Read Kahua ISAIA 3 Bible Online

ISAIA 3 - Kahua bible

ISAIA 3

¹Bâ, na Araha, na Araha raramohaga hunia ki sugi hagamagahurura na enoni raha ma na ara ni marâ hato, na ai ni Jerusaleme me Juta ka hagêgurira. Tenira ngaira ngaia ki page hagamagahurura na ngêra ma na ve iata,

²na meraha ma na mane ni me iata, na mane igê na kotiha ma na poropete iata, na mane ni matuha ma na maneraha iata,

³na maneraha ni me ma na gavumane iata na mane ni hagaotonga ma ngaira hato na enoni, ga haritavo ma ka marumaru.

⁴Na Araha ki page nakara na kere mane, ga pe tako bâkoro mênga, ka bêngenira na enoni.

⁵Na ara ni enoni ka page hagamamasiagara mareta heri. Na enoni haoru ki asa, vige page hagahigasira na bani nuni, ma na enoni purua ka page guguruga tangara na enoni raha.

⁶Igê na matena ngekana na raraha ki page vi tanga so na goana, ki vivi: “Igo ko nahunia mênga na gahu. Vikê gu bêngenigami igê na bagabevoani ngegê.”

⁷Ma ngaia ki page arami, ki vivi: “Inê kê usi! I bara vê! Inê kê pe girara, vi ve tamanigamu. Inê ka pe tongasiê nogaku na gahu ma na ngêra. Inê kê usi, ve bêngenigamu.”

⁸Ua, i page era ngavê tanga i Jerusaleme! Juta ki vota. Ngaira ka erasia na Araha renigi na tamasinga hato iata ma na bagaparongata. Ngaira ka guguruga bâraha tanga God.

⁹Na têheniana iata ki page erasira so mareta. Ngaira ka tasitasi mave mangara na ai ni Sotomo. I page era ngavê tangara surigi na tauhata mareta.

¹⁰Na enoni, ga koro ma ka oto, ka page babarisi, suria na ara ni marâ ka page râ bâkoro tangara. Ngaira ka page vagevagesigi na marâ, ga tagara tange.

¹¹Ma ki page era ngavê tangara na enoni erataga, suria ga page mamasiaga renigi na tarani, ga katogi tangara na enoni getera.

¹²Na enoni, ga tagarenigi na haga hagaba, ngaira ka hagamamasiagara na kariaku. Ma na ani, ga vatera na kaone, ka hagabekasira. Kariaku, na maneraha iami ka bêgamu bera. Tahema igamu kamu tako tugupu.

¹³Na Araha ki aharaga igê na kotiha, hanana i tamasigi na suriha iana renira na kariana.

¹⁴Na Araha ki ranganira na meraha ma na maneraha iata na kariana. Ngaia ki tamasi vikê tangara, ki vi: “Igamu nga kamu hanago igê na mu ni vaini, ma kamu erasia. Na marâ, mu bani hanagogi tenira na enoni matareha, ka aharêsigamu i ruma iami.

¹⁵I oto tangagamu vari, vigamu purira so na kariaku? I oto tangagamu vari, vigamu hagamamasiagara na enoni matareha? Ngaia kani gê visia, inê na Araha God raramohaga huniê.”

¹⁶Na Araha ki vi: “Bâ, na gete i Jerusaleme ka ura haha ngavê. Ngaira ka arâ paroparo. Ngaira ka amane tare. Ngaira ka arâ ririgenigi na kâta. Na tete ka angarangara i ugata.

¹⁷Ma inê be hagaitangira. Inê be goro bê hurira, ke rupaturi ma ke maki.”

¹⁸Igê na tangiana ngekana na Araha ki page tavogi râ igê tenira na gete i Jerusaleme na ara ni maheta hato, ga paroparo renigi: na tete i ugata, na tarepuri ma na tahi,

¹⁹na mamahe ma na bangabanga ni rima,

²⁰na gahu i bêta ma na rarasê, na ebo i rimata ma na garo bara,

²¹na ringi i kakêta ma na eburungi i barisuta,

²²na gahu, na tuguni ma na aruhata, ga bâkoro, ma na kere kato ni haga iata,

²³na tuguni maraherahe, ga bâsira ma igê, ma na gahu siki, ma na gahu, ga hogotenigi i bêta ma i riota.

²⁴Vige sigini koro, ma hete ga sigini era. Vige hogotenigi na garo bara, ma hete na ataka ma vê na varo. Vige bâkoro na varehuta, ma hete i gura na bêta. Vige tuguni bâkoro, ma hete na tarisigani na gahu. Vige bâkoro, ma hete na makiha.

²⁵Gete ni Jerusaleme, na mane iami ka page meme igê na hearihatana, naka ma ga ramo teha na mane ni me iami. Igamu kamu page angi ma kamu angiangi maramara igê na mahera na hinua iami.

²⁶Ma na hinua hagenani ki page manga na gete, i oga so rupaturi i ano ma ki angi, suria na hinua ki hihiruga.