Read Kahua ISAIA 27 Bible Online

ISAIA 27 - Kahua bible

ISAIA 27

¹I na matena ngekana na Araha ki page amuria igê na tatapa borahu iana, i nganganihaga ma ki masi, hanana i hagaitangia renia Leviatane, na hua raha ni eraha, ma ki page nahuia ki meme na ega raha ngekana, i oga i asi, ki ahaketaketa ma ki agirogiro.

²Igê na tangiana ngekana na Araha ki page vivi: “Na mu ni vaini iaku, mu barobaro ki renia.

³Inê kê bâsuria ma kê hagavokaria tare. Inê kê anumasia igê na bungiani ma na tangiani, hanana siana ta na enoni ki hagaerasia.

⁴Inê ki hato, vi ve mangariaga tanga. Manga na tone ma na rauga era, ma ka gâga mêngagi, inê be ragegi otooto râ nga ma be sungigi.

⁵Manga na merongata na kariaku, ma ka avarasiê, hanana vigê anumasira, ki tuguhira, viga hekorokoro hagenago heniê. Monari, nakara ke hekorokoro heniê.”

⁶I page arâ me na matena, na ai ni Isiraele, na raraha iana o Jakobo, ka page manga na apinige, i vagavagaraga, ki hisihisi, ki takataka ma ki rasirasi, ma na guana ka page aharêsia ngavê na maveta.

⁷Na Araha ki hagaitangira na Ai ni Isiraele teharira vari na merongata? Na mane ni me ni Isiraele ka me rako vari teharira na merongata?

⁸Mareha! Na Araha ki hagaitangira hagarari na kariana. Ngaia ki paira hura tangagi na agua getigi. Ngaia ki tarigenira râ manga na roga raha, i rogatenigi râ na ara ni marâ hato.

⁹Igê na tarana ngekê ngaira ka kasi meni na tasi iata, ma ka aharia God, ma ngaia ki bonotenigi na bagatarihata. Ngaira ka hanunu na hê na bea ni vogasiha ni ataro ka vora manga na ahu, ma ka hagamagahurugi hagetage na nununa ka Asera na ataro ma na bea ga susu igê tanga. Na girarana vi ngaira ka urisi parongata.

¹⁰Na hinua nganganihaga ki aruhuruhu. Ngaia ki hihiruga manga na tênga. Ngaia ki vora re na pariki ni puruka, ga ngêngê ma ka mamaro igê ma ka tataku nikâ igê na apinige.

¹¹Na arani na apinige ka babaro ma ka maria, ma na gete ka toregi renigi na ario. Ma suria na enoni ka bonobonoga ma ka pe urisi parongata, tahema God, i hagavorara, ki asa, vige mesira se vige takuira.

¹²I na matena ngekana na Araha ki page asirira tatage igê na kariana, haganega tenia na ve i Uparatesi tanga na ve i Esipito. Ngaia ki page manga na enoni, i nuinuigi na koni.

¹³I na matena ngekana ki page angiangi igê na ahuri, hanana ga aporo me na Isiraelita hato, ga bani henahuraura tanga i Asiria me Esipito. Ngaira ka page aporo me ma ka page rahesia na Araha igê na hungana apuna iana i Jerusaleme.