Read Kahua ISAIA 39 Bible Online

ISAIA 39 - Kahua bible

ISAIA 39

¹Igê na matena ngekana na maneraha i Babilonia o Merotaga Balatana, karena o Balatana, ngaia ki rongoa, vi na maneraha o Hesekia ki maeha ma ki bani komaga aporo. Tahema ngaia ki hagatorangenira na mane tora tamasinga henigi na leta ma na mahatanga iana tanga.

²O Hesekia ki unira banu, ma ki hagabâsira renigi na ruruguha iana: na siliva, na golo, na ngêra, na oile koro ni olive, na tangaruha hato, ma na ara ni nahuninga iana. Mareha rârâ ta na marâ igê na ruma raha iana se igê na agua hagenani, vige pe hagabâsira renigi.

³Ma hemuri na poropete o Isaia ki râ i pasina na maneraha o Hesekia, ma ki hagatea, ki vi: “Na mane ngegê ka râ me tenia i he? Na ta ka visigi tangago?” O Hesekia ki arami, ki vi: “Ngaira ka râ me hagatê, tenia i Babilonia.”

⁴O Isaia ki hagatea nikâ, ki vi: “Na ta ka bâsigi i ruma raha iamu?” Ma ngaia ki arami, ki vi: “Ngaira ka bâsigi na ara ni marâ hato i ruma iaku. Inê kê hagabâsira renigi na ara ni marâ i ruma iaku.”

⁵Mo Isaia ki vi tanga o Hesekia, ki vi: “Na Araha raramohaga hunia ki vi,

⁶vi i ta na matena i muri me na ai ni Babilonia ka page henahuraugi na ara ni nahuninga ma na ruruguha hato i ruma raha iamu, na ara ni marâ hato na uvarimu ma igo kamu bani rurugi me mataro me i ngekê, ma ka page toregi vê tanga i pasita. I asa ngavê vige page hita so ta na marâ.

⁷Ngaira ka page torera vê nikâ tani o karemu, ma ka page voera, hanana ga tagara i ruma iana na maneraha i Babilonia.”

⁸Na Maneraha o Hesekia ki takusia ma, vi na tamasinga ngekê ki vi, vi na marapeha ma na ramana suria na matena iana, i tahitahi mênga. Tahema ngaia ki arami, ki vi: “Na tamasinga iana na Araha, go hagarongoê renia, ki koro era.”