Read Kahua ISAIA 5 Bible Online

ISAIA 5 - Kahua bible

ISAIA 5

¹Nakê be kiria na baro ki renia na tamaku koro, i takuia na mu ni vaini iana. Na tamaku ki nahunia na mu ni vaini igê na mako koro teha ngavê igê na tarihana na hungana.

²Ngaia ki harasia na mu, ki hikiru ma ki hasi igê na varoni koro na vaini. Ngaia ki torea na bebetehe, hanana i anumasia igê na mu. Ngaia ki tagarahia na agua, i rusirusi igê na guani na vaini. Ngaia ki naasia na matena, viga matamata igê na guani mamaki, ma hete ga mahe ma.

³Tahema na tamaku ki vi: “Igamu na ai ni Jerusaleme me Juta, mu hagakitakitagamirua inê ma na mu ni vaini iaku.

⁴Na ta nikâ kê katoa tanga na mu ni vaini iaku? I hega kani ga mahe ma na guani, gê vi ma, viga mamaki?

⁵Hoi, be vi tangagamu. Inê be katoa vikê hete na mu ni vaini iaku. Inê be hogea na ravoravo rihia. Inê be hogea na para pusia ma be nakara na marâ vasiga i mu, ke oka igê ma ke puria.

⁶Inê be naka vê, ke masigu ngavê. Siana be uvegi na arani na vaini. Siana be vavoa. Inê be nakagi vê na rauga era ma na tone, ke rubuhia na mu iaku. Inê be manimanigi na roto, siana ka rangisia na mu iaku.”

⁷Isiraele ka na mu ni vaini, na mu iana na Araha raramohaga hunia. Na ai ni Juta ka na varoni na vaini, i hasigi i mu iana. Ngaia ki vi ma, viga korokoro, ma hete ga nahu inuni. Ngaia ki vi ma, viga katogi na otoha, ma hete ga hagamamasiagara na enoni, suria ga pe râ surigi na otoha.

⁸I page era ngavê tangagamu, igamu na enoni mu ama ni vurigi nga na ruma ma na mako tamami na ani mu bani nahunigi. Sugia ma mu oga parera, ma kamu parênia getegamu na agua hagenani.

⁹Inê kê bani rongoa na Araha raramohaga hunia, i tohe, ki vi: “Na ruma hato, ga bâkoro ngegê, ka page baguru ma ka page aruhuruhu.

¹⁰Na mu raha ni vaini ki page araria ma na apira gi tage togo na vaini. Na mu raha ni koni ki page araria ma na heni gi tage togo na koni.”

¹¹I page era ngavê tangagamu, igamu na enoni mu riteritehigi na tonoha, tararugi na bungiani, ma ka ruguhigamu.

¹²Matena mu magoto, igamu kamu tarugigi na gita, mu tahutahuru ma kamu êhihi, ma kamu totono papasi na vaini, ma kamu pe botage renia na Araha ma renigi na tagaraha iana.

¹³Tahema ga page henahuraugamu. Na maneraha iami ka page mesi magêha. Na enoni purua ka page mesi tonoha.

¹⁴Na agua iata na enoni ga me ki manganga, hanana i kumira. Ngaia ki unumira na maneraha henira na ani ga magoto ma ka barongo.

¹⁵Na ara ni enoni hato ka page maki, ma na ani, ga paroparo, ka page vota.

¹⁶Na Araha God raramohaga hunia ki hagabângenia, vi teha i pasina na otoha, vi na parongana ki oto ma ki koro teha ngavê, suria i surira na kariana igê na otoha.

¹⁷Igê na hinua, ga aruhuruhu ngavê, na sipi binibinikaga ma na kareta ka page ngêngê igê.

¹⁸I page era ngavê tangagamu! Igamu kamu okea hurigamu maremi na hagaitangiha, suria mu okea tangagamu maremi na eraha renigi na varo raha ma na varo nganganihaga.

¹⁹Igamu kamu uhungia na Araha, na God iata na Isiraelita, kamu vi: “Naka vê ke katogi na katoha iana, hanana igia ke girara na parongana!”

²⁰I page era ngavê tangagamu! Igamu kamu visigi na marâ era, viga koro, ma na marâ koro, viga era. Mu visia na roto hono, vi na mavetana, ma na mavetana, vi na roto hono. Mu visigi na marâ, ga mahe, viga mamaki, ma na marâ, ga mamaki, viga mahe.

²¹I page era ngavê tangagamu, mu vi, vigamu tako mataha ma ka mave na parongami.

²²I page era ngavê tangagamu, mu teha igê na tonoha ni vaini, ma igê nikâ na ani mu torarigi, ki raramohaga.

²³Ki page era ngavê tangagamu! Igamu kamu taugi na haga na vatevate igê na kotiha, hanana vigamu pe hagaitangira na ani ga aharê, ma kamu pe tamanira na ani, ga pe aharê rârâ.

²⁴Tahema, tagenana mangagi na rauga ma na go maria ga herumirumi, matena ga nonoro igê na gi, na vagami ka page kakaga, na takami ka page maugu, ma ki ahegenigi na roga, suria mu usitenigi na hagesuringa, i vategia na Araha raramohaga hunia, na God iata na Isiraelita, i apuna teha ngavê.

²⁵Tahema na Araha ki mangariaga tangara na kariana. Na rimana ki nanê, hanana i hagaitangira. Na barani ka page gisigisi, ma na gahuata na enoni ga me ka page arata tokora i tara mangagi na roro. Henaka, ma na mangariaganiha iana na Araha ki asa vige page hato. Na rimana ki nanê mênga, hanana i hagaitangira.

²⁶Na Araha ki hagagirarara na me igê na marê hagatê, hanana viga arâ me. Ngaia ki vunuhira, hanana viga arâ me tenigi na ara ni agua i maveta hagenani. Bâ, ngaira ka garigari ma ka hata ni rêrête me.

²⁷Mareha vê na hitangita, vige memega na apena, se vige tariahehu, se vige mêruahehu, se vige mêru. Na gahu ka pe gugubaga. Na varoni na buti ka pe mumuagani.

²⁸Na mage iata ka mamaniniaga. Na epage iata ka bani rohegi. Na misi nêgata na hosi iata ka gatagata mangagi na hê ahe. Na wili igê na kati ni me iata ka ahaporo manga na maguara.

²⁹Ngaira ka ngerengere ma ka ngurunguru mangara na laione, ga ranguia na ganiana ma ka torea vê. Ma ki asa na enoni, vige tahura tenira.

³⁰Igê na tangiana ngekana ngaira ka page ngunguruhia i Isiraele, manga na asi i magugu ma ki arobo. Bâsia na agua: na mengo ma na anumanumaha. Na roto hono ki gahuia na marara.