Read Kahua ISAIA 23 Bible Online

ISAIA 23 - Kahua bible

ISAIA 23

¹Ikê na tamasinga renia i Taire. Igamu na mane mu tagara igê na haka i avoa, mu angiangi raha, suria i Taire, na hinua igê na sugu iami, ki aruhuruhu. Na ruma igê ka tâ hato i ano. Na sugu igê ki era ngavê. Mu page girara, matena mu aporo me tenia i Saipero.

²Igamu na ai ni tarasini, igamu na mane ni hagavarahi haga, mu angiangi raha.

³Igamu kamu hagaguhira na kariami igê na haka tangagi na agua getigi, hanana viga vurivuri ma ka hagavuri na ngêra i Esipito. Igamu kamu mauri re na hagavarahi haga henira na ara ni agua getigi.

⁴Ai ni Sitone, mu maki! Na asi ma na rutuni i avoa ka mu tenigamu, ka vi: “Inê kê pe apara kare rârâ. Inê kê pe marupe kare, mane se hehene.”

⁵Na ai ni Esipito nikâ ka gasuga, ma ka hetaki, matena ga rongoa, vi Taire ki aruhuruhu.

⁶Ai ni Punisia, mu angiangi raha! Mu uhungia, kamu gavagava tangagi ta na agua.

⁷Ikê vari ngaia i Taire na hinua, ga bani tagarahia i nago kere vê noga ma na enoni ka vagevage tare igê? Ikê vari ki na hinua, i kasira na enoni tangagi na agua getigi, ka gâga igê?

⁸Ti ki kato, vi hagavotaria i Taire? I nago ngaia ki marungigi rako na agua. Na enoni, ga hagavarahi haga, ka maneraha ma ki rongo raha na atata i maveta hagenani.

⁹Na Araha raramohaga hunia kani katoa vikana. Ngaia ki katoa vikana, hanana i hatungia na paroparoha iata renigi na tagaraha iata, ma ki kasira so na enoni, i rongo raha na atata.

¹⁰Igamu na avanuni na haka ni tagaraha mu banu i mu, ma kamu tagarahigi na mu ni ngêra. Mareha tagua, vigamu rukuruku igê.

¹¹Na Araha ki otoa na rimana tanga na asi, ma ki hatungigi na raramohata na maneraha. Ngaia ki bonasira na merongata, ka hogegi na hinua nganganihaga iata na ai ni Punisia.

¹²Ngaia ki vi: “Hinua i Sitone, na vagevageha iamu ki hato, ma na kariamu ka mamasiaga. Naka ma ngaira ka gavagava i Saipero, i asa iata, vige page asitatara.”

¹³Na ai ni Babilone hete, mareha vi na ai ni Asiria, kani ga ruhuruhua i Taire, ki vora na agua tangara na marâ vasiga. Na ai ni Babilone kani ga tahakurugi na para ni hinua i Taire, ka hogegi na ruma nganganihaga igê, ma ka ruhuruhua na hinua.

¹⁴Igamu na mane, mu tagara igê na haka i avoa, mu angiangi raha, suria na hinua nganganihaga iami, mu tanga pupu renia, ki aruhuruhu.

¹⁵I na matena ngekana ka page takotako mu renia i Taire surigi na tangahuri harisi gi pi, na ararina na matena i mauri suria na maneraha. Matena ga hatohato igê na harisi ngegana, i Taire ki page manga na êrâ igê na ki, i râ vike:

¹⁶“Go, êrâ matareha, ga bani bonotenigo. Gu torea na gita. Ku rihia na hinua. Tarugia bâkoro na gita iamu. Gu ki ke rongo koro, hanana na mane ka takusigo aporo.”

¹⁷Matena ga hatohato igê na tangahuri harisi gi pi, na Araha ki page nakara na ai ni Taire, ka haganega aporo, ka hagatagarahigi na haka, ma na maneraha hato i maveta ka page taharigi.

¹⁸Na haga, ga tarahugi igê na tagaraha iata, ngaira ka page vatea na Araha. Ngaira ka pe nakagi râ, ma na enoni, ga rahesia na Araha, ka page vurigi re rako na ngêra ma na gahu bâkoro.