Read Kahua ISAIA 41 Bible Online

ISAIA 41 - Kahua bible

ISAIA 41

¹God ki vi: “Igamu na agua hagatê, mu muni! Mu karingê! Mu nanê, hanana mu roherohe pusia na apanena iami. Mu aharaga, kamu tamasi. Ge hagaotogi na marâ.

²“Ti ki katoa, ki arâ me tenia i kerekê na maneraha ni me i teha? Ti ki katoa, ki tehateha tare igê na ara ni agua, i heariha igê? Ti ki katoa, ki henahuraugi na agua? Ti ki katoa, ki purira so i ano na maneraha? Ngaia ki nahuira renia na tatapa borahu iana, ka me ka tâ i ano mangagi na roro. Ngaia ki hanasira ma ki sikirenira, manga na roga i ahegenigi na rauga maria.

³Ngaia ki tarigenira, ma ki ama ni arâ tatarasi nga surira. Ngaia ki tango teha vê, manga i gaha.

⁴Ti ki katoa, ki vora me na tarana ngekê? Ti kani bani nakagi me vigana tenia na haganegahana tanga i ngekê? Inê nga na Araha, kê bani oga me igê na haganegahana. Inê nga na Araha, kê page gâga mênga i murina na hagahatungina.

⁵“Na enoni surigi na marê hagatê ka bani bâsia na mane ni me ngekê i teha. Ngaira ka magu ma ka bubununuga. Vikê ngaira ka haku me.

⁶Na enoni, ga girara ga tahetahe, ka hetamani ma ka haganganira heri.

⁷Na ani, i tahea na nununa na ataro, ki hagangania na ani, i parua renia na golo. Na ani i katoa ki mamao, ki hagangania na ani i ratorato. Ngaira ka vi, vi na puru ki koro ngavê. Ngaira ka rapusia igê na atohana, hanana siana ki apuri se i votavota.

⁸“Ma igamu na Isiraelita na kariaku, igamu nga ka na ani gê bani ategamu tangê mareku, igamu na raraha iana o Abaramo, na kariaku koro.

⁹Inê kê bani toregamu tenigi na agua hagatê era i maveta. Inê kê bani unigamu me tenigi na hinua hagatê ngavê i maveta. Inê kê visigamu, vi igamu nga ka na kariaku. Inê kê pe bani kitenigamu, ma kê ategamu hete.

¹⁰Siana kamu magu! Inê kê ngahisigamu. Inê nga ki na God iami. Siana kamu magutenia ta na marâ. Inê be hagaramonigamu ma be tamanigamu. Inê be anumasigamu ma be hagatahigamu.

¹¹“Bâ, na ani ga mangariaga tangagamu inê be teharira ma be hagamakira. Na ani, ga megamu heariha, ka page meme,

¹²ma ka page magahuru tenia na maveta. Naka ma mu garira, ki asa, vigamu page tarahura.

¹³Inê nga ki na Araha God iami. Inê kê hagaramonigamu, ma kê vi, ‘Siana kamu magu! Inê be tamanigamu.’”

¹⁴Na Araha ki vi: “Igamu na Isiraelita, naka ma mu pe rako ma kamu pe ramo manga na ngêngêrio, siana kamu magu! Inê kê tamanigamu. Inê, God Apuna i Isiraele, inê nga kani gê hagatahigamu.

¹⁵Inê be katogamu, kamu manga na kêke, na ani haoru i masi na rivona. Igamu kamu page garasigi na barani, ka amenamena ma kamu page katogi na hungani ka maromoromo.

¹⁶Igamu kamu page kasikasi akê ma na roga ki page rogatenigi râ, ma na maguara ki page ahegenigi vê. Igamu kamu page vagevagesiê, inê na Araha, ma kamu page hagarahasiê inê God Apuna i Isiraele.

¹⁷“Matena na kariaku, ga matareha ma ki bara tangara, ka mamata na riota ma ka pe tarahua na ve, inê na Araha be aganarigi na avarasiha iata. Inê na God i Isiraele ki asa, ve page panira.

¹⁸Inê be nakagi na ve, ke gogo igê na barani ma na hungani, ma na ve banga ke pusu igê na maruguni. Inê be katoa na masusu avagavaga ke ranoranoga, ma igê na mako bêratega ke vora me igê na ve banga.

¹⁹Igê na bagamanihê raha inê be hagavakarigi igê na apinige, na ani raha, na ani sisite, ma na apinige ni ngêra. Igê na bena mamao inê be hagavakarigi igê na ani ma vê na apinige, ka voravora re na vapuni.

²⁰Na enoni ka page rigia na tarana ngekê, ma ka page girara, vi inê nga na Araha kani gê kato vikana. Ngaira ka page tahetara reniê, vi inê nga God Apuna i Isiraele kani gê katogi ngegana.”

²¹God na Araha iata na Isiraelita ki vi: “Igamu na harasita na enoni getera mu tamasi igê na apanena iami. Mu roherohe pusia, hanana mu hagatanga monari renia.

²²Râ me kamu tamasia na hinarunga iami, hanana igami kami girara na matena ta ki page voravora me igê. Mu ramatenigi tangagami na tarani, ga bani vora me i nago, ma kamu visigi me na girarani.

²³Mu hagarongogami renigi na ta ka page voravora me i muri me, hanana mi girara, vi igamu ka na ataro monari. Mu katogi na mena, na ani koro se na ani era, hanana mi konekone ma kami bubununuga renigi.

²⁴Bâ, igamu ka na marâ purua ma, ma ki mareha makoko vê, vigamu hagavoregi ta na marâ! Ma na enoni, ga hagarapegamu, ka paronga iera ngavê, suria ga vogasigamu igamu.

²⁵“Inê kê bani atea tani na mane i kerekê, ki page rahesiê. Ngaia ki bani râ me noga. Inê kê naka, hanana i meraheariha na maneraha. Ngaia ki purira so manga na makomako, manga na mane, i tagarahigi na pi na hê, i purigi na makuni na mako.

²⁶Hoi, ti na hitangimi i hinarua na tarana ngekê, hanana igami kami girara i ngekê, vi na hinarunga iami ki monari? Mareha rârâ na hitangimi, vige tamasia. Mareha rârâ ta na enoni, vige rongogamu, mu visia.

²⁷Inê, na Araha, inê nga kê hagenago, kê hagarongoa Sione renia. Inê nga kani gê hagaguhia na mane tora tamasinga tanga i Jerusaleme henia na taroha koro, i vi, ‘Na kariamu ka sugi aporo me noga.’

²⁸Inê kê bâ tatarê renira na ataro. Ma ki mareha ngavê na hitangita, vige ruhea na harana. Mareha tani vige aramiê rârâ.

²⁹E, ngaira ka na marâ purua ma! Ngaira ka pe hagavorea rârâ ta na marâ. Na nunuta ka na rogaroga purua ma ma na guruni purua ma.”