Read Kahua ISAIA 18 Bible Online

ISAIA 18 - Kahua bible

ISAIA 18

¹Nubia, na agua ni namu, i na apanena harê na ve i Nile.

²Ngaia ki hagatorangenira na mane tora tamasinga, ka tage igê na kere haka na mahoro ma ka ataha suria na ve i Nile. Mu aporo i pasimi! Mu rêrête tanga na apanena iami, ga vurusia na ve. Igamu na mane tora tamasinga, mu me aporo na rongoha tangara na enoni i pasimi, ga borahu ma ki bâkoro na apeta, ga raramohaga ma ka rikitaga, ma ka hagamagusira na enoni hato i maveta.

³Igamu hato na enoni i maveta, mu rongo! Mu nananêa na giraraha igê na hungani. Mu nananêa na ringena na ahuri.

⁴Renia na Araha ki bani vi tangê, ki vi: “Inê be oga haritagi ma i pasiku ma be hahutugia so na maveta. Inê be muni manga na kârupu, i vokavoka munimuni surigi na bungiani, matena na arito ru, se be muni manga na arito igê na ritovagana.

⁵Matena na takani na vaini ka bani anunu, na guani ka matâsi ma ki mamênga na matena vige husigi, ka uvegi na arani. I page tagenana ma tangara na ai ni Nubia, matena na merongata ka uvera igê.

⁶Na gahuata na mane ni me iata ka page tâtâ totoko i ano, ma na manu ma na marâ vasiga ka page ngaugi igê na matena na arito ru ma na matena na rogaroga ahuru.”

⁷I na matena ngekana na Araha raramohaga hunia ki page aganarigi igê na votovoto iata na enoni, ga borahu ma ki bâkoro na apeta, ga raramohaga ma ka rikitaga, ga hagamagusira na enoni hato i maveta, ma oga i na agua, ga vurusia na ve ngekana. Ngaira ka page arâ me igê na hungana i Sione, na agua ga rahesia igê na Araha raramohaga hunia.