Read Kahua ISAIA 43 Bible Online

ISAIA 43 - Kahua bible

ISAIA 43

¹Na Araha ki vi: “Isiraele, inê kê hagavoragamu. Inê kê hagamaurigamu. Vikê, siana kamu magu! Inê be hagatahigamu. Igamu ki na aniku.

²Matena mu tarêhigi na ve, ga maganu inê be ngahisigamu, hanana siana na bagabevoani ka susu henigamu. Matena na gi ki rarogamu, ki asa iami, vigamu tihu: na mamasiaganiha ki asa, vige tarahugamu.

³Renia inê ki na Araha God iami, na God Apuna i Isiraele, i hagatahigamu. Inê be vuri pusigamu renia i Esipito. Inê be urusirerua i Etiopia me Seba renigamu.

⁴Inê be tagarenira na enoni i na agua rako meni na mêriha iami, suria inê kê makuanigamu, kê takuigamu ma kê hagahigasigamu.

⁵Siana kamu magu! Inê be ngahisigamu. “Tenia i kerekê hagatê ma tenia i kereso hagatê, inê be torera aporo me tangagamu na karemi ma na goami.

⁶Tangara na ai ni agua kereso inê be vi, ‘Nakara ke aporo!’ Ma tangara na ai ni agua kerekê inê be vi, ‘Siana kamu tê apurusira! Nakara na kariaku ke aporo tenigi na agua hagatê, tenigi na ara ni agua i maveta hagenani.

⁷Inê nga kani gê hagamarahura. Inê nga kani gê hagavorara, hanana ga hagarahasiê, suria ngaira ka na tagaraha iaku.’”

⁸God ki vi: “Unira me na kariaku tanga na kotiha. Ngaira ki tonga na maata, ma ngaira ka guru. Ngaira ki tonga na karingata, ma ngaira ka guguruga.

⁹Unira me nikâ na enoni getera tanga na tamasinga. Ti na hitangita na harasita ki girara i hinarua ta na marâ tanga i muri me? Ti na hitangita ki bani hinarugi me na marâ ga vora me i ngekê? Na ataro ngegê ke merabanu me nga na enoni, ga roherohe pusira, hanana ga hagatanga monari renira. Ti na hitangita na enoni ngegana ki girara i vivi, vi na tamasinga iata na ataro ki monari?

¹⁰“Isiraelita, igamu kamu rohe pusiê. Inê kê ategamu, kamu vora na kariaku, hanana mu aitangisiê ma kamu tongesuriê, ma kamu girara, vi inê geteê ma kê God. Na ataro ka mareha vê vi God, mareha vê i nago, se i ngekê, se i hemuri me nikâ.

¹¹Inê geteê ma kê Araha. Inê geteê ma kê girara, gê hagatahigamu.

¹²Inê kê bani hinarugi me na marâ, ga vora me. Ngaia kani gê hagatahigamu. Na ataro ki bara, vige kato vikana. Igamu nga ka na ani mu rohe pusiê.

¹³Inê geteê ma kê God, ma kê God tare, ki bê ki arâ. I asa ta na enoni, vige gavatenia na raramohaku. I asa ta na enoni, vige urapusiê, se vige hagabarasiê.”

¹⁴Na God Apuna i Isiraele, i hagatahigamu, ki vi: “Suria inê kê obania, vige hagatahigamu, tahema inê be hagatorangenira na mane ni me, ke meheariha i Babilone. Inê be hogegi na maani para ni hinua, ma na ai ni Babilone ka page ngerengere angiangi.

¹⁵Inê nga ki na Araha God Apuna iami. Isiraelita, inê nga kani gê hagavoragamu. Inê nga kani gê Araha iami.”

¹⁶I nago kere vê noga na Araha ki voasia na asi, ki vora na tara, na tara i gupuna na asi aputaputa.

¹⁷Ngaia ki hagatonomira ka me igê rako na mane ni me ma na kati ni me ma na hosi ni me. Ngaira ka me, ka tâ hagetage i ano. Ngaia ki uhi mesira, manga na kere vavatana na mangate ga hunuia.

¹⁸Ma na Araha ki vi: “Siana kamu takusigi ma na marâ, ga bani vora me i nago, se vigamu tâtâ gatagata igê.

¹⁹Mu bâbâ renia hete na marâ, gê sugi katoa. Ngaia ki vora noga. Mu pe bâsia? Inê be naka na tara, ke aharêvoro igê na masusu raha, ma be katogi na ve, ke gogo i ngekana.

²⁰Na marâ vasiga i bemu nikâ ka page hagahigasiê. Ma na o vasiga ma na auvê nogata, matena gê katogi na ve, ka gogogo igê na masusu, hanana gê hagatonomira re na kariaku hetakui.

²¹Ngaira nga ka na enoni, gê bani hagavorara tangê mareku, ma ngaira ka page hagarahasiê.”

²²Na Araha ki vi: “Isiraelita, igamu kamu pe rahesiê, suria i usi na apemi reniê.

²³Igamu kamu pe susu tangê renira na sipi. Igamu kamu pe hagahigasiê ma kamu pe vogasiê. Inê kê pe hagamarâ apemi, vigamu vogasi tangê. Inê kê pe hagame apemi, vigamu susu tangê.

²⁴Igamu kamu pe hagakoro obaku, matena mu susu tangê renigi na marâ i sigini koro, se matena mu vogasiê renigi na êbeta na puruka. Igamu hete kani mu hagamarâ apeku inê renigi na tasi iami. Igamu hete kani mu hagame apeku inê renigi na bagatarihami.

²⁵Naka ma, ma inê nga God gê bonotenigi na tasi iami, hanana gê hagabângenia, vi o ti inê. I asa iaku, ve takusigi nikâ na tasi iami.

²⁶“Hoi, nika, ge râ igê na kotiha, ke hekarigi! Mu tamasi igê na apanena iami! Mu hagatanga monari renia na apanena iami!

²⁷Na uvarimi hagenago ngaia ki tasi. Na maneraha iami ngaira ka pe tê viteaku.

²⁸Tahema inê kê hagaitangira ma kê hagaerasia ngavê i Isiraele, ma kê nakara na merongata na kariaku, ka guharira ma ka hagamakira.”