Read Kahua ISAIA 19 Bible Online

ISAIA 19 - Kahua bible

ISAIA 19

¹Ikê na tamasinga renia i Esipito: Bâ, na Araha ki tage igê na vaha, ma ki râ rêrê tanga i Esipito. Na ataro ni Esipito ka bubununuga renia, ma na ai ni Esipito ka bagahagêguri.

²Na Araha ki vi: “Inê be katora na ai ni Esipito, ke hevoavoa so mareta, na ahegoata ke heariha, ma na enoni henira na tamata, na hinua tangara na hinua, na maneraha tangara na maneraha.

³Inê be hagabarasigi na katoha iata na ai ni Esipito, ma be katora ke rumakaka ngavê. Ngaira ka page avarasira na harasita ma na mane ni haritavo, ma ka page matu, ka hagatera na uvarita.

⁴Inê be tagarenira na ai ni Esipito tanga na maneraha i era, i page marungira ma ki page hagamamasiagara. Ngaia kani gê visia, inê na Araha raramohaga huniê.”

⁵Na ve i Nile ki page soso, ki page maravega ma ki page avagavaga.

⁶Na âpavoro i ve i Nile ka page kerakeraga, matena ga arâ tanga ga mamata. Na ate ma na vapu igê ka page maria.

⁷Na mu hato i papana na ve ka page marama, ma na roga ki page ahegenigi râ.

⁸Vikê na mane ni veasiha ka page hagagege ma ka page angiangi, suria na gavi ma na hugo iata ka tâtâ pura ma.

⁹Na enoni, ga tagarahigi na gahu, ka page hagêguri era.

¹⁰Na gete, ga hêhê, ma na mane, ga garoro, ka page ruruhi ma ka pe takotako ni tahinga.

¹¹Na maneraha i hinua i Soane ka beka ngavê! Na mane ni hagaotonga igê na gavumane, ga tako mataha, ngaira ka tamasi bekabekaga ngavê. Ngaira ka vi tanga na maneraha, i marungia i Esipito, ka vi: “Igami kami urusira na mane ni takoha i nago.”

¹²Maneraha i Esipito, i he nga na mane ni hagaotonga iamu, na ani ga tako mataha? Vari ngaira ka girara, ga hagarongogo renigi na katoha iana na Araha raramohaga hunia tanga i Esipito?

¹³Na maneraha i hinua i Soane ma i Memepesi ka beka ngavê ma ka gahe surigi na hagaparunga. Ngaira ka bêngenira bera na enoni, vige bêngenira bâkoro hete.

¹⁴Na Araha ki katogi, ki tora hegetigi na tamasinga iata na mane ni hagaotonga. Tahema na ai ni Esipito ka katogi na ara ni marâ, ga pe oto, ma ka tariahehu manga na mane i ruguhia na tonoha ma ki atobera igê na momâna.

¹⁵Mareha ngavê na enoni, na ani ruruguha se matareha, enoni raha se purua, vige girara, ge tamania i Esipito.

¹⁶I page arâ me na matena, na ai ni Esipito ka page maki igê mangara na gete. Ngaira ka page bubununuga ngavê, matena ga bâsia na Araha raramohaga hunia i nanê, vi hagaitangira.

¹⁷Na ai ni Esipito ka page magutenia ngavê i Juta, suria i na ara ni mateni ga takusia i Juta, ngaira ka page takusia nikâ na katoha ni hagaitangiha, na Araha raramohaga hunia ki bani naka tangara. Tahema ngaira ka bubununuga!

¹⁸I na matena ngekana igê na hinua raha gi rima i Esipito ka page tamasi igê na tamasinga iata na Siu, ma na enoni i ngekana ka page tohetohe, hanana viga rahesia na Araha raramohaga hunia. Na hitangini na hinua ngegê ka page hêtana renia vi ‘Hinua ni Arito’.

¹⁹I na matena ngekana ki page oga i Esipito na bea ni vogasiha ma na vakivaki na hê tanga na Araha igê na taritarihana.

²⁰Ngaigi ka na girarani tangara, vi na Araha raramohaga hunia ki gâga i Esipito. Matena na enoni i ngekana ka mamasiaga ma ka avarasia na Araha, ngaia ki page hagatorangenia na ani, hanana i hagatahira.

²¹Na Araha ki page hagagirarara na ai ni Esipito renia marena, ma ngaira ka page aitangisia, ma ka page rahesia, ma ka page susu tanga, ma ka page vogasia. Ngaira ka page tohetohe, matena ga surusuru tanga, ma ka page hagamonarigi na suruha iata.

²²Na Araha ki page hagaitangira na ai ni Esipito, hanana vi ngaira ka urisi parongata. Ngaira ka page aharia, ma ngaia ki page aganarigi na nunginungiha iata, ma ki page hagakorora aporo.

²³I na matena ngekana ki page oga na tara raha tenia i Esipito tanga i Asiria. Na enoni igê na agua gi rua ngegê ka page arârâ heri, ma ka page hagarahe haku.

²⁴I na matena ngekana i Isiraele ki page tagenana henirerua i Esipito ma i Asiria, ma ngaira gi oru ngegê ka page hagakoroa na maveta hagenani.

²⁵Na Araha raramohaga hunia ki page hagapura, ki vivi: “Ramana tangagamu, ai ni Esipito na kariaku. Ramana tangagamu, ai ni Asiria, gê bani hagavoragamu. Ramana tangagamu, ai ni Isiraele, suria igamu ka na aniku.”