Read Kahua ISAIA 34 Bible Online

ISAIA 34 - Kahua bible

ISAIA 34

¹Râ me, igamu hato na agua, mu pe rahesia na Araha. Haku me kamu karinga na agua hato i maveta hagenani. Mu aretaku me ma kamu rongo.

²Na Araha ki mangariaga bâraha tangara na agua, ga pe rahesia. Ngaia ki oba era ngavê tangara na mane ni me iata. Ngaia ki page nahuira ma ki page mutera.

³Na gahuta ka page tâtâ totoko, ma ka page arata maramanu, ma ka page mapu ngavê. Na gaputa ka page tata aberabera igê na hungani.

⁴Na arito, na hageha ma na higu ka page magahuru. Na vavearo ki page magahuru manga na pepa ga rumia. Na higu ka page anunu mangagi na ahani na apinige na vaini se na fiki.

⁵Na Araha ki bani tahurungenia i vavearo na tatapa borahu iana. Ma i ngekê ngaia ki so me, hanana i tahurua nikâ i Etome, suria i obania, vi mutera na enoni i ngekana.

⁶Na tatapa borahu iana ki page gagapuga renigi na gaputa ma na êbeta, manga na gaputa ma na êbeta na sipi ma na goti, matena ga vogasi renira. Na Araha ki page vogasi vikana i hinua i Bosera ma ki page katoa na henahuita raha i Etome.

⁷Na enoni ka page meme igê mangara na puruka vasiga, se mangara na puruka mane ga ramo, ma na gaputa ma na êbeta ka page anuia na agua.

⁸I ngekana nga na matena tanga na siva iana na Araha. Ngaia ki page hagatahira na ai ni Sione, ma ki page nahuira ka meme na merongata.

⁹Na ve i Etome ka page vora re na engisi, ma na mako ka page vora re na hê i karekare ni sivi. Na agua hagenani ki page nonoro manga na engisi.

¹⁰Ngaia ki page tarê surigi na tangiani ma na bungiani. Na asêsuna ki page akê tare. Na mako ki page bêratega ma ki page avagavaga tare, ki bê ki arâ. Ma ki asa ta na enoni, vige page aharêvoro nikâ igê.

¹¹Na ko makukuni ma, ma na tehe ka page gahuia. Na Araha ki page katoa na marê, ki mamao aporo manga i nago kere vê noga.

¹²Mareha ta na maneraha, hanana vige marungia na agua. Na enoni raha ka mareha vê nogata.

¹³Na tone ma na rauga era ka page rubuhigi na ruma raha ma na hinua henigi na para, nga noga ma na o vasiga ma na ko makukuni ka page ogasia.

¹⁴Na marâ vasiga i bemu ka page arârâ i nekana. Ma na ataro igê ka page ngirira heri. Na ataro ni bungiana ki page garia na agua i mamaro igê.

¹⁵Na ko makukuni ka page beabea i ngekana, ka page aoru, ka page abahigi na oruta ka page putagigi ma ka page hagangêra na kareta. Na ahetaronga ka page arâ me tatage ma ka hakuhaku i ngekana.

¹⁶Mu bâ i rarona na buka iana na Araha renira na marâ mamauri i maveta, ma kamu page tarahua, vi na ara ni marâ hato ngegê ka page oga i ngekana, ani mane ma na ani hehene. Na Araha ki naka vikana ma ki hakura.

¹⁷Ngaia nga na Araha ki votoa na agua tangara na ara ni hitangita ki nahunia na agua iana. Ngaira ka page nahunia na agua tare ma tarema, ma ka page gâga hagahu igê.