Read Kahua ISAIA 26 Bible Online

ISAIA 26 - Kahua bible

ISAIA 26

¹I page râ me na matena, na enoni i Juta ka page kiria igê na ki, i râ vikê: “Na hinua iaka ki nganganihaga ngavê! God marena ki anumasia. Ngaia ki mangagi na bebetehe ma na para.

²Tangahigi na maani para, hanana ga bêbanu me igê na enoni, ga toto suria God, ma ka paronga koro ma oto i maana.

³Araha, na enoni, ga ama ni toto surigo nga ma ka hagêguri togo renigo tare, igo ko vatera renia na morana na ramana.

⁴Mu hagêguri togo renia na Araha tare, ki bê ki arâ, suria na Araha God ki anumasigamu tare.

⁵Ngaia ki bani kasira so na enoni, ga paroparo ma ka hagarahasira mareta. Ngaia ki bani hagaerasia ngavê na hinua iata. Ngaia ki hogea, ki aruhuruhu.

⁶Na enoni matareha ma na ani i bara tangara ka arâ igê, ka puria so.”

⁷Igo, Araha, ko hagahataraia na tara tangara na enoni, ga koro ma ka oto na parongata i maamu. Na tara, ga arâ igê, ki manamanaga.

⁸Igami kami tê viteamu ma kami naasigo. Igo nga kami tenigo bâraha.

⁹Igê na bungiani nikâ inê kê naasigo. Inê kê naasigo i mêrihaku hagenani. Na matena go surira igê na enoni i maveta, ngaira ka page giraragi na tarani, ga oto.

¹⁰Naka ma go koro tangara na enoni, ma ngaira ki asa, vige page giraragi na tarani, ga oto, suria ngaira ka usitenigo. Ikê nikâ igê na agua, ga goga igê na enoni koro, ngaira ka bagatarihata, suria ngaira ka usitenia na arahanga iamu, Araha.

¹¹Na merongamu, Araha, ka pe girara, vi igo ko page hagaitangira. Gu hagabângenia, vi igo ko takuira na kariamu, hanana na merongamu ka maki. Nakara, ke hatamia na hagaitangiha, go bani naka tangara.

¹²Araha, gu vategami na ramana. Igo ko bani hagaotogami, ki râ bâkoro na ogaha iamami.

¹³God, Araha iamami, na enoni getera ka bani marungigami. Ma igo gi tage togo hete nga na Araha iamami.

¹⁴Ma ngaira ka bani me, ma ki asa, vige page mauri aporo. Na nunuta ki asa, vige page aporo me, suria go bani hagaitangira ma ko bani mutera. Ma na enoni hato ka bani hitenira.

¹⁵Araha, igo ko bani hagarakonigami, ma ko bani katogami, kami ramoramo. Igo ko bani haganahunigami renigi na agua, ga rihigami. Igê na tarana ngekê ki rongo raha na atamu.

¹⁶Araha, igo ko hagaitangira na kariamu, ma igê na mamasiaganiha iata ngaira ka avarasigo.

¹⁷Igo, Araha, ko hagamamasiagagami, kami ngerengere, manga na gete i harate kare, i hiote ma ki ngerengere.

¹⁸Igami kami mamasiaga ma kami ngerengere, manga na gete i harate kare ma ki ngerengere, ma kami mamasiaga hagaborâ ma. Na apanena iamami ki pe teha. Igami kami pe hagavorea rârâ ta na marâ.

¹⁹Araha, na kariamu na goamami, ga bani me, ngaira ka page mauri aporo. Na gahuata ka page aharaga aporo. Ngaira hato na ani igê na anoano ka page rite ma ka page kiki vagevage. Na kâropu iamu ki na kâropu ni mauriha. Manga na kâropu i hagamauria na ano. Igo, Araha, ko hagamaurira na ani i na anoano.

²⁰Igamu na kariaku, mu banu i ruma iami ma kamu purusigamu igê. Mu oga pinihi sisite noga, mataro me ki hatohato na mangariaganiha iana God.

²¹Na Araha ki râ me tenia i pasina, hanana i hagaitangira na enoni i maveta renigi na tasi iata. Ngaia ki page ranganira na enoni, ga nahunahu piri i maveta, ma ki page hagabângenigi na agua, ga bagira pinihi igê.