Read Kahua ISAIA 16 Bible Online

ISAIA 16 - Kahua bible

ISAIA 16

¹Na ai ni Moaba i hinua i Sela igê na masusu ngaira ka mahatangenira na kareta na sipi tanga na maneraha, i marungia i Jerusaleme.

²Ngaira ka bagatugupu rârâ ma ka oga igê na hagarangia na ve i Arenone, mangara na manu, ga tarigenira tenigi na robota.

³Ngaira ka vi tangara na ai ni Juta, ka vi: “Mu visia me na marâ, i ararigami kami tanua. Mu anumasigami manga na apinige, i mamarusira na enoni, matena na ritovagana, hanana mu mamarusigami. Igami na enoni mi gava. Mu pinihigami, siana ka tarahugami.

⁴Mu nakagami, kami oga i pasimi. Mu hagatahigami tenira na ani, ga obania vi nahuigami.” Na hagamamasiaganiha ma na bagabevoani ka page hato, ma na ani, ga hagaerasia ngavê na marê, ka page magahuru.

⁵Ma hemuri na hitangita na raraha iana o Tavite ki page maneraha, ma ki page marungira, ma ki page takuira, ma ki page toto surira na enoni. Ngaia ki page botage renigi na tarani, ga oto, ma ki page tagara raha nga renia na otoha.

⁶Na ai ni Juta ka vi: “Igia ka bani rongoa, vi na ai ni Moaba ka parunira ngavê. Igia ka bani girara, vi ngaira ka heruruhi ma ka hagakita ma ka tevotevo rasira mareta.”

⁷Na ai ni Moaba ka page angiangi, suria i tarahura na bagabevoani. Ngaira ka page angiangi bâraha. Ngaira ka page angisigi na ngêra koro, ga ngaugi i hinua i Kire Heresi. Ngaira ki asa, vige tako ni tahinga.

⁸Na mu hagarangia i Hesibone ma na pariki ni vaini i Sibima ka erataga ngavê. Na maneraha i na marê ki aharêsira ngavê na tonoha ni vaini tenigi na pariki ngegana. I nago na pariki ni vaini ngegana ka rârâ ma ka tariha i hinua i Jasere ma i kerekê tanga na masusu ma i kereso tanga na apanena harê na Asi Asiga.

⁹Ma i ngekê inê kê mesigi na pariki ni vaini i Sibima henira na ai ni Jasere. Na tavoni na maaku ka gogo renirerua i Hesibone me Eleale, suria i marehasira ngavê na ngauha, hanana vi na enoni ke vagevage re. Henaka na mako i koro, ma na enoni ki asa, vige vagevage igê. I asa na enoni, vige kahu ngerengere se vige kiki igê na pariki ni vaini.

¹⁰I asa na enoni, vige kahu rusigi na guani tanga na vaini. Na ngere vagevageha ki kahu hato ngavê.

¹¹Inê kê gegege manga na varoni na gita, suria gê mesirerua i Moaba me Kire Heresi.

¹²Na ai ni Moaba ka hagame apeta mareta renigi na tagereha iata tangagi na ngêsu, hanana viga avaravara igê. Ma ngaira ka avaravara purua ma.

¹³Hoi, i ngegana nga na tamasinga iana na Araha renia i Moaba.

¹⁴Ma i ngekê na Araha ki vi: “Surigi nga na harisi gi oru na ramoha ma na nahuninga raha i Moaba ka page arumakaka. Na enoni rako igê, ma tani ma ka page hita so. Ma ngaira ka na enoni purua.”