Read Kahua ISAIA 40 Bible Online

ISAIA 40 - Kahua bible

ISAIA 40

¹God ki vi: “Kanukanura na kariaku! Kanukanura!

²Haganaku parongata aporo na ai ni Jerusaleme. Hagarongora, vi na mamasiaganiha iata ki hato, ma na tasi iata inê kê bani bonotenigi. Na ara ni hagaitangiha ki hato, suria ngaira ka kasi meni renigi na tasi iata hatohato.

³Ta na ngerengereha, i vi: “Rikia na tara igê na masusu tanga na Araha! Hagarêa na tara igê na bagamanihê raha tanga God iaka.

⁴Ahunigi na ara ni maruguni hato. Hagahataragi na ara ni hungani ma na barani. Na hungani ka page benaga. Na tara sutasutaga ka page manamanaga.

⁵Na Araha ki page vora me igê na bâbâhana ma na raramohana raha. Na enoni hato i maveta ka page bâsia. Ngaia marena na Araha kani visia.”

⁶Ta na ngerengereha, i vi: “Tarohenia na taroha!” Inê kê hagate, kê vi: “Na taroha ta?” “Gu tarohenia, vi na enoni hatohato ga mangagi na go. Na bâkorohata ka mangagi na takani na mahe, ka maugu rêrê.

⁷Na go ka marama, ma na takani na mahe ka maugu, matena na Araha ki raravaigi. I monari, na enoni ka mangagi na go.

⁸Ua, na go ka marama ma na takani na mahe ka maugu. Nga noga ma na tamasinga iana na Araha ki asa hagetage, vige page hato.”

⁹Tagere igê na barana, ma ko tarohenia igê na taroha koro tanga i Jerusaleme. Ngerengere raha, ma ko tarohenia na taroha koro tanga i Sione. Tamasi raha! Siana ko magu! Hagarongogi na hinua i Juta, ko vivi: “Bâ, God iami ki râ me noga!”

¹⁰Bâ, na Araha God ki râ me noga. Ngaia ki hahaneaga ma ki raramohaga teha ngavê. Ngaia ki torera me na enoni, i bani hagatahira tenia i Babilonia.

¹¹Ngaia ki page marupera na kariana, manga na mane i marupera na sipi iana. Ngaia ki page rurura haku me na kareta na sipi, ma ki page topera i rimana, ma ki page hagaotora maninga kenata.

¹²Ti ki girara i apea na asi hagenani i na ababa ni rimana? Ti ki girara i kikihua na vavearo? Ti ki girara i naka na maveta hagenani i rarona na kâkâ? Ti ki giraragi na higahigani na barani ma na hungani?

¹³Ti ki girara i hagaotoa na Araha? Ti ki girara i hagesuria se ramatenia na Araha?

¹⁴Ti ki girara i hagamaraka obana na Araha? Ti ki girara i hagesuria renigi na tarani ga oto? Ti ki girara i vatea renia na giraraha? Ti ki hagagirara renia na takoha mataha?

¹⁵Tanga na Araha na enoni hato i maveta ka manga na marâ purua ma, manga na êsusu gi tage na ve. Tanga ngaia na agua raha ka manga na akuhukuhu ma.

¹⁶Na ara ni marâ hato, ga mauri igê na vapuni i Libanone, ma na ario hato igê ka pe araria, vige susu tanga God renigi.

¹⁷Na enoni i maveta ka manga na marâ purua ma tanga.

¹⁸Ti ki girara i hagararia marena renia God? Ti ki girara manga i he God ki bâ?

¹⁹Ngaia ki pe manga na nununa na ataro, na enoni ga tagarahia renia na golo, se ka hagamahea renia na siliva.

²⁰Na enoni matareha ki atea na apinige na bagora ma ki garia ta na enoni, i girara i tahetahe, ma ki nungia ki tahea renia na nununa na ataro, i pe girara, vige apuri.

²¹Igamu kamu pe girara vari? Igamu kamu pe hagare vari? Ga pe bani hagarongogamu vari renia na haganegahana? Igamu kamu pe bani rongo vari, vi manga i he na maveta ki haganega?

²²Na ani, i oga igê na atohana, teharirerua na vavearo ma na ano, ngaia nga ka na ani i hagavora na maveta. Na enoni i ano ka tarotaromega mangara na sisi. Ngaia ki gasia na vavearo manga na gahu, manga na ruma na gahu ga âga igê.

²³Ngaia ki hagavotarira na maneraha, ga raramohaga, ma ki katora ka manga na enoni purua.

²⁴Ngaira ka mangagi na rauga, ga ririki ma ka pe vagavagaraga bâkoro. Manga na Araha, ma ki raravaigi, ngaigi ki marama, ma na maguara ki ahegenigi râ.

²⁵Ti ki manga God Apuna? Ti ki maratorana?

²⁶Mu bâ kê i vavearo! Ti ki hagavoragi na higu mu bâsigi? Na ani, i hagaotogi manga na maneraha ni me, ngaia nga ki girara, vi gi hita kani ngaigi, ma ki girara na atana na ara ni hitangini. Na raramohana ki raha teha! Ngaia ki unigi, ma ki asa vige bâ tihia tani.

²⁷Isiraelita, renia ta mu hagagege, kamu vi, vi na Araha ki pe hagaregi na mamasiaganiha iami, se i pe botage renigi na marâ, ga oto tangagamu?

²⁸Mu pe girara vari? Mu pe rongo vari? Na Araha ngaia ki na God, i gâga tare nga, ki bê ki arâ. Ngaia ki hagavora na maveta hagenani. I asa iana, vige me na apena, se vige marumarusiga. Mareha ta na enoni, vige aitangisigi na mangatana.

²⁹Ngaia ki hagaramonira hete na ani, ga marumarusiga ma ka mameaga.

³⁰Naka ma na ani na gapu haoru, ngaira nogata ka girara ga marumarusiga ma ka bagameme.

³¹Ma na ani, ga hagêguri togo renia na Araha ma ka avarasia, ngaira ka page ramoramo aporo. Ngaira ka ama ni gagêmaga nga, mangara na ahetaronga ga aheahe. Ngaira ka tangotango, ma ki asa vige mangumangusiga. Ngaira ka arârâ, ma ki asa vige beto.