Read Kahua ISAIA 42 Bible Online

ISAIA 42 - Kahua bible

ISAIA 42

¹Na Araha ki vi: “Ikê nga ki na kariaku mora. Inê kê hagaramonia. Ngaia ki na ani gê atea. Inê kê ageagesia. Inê kê angaria, hanana i tarohenia na otoha tangara na enoni hato i maveta.

²Ngaia ki asa, vige tamasi ngerengere, se vige hagangere, se vige ateate ke rabaraba.

³Ngaia ki asa, vige barugia na ate, i aroro, se vige hunuia na kere vavatana na mangate. Ngaia ki togeaga, ki tarohenia na otoha.

⁴Ngaia ki asa, vige bagahagêguri, se vige rumakaka. Ngaia ki page katoa na otoha, ki manasia na maveta hagenani. Na agua hagatê ka magêsia na hagesuringa iana.”

⁵Na Araha God ki hagavora na vavearo ma ki gasia manga na gahu. Ngaia ki hagavorara na maveta ma na marâ hato ga oga igê. Ngaia ki hagavorara na enoni ma ki vatera na mêriha. Na Araha God ngekê ki vi tanga na kariana, ki vi:

⁶“Inê nga na Araha, inê kê unigo ma kê vatego renia na ramoha, hanana go katora na enoni i maveta, ka arâ suria na otoha. Inê be tamanigo ma be ngahisigo. Renigo igo inê be naka na suruheri iaku henira na enoni hato i maveta. Renigo igo inê be mavesira.

⁷Igo ko page hagamaravagi na maata na enoni ga guru. Igo ko page torera hura na enoni tenia na roto hono na ruma ni hagaitangiha.

⁸“Inê nga ki na Araha. Na ataku ngekê. I mareha ngavê ta na ataro, vige maratoraku. Inê kê hagapêpura na enoni, siana ka hagahigasigi na nunuta na ataro, nga noga ma inê.

⁹Na marâ, gê bani visigi me i nago, ka bani vora me monari. I ngekê inê be visigi vê nikâ na marâ haoru. Inê be hagarongogo renigi i nago, ma hemuri ka kahu voravora me.”

¹⁰Kiria na ki haoru tanga na Araha. Maveta hagenani, mu hagarahasia na Araha. Igamu igê na haka i asi, mu hagarahasia na Araha. Asi ma na marâ hato igê, mu hagarahasia na Araha. Igamu hato igê na tarasini, mu hagarahasia na Araha.

¹¹Na masusu ma na hinua igê, mu hagarahasia na Araha. Ai ni Ketare, mu hagarahasia na Araha. Igamu i hinua i Sela, mu ngerengere vagevage igê na botoni na barani.

¹²Agua hagatê, mu hagarahasia na Araha.

¹³Na Araha ki ura ni hearihatana. Ngaia ki hagaramo ma ki puhara. Ngaia ki ngere na ngerengereha ni hearihatana. Ngaia ki hagaramo tangara na merongana.

¹⁴God ki vi: “I arihu me noga inê kê piringiape. Inê kê muni ma kê pe tamasi rârâ. Inê kê nakagi vê noga na avarasiha iata na kariaku. Hoi, ma i ngekê nga na matena iaku. Inê kê ngerengere manga na gete, i harate kare.

¹⁵Inê be hagaerasigi ngavê na hungani ma na barani. Inê be hagamamariagagi na rauga ma na apinige. Inê be hagamamatarigi na ve ma na rano.

¹⁶“Na kariaku, i guru na maata, inê be urura surigi na tara ma na tarani, ga pe bani giraragi me i nago. Inê be urusia na roto renia na mavetana i maata, ma be hagahatarigi na tara sutasutaga. Na suruha iaku ngegana inê kê page hagamonarigi nga.

¹⁷Na enoni, ga hararapegi na nununi na marâ, ga tahegi, ma ka visigi, vi na harasita, ngaira ka page hagêguri baguru, ma ka page maki re.”

¹⁸Na Araha ki vi: “Igamu na ani mu guguruga, mu karinga! Igamu na ani mu guru, ge marava maninga na maami!

¹⁹Ti ki guru teharira na kariaku? Ti ki guguruga teharira na enoni tora tamasinga iaku?

²⁰Isiraelita, i rako na marâ mu bâsigi, ma kamu pe tako. Ga varara na karingami ma kamu pe karinga!”

²¹Na Araha ki mage ni hagatahira na kariana. Tahema ngaia ki hagesurira igê na tarani koro, ga hihitaga, suria i obanira, viga taugi maninga na ramata ma na hagesuringa iana.

²²Ma i ngekê ka bani henahuraura na kariana ma ka tê tara renigi na nahuninga hato iata. Ka purusira igê na roto hono na ruma ni hagaitangiha. Ka rurugu tenira ma ka henahuraura. Ma ki mareha rârâ ta na enoni, vige hagatahira.

²³Ti na hitangimi i pasi rongo? Mu pasi karinga maninga vari, haganega tenia i ngekê?

²⁴Ti ki katora na merongaka ka rurugu tenigia, igia na Isiraelita? Ngaia nga ka na Araha, suria igia ka pe tê viteana. Igia ka pe râ surigi na ramata iana, se vige têgi na hagesuringa iana.

²⁵Tahema ngaia ki mangariaga bâraha tangagia, ma igia ka mamasiaga renia na hearihatana. Na mangariaganiha iana ki manga na gi, i ngaua i Isiraele hagenani. Ma igia ka pe girara, vi i tanu hega kani ga vora me na tarani ngegana. Ma igia ka usi vige tako!