Read Kahua ISAIA 51 Bible Online

ISAIA 51 - Kahua bible

ISAIA 51

¹Na Araha ki vi: “Mu karingê, igamu na ani mu avarasiê, suria mu obania na tahinga. Takusia na vagana na raraha iami. Takusia na hunana na raraha iami.

²Mu takusirerua na êvarimi o Abaramo ma ka Sara. Matena gê unia o Abaramo, ngaia ki pe apara kare rârâ. Ma inê kê takuia, ma ngaia ki apara kare, ma na raraha iana ka rako teha ngavê.

³“Inê ma na Araha be takuia Jerusaleme. Inê be kanukanura na enoni hato, ga oga igê na hinua, i aruhuruhu ngekana. Naka ma na agua i sutasutaga ma ki bera, inê be katoa, ke hagagara koro ma ke bâkoro ngavê manga i Paratiso. Na enoni igê ka page obakoro, ma ka page vagevage bâraha ma ka page kiki ka visiê raha.

⁴“Kariaku, mu rongo! Mu karingê, gê tamasi. Na hagesuringa ma na ramata iaku ka page mavesigi na obata na enoni hato i maveta.

⁵I sugia ma, be hagatahira. Na tahinga ki hagarangi me noga. Inê kê mareku be marungira. Na agua hagatê ka naasiê ma ka hagêguri togo reniê, hanana vigê hagatahira.

⁶Mu bâsia akê na vavearo! Mu bâsia so na ano! Na vavearo ki page anu manga na robona na gi. Na ano ki page kakaga manga na bani gahu, ma ka rakorako teha ngavê na enoni, ga page meme igê. Henaka ki manga ngekana, ma na tahinga i râ me teniê inê, ki asa hagetage, vige page hato.

⁷“Mu karingê, igamu na ani mu girara na otoha ma kamu nganganihaga igê na hagesuringa iaku. Siana kamu magutenira na enoni, ga ramonigamu ma ka guharigamu.

⁸Ngaira ka page magahuru mangagi na gahu, ga hasikokoga ma ka anega. Henaka i manga ngekana, ma na tahinga, i râ me teniê inê, ki asa hagetage, vige page hato.”

⁹Gu aharaga, Araha! Gu tamanigami ma ku hagatahigami! Gu hagabângenia na raramohamu manga i nago kere vê noga.

¹⁰I hega, igo ko pe bani reteretea vari Rahaba na ega raha ni eraha? I hega, igo ko pe bani hagamamataria nikâ vari na asi? Igo ko pe bani voasia vari, ki vora re na tara tangara na enoni, go hagatahira?

¹¹Na ani, go hagatahira, ka page ataata i Jerusaleme. Ngaira ka page obakoro ma ka page kiki, ma ngaira ka page ngerengere vagevage. Ngaira ka page ageage tare, ki bê ki arâ, suria na anumanumaha ma na mamasiaganiha ka mutemute ngavê tenira.

¹²Na Araha ki vi tanga Jerusaleme, ki vi: “Inê nga na ani gê kanukanugamu. Tanu hega mu magutenira na enoni, ga girara ga meme? Na mêrihata ki abubu, manga na go ga retegi.

¹³Mu hiteniê vari? Inê ki na Araha iami, gê hagavoragamu, gê gasia na vavearo, ma kê naka na maveta, ki nganganihaga igê na atohana. Tanu hega mu ama ni magutenia nga na mangariganiha iata na enoni, ga hagamamasiaga apemi ma ka obania, viga hagaerasigamu ngavê? Ma i he nga na mangariaganiha iata?

¹⁴Na ani, ga bani henahuraura, ka sugi aporo i pasita. Ngaira ka page gâga arihu, ma na ngêra ka page ararira.

¹⁵“Inê nga ki na Araha God iami. Inê kê hagarongo na asi, ki arobo ma ki maguhuguhu. Na ataku ki na Araha raramohaga hunia!

¹⁶Inê kê gasia na vavearo, ma kê naka na maveta, ki nganganihaga igê na atohana. Inê kê visigamu, vi igamu ki na kariaku. Inê kê bani hagesurigamu. Inê kê anumasigamu renia na raramohaku.”

¹⁷Jerusaleme, gu rite! Aharaga! Na Araha ki mangariaga tangago, tahema i hagatonomigo igê na kâkâ ni hagaitangiha. Igo ko tonomia hato, ma ko tariahehu renia.

¹⁸Mareha ngavê ta na kariamu, vige hagaotogo, se vige urugo.

¹⁹Na eraha gi rua karu bani tarahugo. Na ani gi tage: na hearihatana, i bani erasia ngavê na agua iamu. Na ruata: na magêha i tarahura na kariamu. Ti ki page takuigo? Ti ki page haganakugo?

²⁰Na kariamu ka bagamame ma ka tâ igê na maani na tara hetanga. Ngaira ka manga na manu igê na basu. Na Araha God ki hagamonaria na haganunuha iana, ma na mangariaganiha iana ki tarahura.

²¹Mu rongo, ai ni Jerusaleme! Igamu kamu mamasiaga ma kamu tariahehu, manga na enoni i ruguhia na tonoha.

²²Na Araha God iami ki rohe pusigamu, ki vi: “Inê be tavoa râ tenigamu na kâkâ ni mangariaganiha iaku. I hato, vigamu page tono nikâ igê, kamu tariahehu.

²³Ma inê be hagatonomira igê hete na enoni, ga hagamamasiaga apemi ma ka bonasigamu, kamu tâ i ano, ka purigamu so, manga vigamu ka na tara iata.”