Read Kahua ISAIA 52 Bible Online

ISAIA 52 - Kahua bible

ISAIA 52

¹Jerusaleme, gu rite! Gu aharaga! Gu ramo! Hinua apuna iana God, gu hagesuru bâkoro ma ku rêni! Na enoni era ma na ahuroto ki asa, vige page banu nikâ i pasimu.

²Aharaga, Jerusaleme! Taruhigi râ na mako i apemu! Ku ape tatara! Ku oga so igê na atohamu! Ai ni Sione, mu ruhasigi râ na seni i riomi, ga rakugamu renigi.

³Na Araha God ki vi tangara na kariana, ki vi: “Matena mu vora re na kare rakuraku, ka toregamu vê purua ma, ma ka page rupasigamu purua ma nikâ.

⁴Matena mu râ, kamu oga hagatora i Esipito, igamu kamu oga suri parongami. Ma na ai ni Asiria ka henahuraugamu ma ka toregamu vê purua ma.

⁵Ma na ta kê bâsia i Babilone? Ngaira nikâ ka henahuraugamu ma ka toregamu vê purua ma. Ma na ani, ga hagatagarahigamu bâraha, ka kasi mamava ma ka tamasi paroparo, ma ka ruhiê tare.

⁶Kariaku, igamu kamu page aitangisiê vi inê God, ma igê na tangiana ngekana igamu kamu page girara igê, vi inê kani gê vi, ‘Inê ikê.’”

⁷I hagakoro obata na enoni na râha me iana na mane tora tamasinga. Ngaia ki aharêvoro me igê na hungani, i merâ me na taroha koro, na taroha koro ni ramana ma ni tahinga. Ngaia ki vi tanga i Sione, ki vi: “God iamu ki Araha!”

⁸Na mane, ga anumasia na hinua, ka ngerengere, ka ngerengere heri ma ka kiki vagevage, suria ga rigia re maata na aporoha me iana na Araha tanga i Sione.

⁹Jerusaleme, gu aruhuruhu, gu hagangere vagevage. Na Araha ki page hagatahia na hinua iana ma ki page haganakura na kariana.

¹⁰Na Araha God Apuna ki page hagabângenia na raramohana. Ngaia ki page hagatahira na kariana, ma na enoni hato i maveta ka page bâsia.

¹¹Mu râ! Mu tari era! Mu pania i Babilone! Siana kamu hatarigi na marâ, ga apuna tangagamu, hanana mu marupegi na ramata igê na rotu. Igamu na ani, mu migirâ na marâ apuna tanga na hagarahenga, ki tuguhigamu, mu matarotaro hagenago.

¹²Siana kamu hagatata! Na matena raha mênga. Mareha vige manga i nago, matena mu gava. Na Araha iami ki page bêngenigamu, ma ki page anumasigamu rihigamu.

¹³Na Araha ki vi: “Na kariaku ki page akê me igê na tagaraha iana. Ga page hagarahasia ma ka page hagahigasia bâraha.

¹⁴Na enoni rako ka kakahuru renia, matena ga bâsia, suria i mamari na apena ma ki rupugapu ngavê. Ngaia ki pe bâ manga na enoni.

¹⁵Ma kamu bâ, rako teha ngavê na enoni ka page konetenia, ma na maneraha ka page tuturiha so nogata, suria ngaira ka page rongogiraragi na marâ, ga pe bani bâsigi, se vige bani rongogi.”