Read Kahua ISAIA 50 Bible Online

ISAIA 50 - Kahua bible

ISAIA 50

¹Na Araha ki vi tangara na ai ni Isiraele, ki vi: “Mu takusia vari, vi inê kê tarigenia hura kenami, suria vigê obania, gê kasia? Ma i he na pepa ni hekasigi? Mu takusia vari, vi inê kê hagavuringenigamu, suria inê kê obanigi ma na haga, hanana vigê barubaru renigi na hagaba? Mareha vê! Ma ka henahuraugamu hete renigi na bagatarihami, ma ka torea vê kenami renigi na bagaparongami.

²“Renia ta igamu kamu pe tê viteaku, matena gê râ me kê hagatahigamu? Renia i hega, kamu muni ma, matena gê unigamu? Inê kê pe raramohaga vari, hanana vi ve hagatahigamu? Bâ, inê kê tamasi ma, ma ki mamata ngavê na asi, ma na ve ka vora re na marave avagavaga. Na siare igê ka me ma ka mapu, suria i mareha na ve tenira.

³Inê kê girara gê katoa na mavetana, ki rotoroto hono, manga i rotoroto na obata na enoni, matena ga angiangi maramara.”

⁴Na Araha God ki bâbâsuriê, matena gê tamasi, hanana gê kanukanura na ani, ga rumakaka. Na ara ni mavoraro ngaia ki hagariteê, ma ki katoê, kê magêsia na hagesuringa iana.

⁵Na Araha God ki katoê, kê têtê viteana. I asa iaku, ve guguruga tanga, se vi ve murisigea.

⁶Inê kê naka na geriku tangara na ani ga tahuruê. Inê kê nakarerua na pariku tangara na ani ga kusigi na taboturiku. Inê kê nakara ka guhariê ma ka pusurigi na maaku.

⁷Na Araha God ki tamaniê. Tahema na guhata iata ki asa, vige erasiê. Inê kê nganganihaga ma tangara, manga na hê i rate. Inê kê bani girara, vi inê ki asa be maki,

⁸suria na ani, i tamaniê, ki ngahisiê. Ti ki girara i toreê igê na tamasinga? Hoi, ge metamasi igê na kotiha. Ti kani toreê? Ge ura ke tamasi!

⁹Bâ, ngaia nga na Araha God ki roherohe pusiê. Ti kani hagatanga monari reniê, vigê katoa na eraha? Ngaira hato, ga torahuriê, ka page magahuru mangagi na tarisigani na gahu, ga ngêgi na hasikoko.

¹⁰Igamu na ani mu hagahigasia na Araha ma kamu tê viteana na kariana, vari na tara, mu râ igê, ki roto hono ngavê. Henaka i manga ngekana, mu ama ni raruni togo nga renia God. Mu ama ni hagêguria nga na Araha.

¹¹Igamu na ani mu harikato renira na enoni getera, na katoha iami ka page erasigamu igamu hete, manga na gi, mu tanga, ma ki ngaugamu so maremi. Ngaia marena na Araha kani katoa vikana. Na mamasiaganiha ki page hagamesigamu.