Read Kahua ISAIA 21 Bible Online

ISAIA 21 - Kahua bible

ISAIA 21

¹Eraha tanga i Babilone, na bagamanihê raha hagarangia na ve. Na eraha ki râ me tenia na bagamasusu raha, tenia na agua ni maguha. Ngaia ki râ me manga na maguara, i rêrê me igê na bagamanihê raha.

²Na Araha ki hagamaruteê, ma inê kê rigia na tarana ni mamasiaganiha, ni hagasuhinga ma ni rauha. Mane ni me i Elama, mu sugarigi na hinua! Mane ni me i Metia, mu arâ rihigi! God ki page hagahatungigi na mamasiaganiha, ga katogi na ai ni Babilone.

³Na tarani, gê bâsigi ma kê rongogi, matena gê marute, ka katoê, kê bubununuga ma kê mamasiaga. Na mamasiaganiha i manga na gete i harate kare.

⁴I nahuiê na takoha. Na apeku ki tata. Inê kê naasia bâraha, vige bungi rêrê, ma hete na bungiana ki era ngavê tangê.

⁵Igê na maruteha inê kê bâsia, viga hagarêa na magotoha. Na bana ka kangigi. Ngaira ka ngêngê ma ka tono. Ki para ma, ma na ngereha, i vi: “Aharaga, maneraha ni me! Hagarêgi na bêata iami!”

⁶Na Araha ki vi tangê, ki vi: “Gu naka na mane ni anumasiha, ma ko vi tanga, ki hagarongo renigi na marâ, i bâsigi.

⁷Manga i bâsira na mane igê na hosi, na vererua ma na vererua, ma na mane igê na tonki ma na kamelo, ki tuguhia, i hahutugira maninga,

⁸ma ki hagangere raha.” Na mane ni anumasiha ki vi: “Araha, suria na tangiana hagenani ma na bungiana hagenani nikâ inê kê ura igê na bebetehe, ma kê bâbâ.”

⁹Na mane ni anumasiha ki ngere, ki vi: “Bâ, ngaira ikana! Na mane igê na hosi, na vererua ma na vererua. Babilone ki vota! Babilone ki hato iana! Na ara ni nunuta hato na ataro iata ka amenamena i ano!”

¹⁰Kariaku Isiraele, ga bani ugigamu ma ka bani hatagamu, inê kê kahu hagarongogamu me ma renia na taroha koro, gê rongoa tenia na Araha raramohaga hunia, na God iata na Isiraelita.

¹¹Ikê na tamasinga renia i Etome. Inê na mane ni anumasiha, ma ta na enoni ki ngere tangê tenia i Etome, ki vi: “Mane ni anumasiha! I hega, i arihu mênga na bungiana?”

¹²Inê kê arami, kê vi: “I tangitangi noga ma hemuri ki page bungibungi nikâ. Manga go obania, vigo hagateê nikâ, i koro ma, go aporo me nikâ.”

¹³Ai ni Tatane, igamu ma na marâ hato iami kamu tênga igê na ve banga i na masusu i Arabia.

¹⁴Mu vatera na ve na enoni, i mamata na riota, ma ka arâ me tangagamu. Igamu na ai ni Tema, mu vatera na ngêra na enoni, ga rukuruku i pasimi.

¹⁵Renia ngaira ka gavatenia na henahuita, tenigi na tangaruha, na tatapa ma na epage, ga nanê, viga nahuira renigi.

¹⁶Na Araha ki tamasi tangê, ki vi: “I murina na harisi gi tage togo nga ma na raramohata na ai ni Ketare ki page hato hagetage.

¹⁷Na mane ni hananiha ka ramo teharira na mane getera i Ketare, ma tani ma na hitangita ka page hita. Ngaia kani gê visia, inê na Araha God iata na Isiraelita.”