Read Kahua ISAIA 33 Bible Online

ISAIA 33 - Kahua bible

ISAIA 33

¹I page era ngavê tangara na merongaka. Ngaira ka banga ma ka hagahagaparu, naka ma i mareha ta na enoni, vige hanago tenira se hagaparura. Ma ki page hato na matena ni hanagoha ma ni hagaparunga iata, ma na tarani ngegana ka page apariri bê aporo me tangara mareta hete.

²Araha, gu takuigami. Igami kami raruni togo renigo. Gu anumasigami i na ara ni tangiani, ma ku hagatahigami tenigi na bagabevoani.

³Matena go ramo pusigami igê na hearihatana, na merongamami ka gava.

⁴Na enoni ka henahuraugi na nahuninga iata manga na ruruha ni pê ga hagavato tangagi na mu ma ka sinogi vê na ara ni mu hato.

⁵Na Araha ki raramohaga hunia. Ngaia ki marungira na ara ni marâ hato. Ngaia ki page katora na ai ni Jerusaleme, ka paronga koro ma ka otooto i maana, ma ka nganganihaga igê na otoha,

⁶ma ka gâga igê na ramana. Ngaia ki page anumasira tare na kariana ma ki page vatera renigi na takoha mataha ma na giraraha. Na tarana i raha ngavê tangara ki na hagahigasiana na Araha.

⁷Na mane ramo ka avaravara. Na enoni, ga tarohenia na komaniha, ka angiangi bâraha.

⁸Na tara raha ka hagamamakuku ma na enoni ka magutenigi. Na enoni ka pe hagamonarigi na suruheri ma na suruha iata. I bâ manga na enoni ki na marâ purua ma.

⁹Na mu ka tâ purua ma ka pe ganora. Na vapuni i Libanone ka maria. Na maruguna ni mako koro i Sarone ki bâ manga na masusu avagavaga. Na apinige i Basani ma igê na hungana i Karamele ka turi tanga ga maria.

¹⁰Na Araha ki vi tangara na merongana, ki vi: “Hoi, i ngekê nga! I mareha ve hagarihu! Inê be hagabângenia tangagamu, vi inê kê raramohaga teha.

¹¹Igamu kamu katogi na katoha purua ma, ma kamu hagavoregi ma na roro. Na raramohaku ki manga na gi, i page ngaugamu.

¹²Igamu kamu manga na ahu, ga sungia ki makahukahu, se mangagi na tone, ga retegi ma ka sungigi.

¹³Igamu na merongaku igê na agua, na ani hagarangi se hagatê, mu giraragi na tauhaku, ma kamu aitangisiê, vi inê kê raramohaga huniê.”

¹⁴Na enoni i Sione, ga erataga, ka magutenia God ma ka bubununuga, ka vi: “God ki manga na anguruna na gi, i tarê tare. Ti na hitangika ki girara, i tahitahi tenia?”

¹⁵Na enoni, i paronga koro ma ki otooto ma ki tamasi monari tare, ngaia kani girara i tahitahi. Siana kamu hagabekasira na enoni matareha. Siana kamu aganarigi na vatevate, se na haga renigi ta na tarani era getegi. Siana kamu hakunira na ani ga harikato, viga nahunahu enoni, se renigi na eraha getigi.

¹⁶Vikana igamu kamu page tahitahi. Igamu kamu page asitatara manga vi igamu gâga igê na ruma nganganihaga ngavê. I asa vige page hato tenigamu na ngêra ma na ve.

¹⁷Ta na tangiana igamu kamu page bâsia igê nikâ na maneraha, i raramohaga ma ki hahaneaga, ma ki marungia na agua, i raha teha ngavê.

¹⁸Igamu kamu page takusira aporo na enoni, ga bani hagamagusigamu i nago, ma kamu vivi: “I he nga na enoni ga totora takesi tenigia? I he nga na merongaka ga hahutugigia pinihi?”

¹⁹I hato, vigamu page bâsira nikâ na ai mahuara, ga ruhigamu ma ka tamasi igê na tamasinga, mu pe giraragi ma ki râ getegi.

²⁰Mu bâsia i Sione. Ngaia ki na hinua mu hakuhaku tare igê tange na tangiani raha ni rotu. Mu rigia i Jerusaleme. Ngaia ki na hinua i oga suri parongana, hanana viga gâga igê. Ngaia ki manga na ruma, i nganganihaga ma ki gâga tare. Na u i asa hagetage, vige page kakaga. Ki asa hagetage, vige page ahari na gerina.

²¹I ngekana na Araha ki page hagabâsigia igê renia na raramohana raha. I Sione, na hinua iaka, ki oga igê na papani na ve, na ani raha ma na ani sisite. Na haka ni me iata na merongaka ki bara vige râ me igê.

²²Na varo hato igê na haka ngegana ka gugubaga, ma ki bara vige oke gagasigi na selo. Igia ka page tonganigi na nahuninga ma na ruruguha hato iata na merongaka. Na ruruguha ma na nahuninga ngegana ka upuga teha ngavê. Naka ma na enoni, i abogo ma ki atata i hemuri, ngaia ki girara i torea na apanena iana, i araria. Na Araha ngaia marena ki page hagaotogia, ma ki page marungigia ma ki page anumasigia.

²⁴Ma ki hato vige page maeha nikâ ta na enoni i pasika. Ma God ki page bonotenigi na tasi hato iata na enoni i ngekana.