Read Kahua ISAIA 24 Bible Online

ISAIA 24 - Kahua bible

ISAIA 24

¹Na Araha ki page erasia ngavê na maveta, ma ki page katoa, ki hihiruga. Ngaia ki page pinoa na basina, ma ki page tokorenira na enoni igê.

²Na tarana gi tage ki page tarahura na ara ni hitangita: na mane ni hagarahenga ma na enoni, na kare rakuraku ma na avanuta, na ani ga vurivuri ma na ani ga hagavuri, na ani ga hagaba ma na ani ga totora hagaba, na ani ga ruruguha ma na ani ga matareha.

³Na maveta ki page erataga ma ki baguru ngavê. Ngaia kani visia na Araha.

⁴Na maveta ki avagavaga ma ki marama. Na maveta hagenani ki mameaga. Na ano ma na vavearo karu êvariga.

⁵Na enoni ka erasia na maveta, suria ga aharêngigi na ramata iana God ma ka pe tê viteana, ma ka kasia na suruheri iana henira, i araria vi gâga tare.

⁶Tahema God ki hagaitangia na maveta. Na enoni ka kasikasi meni na bagatarihata. Ngaira ka meme tatage.

⁷Na varo na vaini ka maugu, ma na tavoni na vaini ki pe rakorako. Na ani, ga obakoro i nago, ka oba era i ngekê.

⁸Na mâha ki hatohato. Na tarotaroha ma na kahenga ka hatohato. Ki hatohato nikâ, vige tarugigi na gita ma na ukelele.

⁹I hatohato vige kiki, matena ga totono na vaini. Na vaini ki mahe tangara.

¹⁰Na hinua raha ki sutasutaga ma ki aruhuruhu. I bara vige banuhigi na ruma.

¹¹Na enoni ka hagagege i tara, suria i mareha na vaini. Na vagevageha ki mumute. Ki apu na ageageha igê na agua.

¹²Na hinua raha ki aruhuruhu. Na maani para ka ahogehoge.

¹³Na tarana ngekê ki page tarahura na ara ni enoni hato i maveta hagenani. Ngaia ki maratorana na matena, ga husigi igê na guani na apinige ni ngêra. Ga bani ngingia na apinige ni olive ma ki anunu hato na guani, ma ka bani husigi hato na guani na vaini.

¹⁴Na ani ga tahitahi mêngara ka page kiki vagevage. Na ani i kereso ka page hagarahasia na Araha,

¹⁵ma na ani i kerekê ka page visia raha. Na enoni igê na tarasini ka page hagahigasia na Araha God iata na Isiraelita.

¹⁶Tenigi na agua hagatê era i maveta igia ka page rongora nikâ, ga kiria na Araha, i koro ma oto tare na parongana. Ma inê kê vi, vigê pe tako ni tahinga. Inê kê mameaga. I era ngavê tangê! Na enoni ni hagaparunga ka ama ni hagahagaparu nga. Na hagaparunga ki ama ni ramoramo nga.

¹⁷Mu karingê, igamu hato! Na perenga, na sutasutaha ma na etu ka nanê tangagamu.

¹⁸Na ani, i uhungia vi gavagavatenia na perenga, ki page vota igê na suta. Na ani i huhura tenia na suta ki page tutu igê na etu. Na kumu na rangi ki page arâ me tenia na vavearo ma na gatani na maveta ka page angingi.

¹⁹Na ano ki page avagavaga ma ki page gisigisi ma ki page tahatahaga.

²⁰Na maveta ki page tariahehu manga na mane i ruguhia na tonoha, se manga na ruma i angingi, matena na roga raha. Na tasi ka page hagahigea na maveta. Ngaia ki page votavota su ngavê.

²¹I na matena ngekana na Araha ki page hagaitangira igê na ani ga raramohaga i vavearo ma na maneraha i maveta.

²²God ki page hagaitangira na maneraha ma ki page kasira so haku igê na kiru. Ngaia ki page purusira igê na kiru ngekana, mataro me na matena ni hagaitangiha tangara.

²³Na hageha ki page roto, ma na arito ki hato, vige page mave, suria God raramohaga hunia ki page Araha. Ngaia ki page Araha i Jerusaleme i na hungana i Sione, ma ki page hagabângenia na raramohana tangara na maneraha iata na enoni.