Read Kahua ISAIA 47 Bible Online

ISAIA 47 - Kahua bible

ISAIA 47

¹Na Araha ki vi: “Babilone, gu vato tenia na âgâga iamu ma ku oga hurihuri i ano. I nago ka visigo, vi na kare viru, suria igo na hinua go teha. Ma ki hato vigu marumu, se vigu mamakaga, suria i ngekê ko vora re na kare rakuraku.

²Taketake na ngêra! Garasi na ni! Gaia râ na gahu i bêmu! Tasia râ na tuguni iamu. Rumia akê na gahu iamu ma ko tarêhigi na ve.

³Na enoni ka page bâsigo, go rupaturi, ko arikuku ma ko maki. Inê kê page barua na siva ma ki asa hagetage be page tihia tani.”

⁴God Apuna i Isiraele ki hagatahigia. Na atana ki na Araha raramohaga hunia.

⁵Na Araha ki tamasi tanga i Babilone, ki vi: “Oga so! Muni! Oga igê na agua i roto! I hato, vige page visigo nikâ, vigo raha teharigi na agua hato getegi.

⁶Inê kê mangariaga tangara na kariaku ma kê kasi renira, ma kê nakara ma tangago. Ma igo ko pe takuira rârâ, ma na gemêa nikâ igo ko katora bera ngavê.

⁷Igo ko vi ma, vi igo ko tehateha tare. Tahema go pe botage renigi na haganunuha, se renigi na tarani ga vora me.

⁸“Gu rongo, kani go hagatage renigi na teniha iamu. Igo ko vi ma, vi igo ko asitatara, ma ki asa ta na marâ vige tarahugo. Igo ko vi, vi igo ko teha. Mareha tani vige maratoramu. Igo ko vi ma, vi igo ki asa vigu nâ, se vigu magari.

⁹Ma na tarani gi rua ngegana karu parama, ma karu page tarahugo i rarona nga na tangiana gi tage togo. Naka ma go katogi rako teha na harikua ma na maru, igo ko page magari ma ko page nânâ.

¹⁰“Igo ko raruni togo renigi na bagatarihamu, ma ko vi ma, vi mareha rârâ ta na enoni, vige bâsigo. Na giraraha ma na takotako iamu ka hagatasigo, ma ko tako maremu, ko vivi, ‘Inê nga kani gê God. Mareha tani vige maratoraku.’

¹¹Na bagabevoani ka page tarahugo, naka ma vigo marumaru se vigu harikua. Igo ko page parama, ma ko aruhuruhu. Na aruhuruhunga i ataraha ma go marutea.

¹²Gu ama ni katogi nga na harikua ma na maru, manga go bani katogi me, matena go karekare mênga. Ngaigi ki tamanigo vari? Se ga hagamagusira na merongamu vari?

¹³I asa vigu hagatahigo maremu, naka ma ga rako na enoni, ga vatego na takoha. Ma igo ki meme na apemu renigi. Nakara ke râ me ke hagatahigo. Nakara ke râ me na enoni, ga hagakitakitagi na higu ma ka segegi so, vi manga i he na vavearo. Ma i na ara ni mateni i hagenani igê na hageha, ngaira ka hinarugi na marâ, ga page tarahugo.

¹⁴“Ngaira ka mangagi ma taromegani na go maria, ma na gi ki page ngaura. I asa iata, vige hagatahira mareta. Manga i he ka girara viga hagatahigo? Na gi ngekana ki ramo teha ngavê ma ki pe arari, vige hagarara igê.

¹⁵Na enoni ngegana, ga giraragi na tarani na higu, ka manga ngegana. Ngaira ka vatego na takoha, haganega me tenia go sisite. Na tarana ngekê ki tamanigo vari? Ngaira hato ka page panigo tatage, ma ki asa tani vige hita so, hanana vige hagatahigo.”