Read Kahua ISAIA 37 Bible Online

ISAIA 37 - Kahua bible

ISAIA 37

¹Matena o Hesekia ki rongora, ga hagarongoa, ngaia ki tarisia râ na tuguni iana, suria i hata era na obana. Ngaia ki hagesuru renigi na tarisigani na gahu, ma ki banu igê na Ruma ni Rotu iana na Araha.

²Ngaia ki hagaguhira o Eliakimo, i bâsuria na ruma iana, mo Sebena na mane segesege igê na kotiha, ma na bani mane ni hagarahenga tanga na poropete o Isaia, karena o Amose. Ngaira hato ka hagesuru renigi na tarisigani na gahu.

³Ngaira ka vi vikê tanga o Isaia, ka vi: “O Hesekia ki vi, ‘I ngekê ki na matena ni mamasiaganiha, ni hagaitangiha ma ni makiha. Igami kami manga na gete i riki na gerina ma ki bara vige apara, suria i pe ramo na apena.

⁴Na maneraha teha i Asiria ki hagatorangenia na maneraha ni me iana, hanana i tamasi erasia God mamauri. I arari ma, vi na Araha God iamu ke rongogi na guhata ngegê, ma ke hagaitangira renigi na ani ga tamasi vigana. Tahema gu nungia God tangagami na ani mi tahitahi mêngagami.’”

⁵Matena o Isaia ki rongoa na tamasinga iana na maneraha o Hesekia, ga torea me na kariana,

⁶ngaia ki vi tangara, ki vi: “Mu hagarongoa o Hesekia, vi na Araha ki vi, ‘Siana ko magutenigi na tamasinga iana na maneraha teha i Asiria, i vi, vi i asa iaku, ve hagatahigo.

⁷Bâ, inê be katoa, ke tongesuria ta na rongoha, hanana ngaia ki page aporo i pasina, ma ka page nahuia igê ki meme.’”

⁸Na maneraha ni me ki rongoa, vi na maneraha teha i Asiria ki bani pania i Lagisi, ma ki meheariha na hinua i Libena i ngekana. Vikê ngaia ki râ i ngekana, hanana i rongo tarana i pasina.

⁹Na ai ni Asiria ka rongo, vi o Tirihaka, i marungia i Etiopia, ki bêngenira na mane ni me i Esipito, hanana viga meraheariha. Matena na maneraha teha i Asiria ki rongo vikana, ngaia ki hagatorangenia na tamasinga tanga o Hesekia, na maneraha i Juta.

¹⁰Ngaia ki vi tanga o Hesekia, ki vi: “Siana ko tongesuria na ataro, go hagarapea. Ngaia ki hagabekasigo, ki vi, vi na maneraha teha i Asiria ki bara, vige henahuraua i Jerusaleme.

¹¹Bâ, igo ko bani girara na tarana, i katoa na maneraha teha i Asiria tanga na ani ma vê na agua, i obania vi hagasuhia. Go takusia vari, vi igo ko girara go tahitahi tenia?

¹²Na uvariku ka bani hagasuhigi na hinua i Gasani, i Harani ma i Resepe, ma ka bani mutera na ai ni Beteteni, ga oga i Telasare. Ma na harasita ki asa, vige hagatahira.

¹³I he ngaira nga na maneraha surigi na hinua i Hamata, i Arapata, i Vepavaimi, i Hena ma i Iva?”

¹⁴O Hesekia ki tavoa na leta tenira na mane tora tamasinga, ma ki tomania. Ma hemuri ngaia ki râ i Ruma ni Rotu, ma ki naka na leta i maana na Araha.

¹⁵Ngaia ki nunginungi, ki vi:

¹⁶“Araha raramohaga hunigo, God iata na Isiraelita, igo ko oga bê vato renira na ani ga tonga gagahata. Igo getego ma ko God. Igo getego ma ko Araha tangara na maneraha hato i maveta. Igo ko hagavorarerua na vavearo ma na ano.

¹⁷Araha, gu karinga, ma ku aganarigami. Araha, gu bâsigi na tarani ga tarahugami. Gu takusigi na tamasinga iana o Senagaribi, i guharigo renigi. Igo nga nga na God mamauri.

¹⁸I monari, Araha, na maneraha teha i Asiria ka bani mutera rako na enoni igê na agua getigi, ma ka bani hagasuhigi na agua ngegana.

¹⁹Ngaira ka bani sungigi na nunuta na harasita. Ngaira ka mareha vi na ataro. Ngaira ka na apinige ma na hê purua ma, ga tagarahigi. Tahema i pe bara, vige sungigi.

²⁰Vikê, Araha God iamami, gu hagatahigami tenira na ai ni Asiria, hanana na enoni hato i maveta ka page girara, vi igo getego ma ko God.”

²¹Ma hemuri o Isaia ki kasia na tamasinga tanga na maneraha o Hesekia, ki vi: “Na Araha God iata na Isiraelita ki vi, ‘Igo ko avarasiê, vigê rêra pusia o Senagaribi, na maneraha teha i Asiria.’

²²Ikê nga na aramiha iaku: “Jerusaleme ki ruhigo, ki rurusigo, ma ki manavatenigo, suria go gava.

²³“Go takusia vi o ti kanigo tamasi erasia? Go takusia vi o ti kanigo guharia ma ko ruhia? Igo ko guhariê, inê na God apuna teha ngavê, na Araha raramohaga huniê iata na Isiraelita.

²⁴Na tamasinga iamu, ga torea me na kariamu, igo ko tamasi paroparo, ko vi, ‘Henigi na kati ni me iaku inê kê tagere igê na barani i Libanone. Inê kê tapigi so na apinige igê, na ani ga borahu ma ka koro ngavê. Inê kê arâ hagatê ngavê i toro.

²⁵Inê kê oparigi na ve karu ma kê totono igê. Inê kê puria râ na ve i Esipito ma ngaia ki mamata ngavê.

²⁶“Hoi, Senagaribi, i hega? Igo ko pe bani girara vari, vi inê kê bani kato renigi na tarani ngegê i nago kere vê noga? I ngekê inê kê akê me henigi. Inê kê hagamarumungenigo, hanana go ruhuruhugi na hinua nganganihaga.

²⁷Na enoni igê ki bara tangara. Ngaira ka bubununuga ma ka tugupu ngavê. Ngaira ka mangagi na go i mu, se na rauga, ga akê i gerina na ruma, ma ka maria, matena igê na arito ru.

²⁸“ ‘Inê kê girara erasigo ngavê, naka ma na marâ go katogi, naka ma i he ko arâ igê, naka ma go mangariaga ma ko guhariê.

²⁹Suria igo ko tamasi erasiê ngavê ma ko paroparo bâraha, tahema inê be naka na ringi i barisumu ma be barogo manga na hosi, ma be oke paririgo aporo tanga na agua go râ me igê.’”

³⁰Mo Isaia ki vi tanga o Hesekia na maneraha, ki vi: “Ikê nga na girarana na tarana, i page voravora me. I na harisi ngekê ma i na ani i muri me igamu kamu page ngêngê ma na marâ, ga akê mareni i bemu. Ma na harisi i muri vê igamu kamu kahu hasihasi ma kamu kahu opaopa, ma kamu kahu ngaugi na vaini, mu hasigi.

³¹Na ai ni Juta, ga tahitahi mêngara ka page mangagi na apinige ni ngêra, ga vagavagaraga bâkoro ma ka hunguhungu.

³²Renia na enoni, ga tahitahi mêngara, ka page tataka tenia i Jerusaleme, tenia na hungana i Sione. Na Araha raramohaga hunia ki togeaga, hanana i voravora me na tarana ngekana.”

³³Tahema na Araha ki vi: “Na maneraha teha i Asiria ki asa, vige page henahuraua na hinua ikê, se vige page hanasia renia na apena gi tage ma na mage. Na mane ni me ki asa hagetage, vige page kari me hagarangia na hinua henigi na bêata iata. Ki asa iata, vige page rapia.

³⁴Ngaia ki page aporo suri ugana, ma ki asa vige page henahuraua na hinua ikê. Ngaia kani gê visia, inê na Araha.

³⁵Inê kê page roherohe pusia na hinua ikê, ma kê page anumasia, hanana gê hagabângenia na raramohaku ma kê hagamonaria na suruha iaku tanga o Tavite na kariaku.”

³⁶Na angero iana na Araha ki banu igê na tênga iata na ai ni Asiria, ma ki nahuira ka me na mane ni me 185, 000. Matena i tangi mahogo, ngaira ka me hagetage ma ka tâ totoko na gahuata.

³⁷Ma hemuri o Senagaribi, na maneraha teha i Asiria, ki apariri aporo tanga i Nineve.

³⁸Ta na tangiana ngaia ki vogasi igê na ngêsu tanga na Nisirogo na harasina. O karena gi rua o Atarameleki mo Saresere karu nahuia ki me renigi na tatapa borahu iaterua, ma hemuri karu gava tanga na marê i Ararata. O Esahatone, tani o karena, ki urusia ki maneraha teha.