Read Kahua ISAIA 2 Bible Online

ISAIA 2 - Kahua bible

ISAIA 2

¹Ikê na maruteha iana o Isaia, karena o Amose, renirerua i Juta me Jerusaleme.

²I na matena i muri vê na hungana, i oga igê na Ruma ni Rotu, ki page akê teha ngavê, ma ki page teharigi na barani hato i maveta. Rako na enoni tenigi na agua hato i maveta ka page tihuri tanga.

³Ma ngaira ka page vivi: “Nika, ge akê i na hungana iana na Araha tanga na Ruma ni Rotu iana God, na Isiraelita ka rahesia. Ma ngaia ki page hagesurigia renigi na obaniha iana tangagia. Ma igia ka page arâ surigi na hagesuringa iana tangagia, suria na hagesuringa iana na Araha ki râ me tenia i Jerusaleme, tenia i Sione, na agua i tamasi igê tangara na kariana.”

⁴Na Araha ki page hagaotogi na berarogata na enoni i maveta, ga hevisi. Na tangaruha ni hearihatana ngaira ka page katogi renigi na marâ ni tagaraniha i mu, ma ka page tagarahigi na ora renigi na gira iata. Na enoni hato i maveta ki hato, vige page heariha nikâ, se vige hagarêgi nikâ na hearihatana.

⁵Hoi, na raraha iana o Jakobo, nika, ge râ suria na tara, i mavesia tangagia na Araha.

⁶Araha, igo ko bani kasi renira na kariamu, na raraha iana o Jakobo. Renia na haritavo, na maru ma na matuha tenia i kerekê ma tenia i Pilisitina ka raramohaga igê na agua hagenani, suria ga rako na ai mahuara igê.

⁷Na agua ki vunu renigi na siliva ma na golo, ma na ruruguha ka rako makira. Na hosi ma na kati ni me ka aharêsia.

⁸Na nunuta na ataro ka rako igê. Na enoni ka vogasigi igê na marâ, ga tahegi re rimata mareta.

⁹Siana ko bonotenigi na tasi iata. Gu hagamakira ma ku hagaruruhi apeta ngaira hato, na enoni raha ma na enoni purua.

¹⁰Mu ahiahi igê na vaba! Mu ahiahi igê na kiru, hanana mu gavagava tenia na mangariaganiha iana na Araha ma tenigi na raramohana ma na bâbâhana.

¹¹Ta na tangiana ka page hatohato hagetage igê na enoni, ga paroparo ma ka heruruhi, ma na Araha ngaia getea ma ka page hagarahasia.

¹²Igê na tangiana ngekana na Araha raramohaga hunia ki page kasira so igê na enoni raha hato, ga ramata, ma na ani ga paroparo ma ka heruruhi.

¹³Ngaia ki page hatungigi na apinige raha i Libanone ma na apinige hato, ga raha ma ka gatagata i Basani.

¹⁴Ngaia ki page hagahataragi na barani ma na hungani.

¹⁵Ngaia ki page hogegi na bebetehe raha ma na ara ni para ni hinua nganganihaga.

¹⁶Ngaia ki page katogi ka kokoro na haka, naka ma na ani raha ngavê, ga bâkoro.

¹⁷Na enoni, ga paroparo ma ka heruruhi, ka page hato hagetage. Ma na Araha ngaia getea ma ka page hagarahasia,

¹⁸suria na ataro ka page magahuru hagetage.

¹⁹Na enoni ka page ahiahi igê na vaba ma na kiru, hanana ga gavagava tenia na mangariganiha iana na Araha ma tenigi na raramohana ma na bâbâhana, matena i arâ me ki ngingia na maveta.

²⁰Igê na tangiana ngekana ngaira ki page kasigi râ igê na nunuta na ataro, ga tagarahigi renigi na golo ma na siliva, ma ki page panigi tangara na kiki ma na roke.

²¹Matena i arâ me na Araha ki ngingia na maveta, na enoni ka page ahiahi igê na kiru ma na vaba, hanana ga gavagava tenia na mangariaganiha iana ma tenigi na raramohana ma na bâbâhana.

²²Siana kamu hagêgurira na enoni, suria ngaira ka girara ga meme. Na ta kani ngaira?