Read Kahua ISAIA 25 Bible Online

ISAIA 25 - Kahua bible

ISAIA 25

¹Araha, igo ki na God iaku. Inê be hagahigasigo ma be hagarahasigo. Na tauhamu ka hagakoneê ngavê. Na katoha iamu i nago kere vê noga igo ko bani tê surigi me.

²Igo ko bani ruhuruhugi na hinua iata na merongamami, ma ko bani hogegi na ruma nganganihaga iata igê. Na ruma raha iata ka bani magahuru.

³Na enoni raramohaga igê na agua getigi ka page hagarahasigo. Na hinua ni hagamamasiaganiha ka page magutenigo.

⁴Na enoni matareha ma na ani i bara tangara ka bani ruku i pasimu ma ka asitatara igê na mateni ni bagabevoani. Igo ko hagarukuhira tenigi na roga raha, ma ko mamarusira tenia na singiha. Na mane ni hagamamasiaganiha ka taharia na agua, manga na rangi i tahusi igê na ruma,

⁵se manga na singiha i singia na mako avagavaga. Ma igo, Araha, ko teharira na merongamami. Igo ko hagamunira na mane, ga hagamamasiagagami, manga na vaha i tâ pusia na singehana na arito.

⁶Igê nga na hungana i Sione na Araha raramohaga hunia ki page hagarêa igê na magotoha tangara na enoni hato i maveta: na magotoha ni ngêra mora ma ni vaini mora.

⁷I ngekana nga ngaia ki page hatungia hagetage igê na ape ruruhinga, i aharêsira na enoni hato i maveta.

⁸Na Araha God ki page hatungia ngavê na mera. Ngaia ki page taruhigi râ na tavoni na maata na enoni hato. Ngaia ki page hatungia na makiha tenira na kariana i na ara ni agua ma vê ga oga igê i maveta. Ngaia kani visia na Araha.

⁹I na matena ngekana ngaira hato ka page vivi: “Ngaia nga ki na God iaka. Igia ka hagêguri togo renia, ma ngaia ki hagatahigia. Ngaia nga ki Araha. Igia ka raruni togo renia. Ma i ngekê igia ka obakoro ma ka vagevage, suria ngaia ki hagatahigia.”

¹⁰Na Araha ki page anumasia na hungana i Sione, ma ka page purira so na ai ni Moaba, manga na puruka ga purugi na ae.

¹¹Ngaira ka page kaura rimata, manga na enoni, i sugi tono, ki kokoro i ve. Ma God ki page hagavotarira, suria ngaira ka paroparo bâraha, ma ka su na rimata.

¹²Ngaia ki page hogegi na hinua nganganihaga iata henigi na para, ga akê bâraha, ma ki page katogi, ki agorata so i ano.