Read Kahua ISAIA 29 Bible Online

ISAIA 29 - Kahua bible

ISAIA 29

¹Ki page era ngavê tanga i Jerusaleme, na hinua i oga igê na bea ni vogasiha iana God. Ki page era ngavê tanga i Jerusaleme, na hinua o Tavite ki oga igê. I murina na harisi gi tage se gi rua henigi na tangiani raha ni rotu ma ni magotoha

²God ki page merâ me igê na bagabevoana tanga na hinua, ga hêtana vi “Bea ni vogasiha iana God.” Na enoni i ngekana ka page angiangi ma ka page angiangi maramara. Na hinua hagenani ki page manga na bea ni vogasiha, i gagapuga.

³God ki page taharia na hinua, ki page hagabarasigi na ara ni teha, ma ki page rapigi ma tahakurugi na para ni hinua.

⁴Ka page ruhuruhua Jerusaleme. Matena i tâtâ i ano, ngaia ki page tamasi, ma na ringena ki page rongo manga na ringena na enoni, i bani me, se i page rongo sisite manga na ringena na enoni, i anuia na mako.

⁵Jerusaleme, na ai mahuara hato, ga taharigo, ka page gavagava mangagi na momo, i ahegenigi na roga. Na mane ni me ni hagabubununugaha ka page gava mangagi na ahani na rê igê na maguara.

⁶Na Araha raramohaga hunia ki page parama, ma ki hagakakangi me, hanana i hagatahigamu renigi na gugusuhia ma na nunu, garu hagakuru bêta, renigi na roga raha ma na maguara, renia na bagagi raha, i hagamakakagi na ara ni marâ hato.

⁷Ma na mane ni me i na agua getigi, ga taharia na hinua, i oga igê na bea ni vogasiha iana God, ma na tangaruha hato iata, ma na marâ hato getegi tanga na hearihatana, ngaira ma na ara ni marâ hato iata ka page magahuru manga na maruteha, se na bagaririteha.

⁸Ngaira hato na mane, ga haku, hanana viga sugaria Jerusaleme, ka page manga na enoni, i magê ngavê ma ki marute, vi ngê, ma ki magê mênga, matena i riterite. Se manga na enoni, i mamata roro na riona ma ki marute, vi tono, ma ki mamata mênga na riona, matena i riterite.

⁹Igamu kamu bonobonoga! Hoi, mu râ suri parongami! Igamu ki guru na maami! Hoi, mu râ suri parongami! Ga aripo na maami, mareha vi renia na vaini. Mu tariahehu, mareha vi renia na tonoha.

¹⁰Na Araha ki katogamu, kamu mamêruga, ma ki sugia ma, vigamu mêru bore. Na poropete ka na maata na enoni, ma God ki bara pusigi na maata.

¹¹Na girarani na ara ni maruteha iata na poropete ka pinihi tenigamu manga na tamasinga igê na bani buka, ga pe tangahia rârâ. Manga gu vatea na buka ngekê tanga na enoni, i girara i tomatoma, hanana vige tomania tangago, vikê ngaia ke vi: “E, i bara, suria i purupuru.”

¹²Manga gu vatea na enoni, i pe girara ge tomatoma, hanana vige tomania tangago, vikê ngaia ke vi: “E, inê kê pe girara ve tomatoma.”

¹³Na Araha ki vi: “Na enoni ngegê ka ki, vi ngaira ka rahesiê, ma hete ga tamasi i harata ma, ma igê na aitangihata ngaira ki asa ngavê, vige takusiê. Na rotu iata ki ramata ma ma na tauhata ma na enoni, ma ka giraragi ma i harata.

¹⁴Vikê inê be hagakangira na enoni ngegê renigi na tarani, ga pe bani giraragi i nago ma ka page hagakonera ngavê. Na giraraha iata na enoni ga tako mataha ki page magahuru henigi na takoha mataha iata.”

¹⁵Ki page era ngavê tangara na enoni, ga uhungia, viga pinihigi na katoha iata tenia na Araha. Ngaira ka katogi pinihi na katoha iata, ma ka vivi ngaira, “Ti ki girara i bâsigia? Ti ki girara i tarahugia?”

¹⁶Ngaira ka era ngavê, suria ga hagarehagi na ara ni marâ. Na ta ki teha, na mane i tagarahia na apira, se na bogona na apinige, i tahea renia? I hega, na apira ki girara i vi tanga vari na mane, ki vivi: “Igo ko pe taheê inê!” Se i vivi: “Igo ko hite!”

¹⁷I page arihu, ma na vapuna i Libanone ki page vora re na mu, ma hemuri ki page vapuga aporo.

¹⁸Igê na matena ngekana na enoni i pungu na karingata ka page rongoa igê na buka, ga tomania tangara. Na enoni, ga guru taropuru, ka page rite ma ki marava na maata.

¹⁹Na enoni haritagi ka page vagevagesia aporo na Araha, ma na enoni matareha ka page obakoro aporo renia God, na Isiraelita ka rahesia.

²⁰Ka page magahuru na ani ga hagamamasiagara na enoni getera ma ka ruhia God, ma na enoni hato, ga erataga, ka page mutemute.

²¹God ki page hagaerasira ngavê na ani, ga hagatoraira na enoni getera, ma na ani, ga roherohe pusira na enoni era, hanana siana ka hagaitangira meni na bagatarihata, ma na ani ga tohetohe vero, hanana na enoni koro ka pe tarahugi na marâ i oto tangara.

²²Tahema na Araha, i hagatahia o Abaramo, ki tamasi tangara na raraha iana o Jakobo, ki vi: “Kariaku, igamu ki hato, vigamu page maki, ma ki hato, vige page arikuku na maami.

²³Matena mu bâsira na karemi, gê page vategamu, igamu kamu page aitangisiê, vi inê ki na Araha God iata na Isiraelita. Igamu kamu page hagarahasiê ma kamu page hagahigasiê ngavê.

²⁴Na enoni, ga bonobonoga, ka page bâ hagagara, ma na ani, ga heheriga, ka page ageagesia na hagesuringa.”