Read Kahua ISAIA 46 Bible Online

ISAIA 46 - Kahua bible

ISAIA 46

¹I hato noga iata na ataro ni Babilone! Ngaira i ngekana, ga bani vogasirerua me na ataro Belo ma Nebo, ka hagarutangirerua igê na tonki, ma ka hagahigera na tonki, ki meme na apeta renirerua.

²Ka henahuraurerua ma ka torererua vê, karu hetagitagi igê na gerita na tonki. I hato noga iata na ataro ni Babilone!

³God ki vi: “Karingê, igamu na raraha iana o Jakobo, igamu na kariaku mu tahitahi mêngagamu. Inê kê bani marupegamu me haganega tenia na matena mu vora me igê. Inê kê topegamu.

⁴Inê nga ki na God iami. Inê be marupegamu, mataro me kamu gemêa ma ka gohogohoraga na bêmi. Inê kê hagavoragamu, ma be ama ni makuanigamu nga. Inê be tamanigamu ma be hagatahigamu.

⁵“Ti kamu hagararia reniê? Ti ki maratoraku?

⁶Na enoni ka karangigi na golo tenigi na kato iata. Ngaira ka nakanaka na higahigani na siliva. Ngaira ka vuria na mane, hanana i tagarahia na nununa na ataro renigi, ma hemuri ka susure tanga ma ka rahesia.

⁷Ngaira ka tugia rârâ, ma ka naka igê na atohana. Ma ki gâga tonge igê, ma ki asa hagetage vige guru râ tenia. Ma na matena na enoni ka avarasia, ngaia ki asa vige aramira, se vige hagatahira tenigi na bagabevoani.

⁸“Igamu na enoni, mu aharêngigi na ramata, mu takotako, ma kamu takusia na matena i nago.

⁹Mu takusigi aporo na tarani, ga bani vora me i nago kere vê noga. Mu aitangisiê, vi inê geteê ma kê God, ma ki mareha tani, vige maratoraku.

¹⁰Matena ga mamêngagi, vige voravora me, inê kê bani hinarugi. Inê kê bani hinarugi me i nago kere vê noga na tarani ga vora me. Inê kê vi, vi na katoha iaku ka tâ ga tâ, ma be hagamonarigi na ara ni katoha iaku.

¹¹Inê kê unia me ta na mane tenia i kerekê. Ngaia ki râ me noga. Ngaia ki page hagavato manga na tehe, ma ki page hagamonarigi na katoha iaku. Na tamasinga iaku ka page monari. Inê kê page akê me henigi na katoha iaku.

¹²“Enoni mu guguruga, mu karingê! Igamu kamu vi ma, vi na tahinga ki hagatê mênga.

¹³Ma hete inê kê katoa ki hagarangi me. Mareha ngavê, vige hagatê mênga. Na tahinga ki asa, vige hagarihu. Inê be hagatahia i Jerusaleme, ma ki page rongo raha na atata na Isiraelita reniê inê.”