Read Kahua ISAIA 22 Bible Online

ISAIA 22 - Kahua bible

ISAIA 22

¹Ikê na tamasinga renia na Maruguna ni Maruteha. Ai ni Jerusaleme, na ta ikê? Tanu hega igamu kamu heogasi ma kamu magoto i gerini aberabera na ruma iami?

²Renia ta mu barongo? Renia ta mu ngerengere vagevage? Na mane ni me iami, ga me igê na henahuita, ngaira ka pe me suria vige togeaga.

³Na maneraha hato iami ka kasi na tangaruha ma ka gava, ma na merongata ka hagatotongora. Naka ma ngaira ka gava ka râ hagatê, ma ngaira ka têra tatage.

⁴Tahema mu nakê so, hanana gê angiangi maramara renira na kariaku hato ga me. Siana kamu hagamuniê.

⁵I ngekê ki na matena ni bagatatakoha, ni perenga ma ni heraonge igê na Maruguna ni Maruteha, ma God, na Araha raramohaga hunia, ki nakagi tangagia. Na para ni hinua ka agorata noga. Na hungani ka tagitagi renigi na avaravaraha.

⁶Na mane ni me ni Elama igê na hosi ma igê na kati ni me ka râ me henigi na epage ni me ma na mage. Na mane ni me i Kire ka bani ngahi renigi na bêata iata.

⁷Na kati ni me ka gahuigi na maruguni i Juta, na maruguni na mako koro. Na mane ni me igê na hosi ka ura i maani para i Jerusaleme.

⁸Ngaira ka râ tatahura i Juta. Igê na tangiana ngekana igamu kamu rurugugi na tangaruha tenia na ruma ni tangaruha.

⁹Igamu kamu haharirigi na para i Jerusaleme, ma kamu tarahugi na agua, ga sugi agorata noga. Igamu kamu haharirigi na ruma i Jerusaleme, ma kamu hogegi tani, hanana mu hagagatagatanigi aporo na para renigi. Hanana mu hagepuria na ve,

¹¹igamu kamu karua na hê i rarona na hinua, hanana i nonganonga igê na ve, i arâ me tenia na bani nonganonga. Ma igamu kamu pe takusia God. Igamu kamu pe botage renia, vi ngaia ki bani nakagi me na tarani ngegê i nago kere vê noga, ma ki katogi, ka voravora me.

¹²Igê na tangiana ngekana na Araha God raramohaga hunia ki bonasigamu igê, hanana mu angiangi, ma kamu angiangi maramara, ma kamu gorogoro bê huri, ma kamu gahugahu tatari.

¹³Ma hete mu ruru ma kamu magoto ma. Igamu kamu nahuira na sipi ma na puruka tanga mu ngêngê masu renira, ma kamu totono papasi na vaini. Igamu kamu vi: “Nika! Ge ngêngê ma ke totono! Vari i gomaha igia ka meme!”

¹⁴Ma na Araha God raramohaga hunia ngaia marena ki tamasi tangê, ki vi: “I asa hagetage be bonotenia na bagatarihata ngekê naka ma ga meme. Ngaia kani gê visia, inê na Araha God raramohaga hunia.”

¹⁵Na Araha raramohaga hunia ki bonasiê, kê râ i pasina o Sebena, i bâsurira na kariana ma na nahuninga iana na maneraha. Ngaia ki bonasiê, kê tamasi tanga, kê vi:

¹⁶“Go takusia vi o ti kani igo? I oto tangago vari, vigo karua na matiku tangago maremu igê na tarihana na hê na hungana?

¹⁷Naka ma igo vi na enoni raha, ma na Araha ki page ragego ma ki page arihatenigo râ.

¹⁸Ngaia ki page tavogo ma ki page arihatenigo manga na bote, ma ko page vatovato hagatê igê na agua, i raha teharia na ani ikê. Ma i ngekana igo ko page meme i berarogani na kati ni me, go ageagesigi bâraha. Igo ko hagamakira na ruma iana na maneraha iamu.

¹⁹Na Araha ki page hatungigo tenia na tagaraha iamu, ma ki page kasigo vato tenia na âgâga raha iamu.”

²⁰Na Araha ki vi tanga o Sebena, ki vi: “Igê na matena ngekana inê be unia me na kariaku o Eliakimo, karena o Hilikia.

²¹Inê kê page hagatugunia renigi na tuguni iamu ma na hogosimu, matena go enoni raha, ma be vatea renigi na ramoha hato, go nahunigi i nago. Ngaia ki page marupera na ai ni Jerusaleme me Juta, manga na mane i marupera maninga na karena.

²²Inê be vatea renigi na ramoha hato, hanana i voravora na ruata tanga na maneraha, na raraha iana o Tavite. Inê be hagêguria renigi na ki tanga na ruma iana na maneraha. Manga i tangahia na maani ruma, i bara ta na enoni, vige page purusia aporo. Manga i purusia, ki bara ta na enoni, vige page tangahia aporo.

²³Inê be hagagatagatania manga na kuhakuha igê na apê ni ruma, ma ngaia ki page hagarahasira na ahemata hagenani iana.

²⁴“Ma ngaira hato na goana ma na kariana ka gâga hagêguria. Ngaira ka hagêguria mangagi na kuki ma na apira ga hagêguria na kuhakuha.

²⁵Matena i manga ngekana, na kuhakuha, i kuku nganganihaga igê na apê, ki page akarakara, ma ki page votavota. Ma na marâ hato, ga hagêguria, ka page akamakama. Ngaia kani gê visia, inê na Araha.”