Read Kahua ISAIA 48 Bible Online

ISAIA 48 - Kahua bible

ISAIA 48

¹Ai ni Juta, raraha iana o Jakobo, mu karinga na tamasinga iaku. Igamu kamu tohe renia na Araha. Igamu kamu vi, vi igamu kamu rahesia God, i hagavora i Isiraele. Ma igamu kamu hagaparu ma.

²Henaka, ma igamu kamu ageagesia, vi igamu ka na ai ni hinua apuna ma kamu hagêguria God iata na Isiraelita, ga hêtana vi na Araha raramohaga hunia.

³Na Araha ki vi tangagamu, ki vi: “I nago kere vê noga inê kê bani hinarugi me na tarani ga vora me. Igamu kamu bani rongogi teniê. Inê kê parama, ma kê katogi ka voravora me.

⁴Inê kê bani giraragamu, mu guguruga, mu togeaga ma kamu heheriga, ma ki gatagata na rokomi manga na aiani. I asa vigamu kere marogo so.

⁵Tahema inê kê bani hinarugi me na marâ, ga tarahugamu. Inê kê bani tarohenigi me na tarani ngegana ma hemuri ka kahu vora me. Inê kê kato vikana, suria gê pe obania, vigamu kami vivi, vi na nunuta na harasimi kani ga katogi na tarani ngegana.

⁶“Igamu kamu bani rongogi ma kamu bani bâsigi. I hega, kamu pe vi, vi na hinarunga iaku ka monari? Hoi, i ngekê inê be hagarongogamu renigi na tarani haoru, ga page voravora me, na tarani ga pinihi mênga tenigamu.

⁷I ngekê nga inê kê katogi ka voravora me mave. Igamu kamu bani purunguni me renigi i nago. Manga ge mareha, igamu kamu vi vari, ‘E, igami kami bani giraragi.’

⁸Inê kê bani giraragamu, vi igamu kamu hagaparu tare. I asa ta na enoni, vige hagêguri togo renigamu. Igamu kamu bani guguruga me kere vê noga. Igamu kamu purunguni renigi na tarani hato ngegê. Mareha ngavê, vigamu rongo kuruhani rârâ.

⁹“Inê kê piringia so na mangariganiha iaku, hanana na enoni ka hagarahasiê. Inê kê piringiape, hanana siana kê mutegamu.

¹⁰Inê kê hagamatarotarogamu, mareha vi manga na siliva renia na gi, ma renia hete na mamasiaganiha.

¹¹Na tarani gê katogi, inê kê katogi tangê inê mareku ma, hanana na enoni hato ka hagarahasiê inê geteê renigi, suria i pe koro ka hagaigê. Ma ki bara be metongani râ nikâ o ti.”

¹²Na Araha ki vi; “Isiraelita na kariaku, mu karingê! Inê geteê ma kê God. Inê kê bani oga me igê na haganegahana, ma kê page gâga tare, ki bê ki arâ.

¹³Inê mareku kê hagavora na maveta, ki nganganihaga, ma igê na raramohaku inê kê gasia na vavearo. Matena gê unirerua me na ano ma na vavearo, ngairerua karu arâ me otooto râ nga.

¹⁴“Igamu hato, mu haku me ma kamu rongo! Ti na ataro i hinarugi na tarani ngegê? Inê nga kani gê atea na kariaku, ki taharia i Babilone. Ngaia ki page arâ surigi na katoha iaku ma ki page marungira i Babilone.

¹⁵Inê geteê ma kani gê unia ma kê hagatora. Inê kê bêngenia ma kê katoa ki teha.

¹⁶“Mu guru me hagarangiê ma kamu karingê. Tenia na haganegahana inê kê bani tamasi mataha. Inê kê pe pinihia rârâ ta na marâ tenigamu. Tenia na haganegahana inê kê bani hagamonarigi me na tamasinga iaku.” Monari, na Araha God ki angariê ma ki hagatorangeniê igê na raramohana.

¹⁷Na Araha God Apuna, i hagatahira na Isiraelita, ki vi: “Inê nga ki na Araha God iami. Inê kê obania be hagesurigamu renigi na marâ, ga koro tangagamu, ma be hagaotogamu suria na tara koro, i tuguhigamu, vigamu arâ suria.

¹⁸Manga vigamu bani marupegi na ramata iaku, vikê na ramana ke aharêsigamu, manga na ve i asa, vige page mamata, ma na otoha ki asa, vige hato tenigamu, manga na asi i arobo tare.

¹⁹Na raraha iami ke rako mangagi na one ma ke pe mutemute, ma inê be pe takotako mu renira.”

²⁰Mu tari era tenia i Babilone! Gavatenira na ai ngekana! Ngerengere vagevage! Tarohenia igê i na ara ni agua, kamu vivi: “Na Araha ki hagatahira na kariana na Isiraelita!”

²¹Matena na Araha ki bêngenira na kariana igê na masusu raha mahana ma avagavaga, ngaira ki pe mamata na riota. Ngaia ki katoa na ve ki gogogo me tenia na hê, hanana ga totono igê. Ngaia ki tahurua na hê, ma na ve i pusu me.

²²Na Araha ki vi: “I mareha vê na ramana tangara na enoni ga haritoheê.”