iata na enoni ga me ko oga igê, vego! Na bea iamu ma na aruhamu karu mamaga ngavê.’

¹²“Maneraha i Babilone, higu ni tangi, go bani vota tenia na vavearo! Igo ko teharira na agua getegi ma i ngekê igo ko tâ i ano.

¹³Go takusia vari, vigo raha teharia na vavearo? Go takusia vari, vi na âgâga iamu ki teharigi na higu kerekê ngavê? Go takusia vari, vigo maneraha tangara na ataro igê na hungana iata?

¹⁴Go takusia vari, vigo akê teharigi na vaha, ma ko bâbâ hahaneaga manga God raramohaga hunia?

¹⁵Ma hete, go vota so igê na rutuni, igê na agua iata na enoni, ga me.

¹⁶“Na ani ga me ka page boretenigo ma ka page hagaru renigo, ka vivi, ‘E, ngaia ka no vani i hagamagusia na maveta ma ki haganunura na maneraha?

¹⁷Ngaia nge hagasuhigi na hinua raha ma ki hagaerasia ngavê na maveta, ki vora na bagamanihê raha? Ngaia nge usi, vige rupasira na enoni, i henahuraura, se vige nakara ke aporo i pasita?’

¹⁸“Na ara ni maneraha i maveta ka tâ igê na matiku bâkoro ngavê,

¹⁹ma igo, ki marehasigo na matiku. Na gahuamu ka kasia hagatê tenia na matiku iamu, hanana go kakaga, manga vi igo na roro. Na gahuamu ka kasia so ma igê na kokoro henira na gahuata na mane ni me, ga me igê na henahuita. Ma ka purigamu vato.

²⁰Suria go erasia ngavê na apanena iamu ma ko nahuira ka me na kariamu maremu, tahema ka pe bagigo, manga hanana i marisina ga bagira na maneraha. Na karemu erataga ka page mutemute.

²¹Ga page nahuira ka meme na karemu renigi na bagatarihamu na vaemata. I asa nikâ na hitangita, vi page marungia na maveta, se vige kahu hagavunusia renigi na hinua. Naka ke nahuira!”

²²Na Araha God raramohaga hunia ki vi: “Inê be taharia i Babilone ma be ruhuruhua. Inê be hagahirungia. I asa, vige page hita so na kare se vi na ta.

²³Inê be katoa i Babilone ke sugusuguraga. Na ko makukuni ma ke ogasia. Inê be sinoa ngavê i Babilone. Ngaia kani gê visia, inê na Araha raramohaga huniê.”

²⁴Na Araha raramohaga hunia ki tohe, ki vi: “Na katoha iaku ki page mora. Na takotako iaku ki asa, vige page magahuru.

²⁵Inê be hagamutera na ai ni Asiria, ga oga igê na apanena iaku i Isiraele, ma be purira so igê na hungani iaku. Inê be hagatahira na kariaku tenira na ai ni Asiria, ga hagamamasiagara ma ka hagahigera.

²⁶Ikê nga na katoha iaku, ma na rimaku ki nanê, hanana vi hagaitangira na enoni i maveta, ga pe rahesiê.”

²⁷Na Araha raramohaga hunia ki togeaga, hanana i katoa na tarana ngekê. Na rimana ki nanê, hanana vi hagaitangira, ma ki bara o ti, vige page urapusia.

²⁸Igê na harisi, i me igê na maneraha o Agasi, na Araha ki tamasi vikê:

²⁹“Ai ni Pilisitia, na mata, i ramusigamu, ki baro Ma siana kamu vagevage renia. Manga na ma, ma ki me, na ani, i era ngavê, na ma ki page urusia. Na oruna na ma ki aputa tenia na hua raha i gaha.”

³⁰Na Araha ki page marupera na kariana, ga matareha, manga na avanu ni sipi, ma ki page anumasira, ka apeape tatara. Ma ngaia ki page naka na magêha raha ngavê tangagamu na ai ni Pilisitia, ma igamu hato kamu page meme renia.

³¹Igamu hato na hinua i Pilisitia, mu angi avaravara. Mu bubununuga, igamu hato. Na akuhukuhunga ki râ me tenia i Asiria: rako teha na mane ni me, ga ramo ngavê.

³²Na ta ka visia tangara na mane tora tamasinga, ga râ me tenia i Pilisitia? Ge vi tangara, vi na Araha ki bani hagagatagatania i Sione, ma ka rukuruku igê ka apeape tatara na kariana, ga mamasiaga.