Read Kahua ISAIA 54 Bible Online

ISAIA 54 - Kahua bible

ISAIA 54

¹Jerusaleme, gu kiki vagevage! Igo ko gomara ma ko pe apara kare. Igo ko pe harate kare. Igo ko manga na gete, ga bani kasigo. Gu ngerengere vagevage, renia na karemu ka page rako teharira na karena na gete, i gâga o vaniana.

²Gu ratoa na ruma iamu, ki borahu ma ki aberabera.

³Gu gurugi râ na taritarihani heri na mako iamu, suria na raraha iamu ka page parênigi ma ka page nahunigi na mako iata na enoni getera ma ka page ogasigi na hinua, ga panigi.

⁴Siana ko magu! I asa vigu page ape ruruhi nikâ. I asa vige page hagamakigo nikâ. Igo ko page bonotenia, vi igo ko pe toto suriê, matena go kahu êragi haoru. Igo ko page bonotenia na makiha iamu, suria vigo nâ.

⁵Na ani i hagavorago ki manga o vaniamu. Na atana ki Araha raramohaga hunia, God Apuna i Isiraele, na tahingamu. Ngaia ki marungia na maveta hagenani.

⁶Isiraele, igo ko manga na gete, i êragi haoru, i aerahaga ngavê na apena, suria o vaniana ki kasia. Ma na Araha ki torego aporo, ki vi:

⁷“Inê kê panigo sisite râ ma, suria na mangariaganiha ki parama, ma ki tarahuê.

⁸Inê be takuigo tare. Na takuiha iaku tangago ki asa, vige page hato. Ngaia nga kani gê visia, inê na Araha, na tahingamu.

⁹“I na matena iana o Noa inê kê tohe, vi asa nikâ na maganuha, vige page anuia na maveta. I ngekê inê kê tohe, vi i asa be mangariaga tangago nikâ, se vi ve ramonigo, se vi ve hagaitangigo.

¹⁰Na barani ma na hungani ka page guguru, ma na takuiha iaku tangago ki nganganihaga ngavê, ma ki asa hagetage, vige page hato. Ma ki asa be aharêngia na suruha iaku ni marapeha. Ngaia nga kani gê visia, inê na Araha, gê takuigo.”

¹¹Na Araha ki vi: “Jerusaleme, igo ko mamasiaga ma ko aruhuruhu. Mareha ta na enoni, vige haganakugo. Inê be tagarahigo aporo renigi na hê bâkoro era. I ano inê be nakagi igê na hê marava.

¹²Inê be tagarahia na para rihigo renigi na hê, ga togatoga ngavê, ma na bebetehe renigi na hê ahe, ma na maani para renigi na hê toratorakaga.

¹³“Inê mareku be hagesurira na kariamu hato, ma na ramana ki page aharêsira.

¹⁴Igo ko page nganganihaga igê na koroha ma na otoha. Ki asa hagetage na merongamu, vige page hagamagusigo, se vige page hagamamasiagago.

¹⁵Manga na enoni, ma ka taharigo, ngaia ki na tarana iata mareta, mareha vi inê, ma igo ko page teharira.

¹⁶“Inê kê hagavora na mane, i tagarahigi na tangaruha. Ngaia ki putagigi ma ki hihisia na gi. Ma inê kê hagavora nikâ na mane ni me, i henahu renigi na tangaruha.

¹⁷Tahema ki asa ta na tangaruha, vige page hagaerasigo. Igo ko page teha renira na ani, ga torego igê na tamasinga. Inê be tamanira na kariaku, ma be katora ka teha. Ngaia kani gê visia inê na Araha.”