Read Kahua ISAIA 32 Bible Online

ISAIA 32 - Kahua bible

ISAIA 32

¹Ta na tangiana ki page oga na maneraha, i page marungira na kariana igê na otoha. Ma na enoni raha igê na gavumane ka page kato vikana nogata.

²Na ara ni hitangita ki page manga na mamaruku pusigi na roga ma na tangi era. Ngaira ka page mangagi na ve oto, ga gogogo igê na masusu avagavaga, manga na mamarugana na hê raha igê na bagamanihê raha.

³Ngaira ka pe tê pusigi na maata, se vige bunigi na karingata, suria ga obania viga giraragi na ta ka visigi na enoni.

⁴Ngaira ki hato, vige page tê hurahura, ma ka hahutugigi i nago hete, ma ka pe bubuhigi pinihi na marâ.

⁵Na enoni, i bonobonoga, ki hato, vige visia, vi ngaia ki tako mataha. Na enoni ni hagaparunga ki hato, vige visia vi ngaia ki tamasi monari.

⁶Na enoni bonobonoga ki tamasi bekabekaga ma, ma ki takusigi ma na tarani, ga era. Ngaia ki guguruga tanga na Araha ma ki tamasi erasia. I asa iana, vige hagangêra na enoni, ga magê, se vige hagatonomira na ani, i mamata na riota.

⁷Na enoni ni hagaparunga ki erataga ma ki katogi na katoha era. Ngaia ki harikato renira na enoni matareha, ma ki hagahagaparura ma ki hagabarasira, hanana siana ka tarahugi na tarani, ga oto tangara.

⁸Ma na enoni koro, i tako mataha, ngaia ki koro ma ki oto na parongana ma ki nganganihaga tare igê na otoha.

⁹Igamu na gete mu oga suri barisumi, mu karingê! Igamu na gete haoru mu tako bare, mu rongoê!

¹⁰I ngekê vari igamu kamu pe hinahinaru. Na ararina i ngekê i na harisi haoru igamu kamu page tugupu ngavê, suria ga mareha na guani na vaini, hanana vigamu husihusi.

¹¹Igamu na gete mu oga suri barisumi ma kamu tako bare ma, mu tatata ma kamu bubununuga. Mu tasigi râ na gahu koro iami, ma kamu hagesuru renigi na tarasigani.

¹²Mu apeape ruruhi, suria na mu igê na mako koro ma na pariki ni vaini ka era ngavê.

¹³Na tone ma na rauga era karu rubuhigi na mako hagenani iata na kariaku. Mu angisigi na hinua ma na ruma, ga magahuru henira na enoni, ga obakoro igê.

¹⁴Na ruma raha iana na maneraha ki page baguru, ma na hinua raha ki page hihiruga ngavê. Na bebetehe ma na ruma nganganihaga ka page aruhuruhu. Na tonki vasiga ka page oga igê, ma na totoha ni sipi ka page ngêngê igê.

¹⁵Ma God ki page angarigia aporo. Na mako era ki page vora re na mako koro, ma na mu ka page ganora ngavê.

¹⁶Surigi na ara ni hinua hato, naka ma na ani raha se sisite, na enoni igê ka page paronga koro ma ka otooto ma ka page nganganihaga igê na otoha.

¹⁷Tahema na marapeha ma na ramana karu page gâga nga, ki bê ki arâ.

¹⁸Na kariana God ki hato, vige page anumanuma, ma ka page apeape haritagi ma ka page asitatara hete. Ngaira hato na enoni ka page obakoro, suria na rangi ki katogi na mu, ka ganora bâkoro ngavê, ma na go ka aharêsira na tonki ma na puruka. Ma na rangi anumaga ma na rogaroga ahuru ka page hagaerasia ngavê na mu iata na merongata, ma na hinua iata ki page aruhuruhu ngavê.