Read Kahua ISAIA 56 Bible Online

ISAIA 56 - Kahua bible

ISAIA 56

¹Na Araha ki vi: “Mu katogi na tarani, ga koro ma ka otooto i maaku, suria na tahinga tangagamu ki hagarangi me noga. I sugia ma, be hagatahigamu.

²Ga babarisi na enoni, ga katokato vigana, ma ka marupea tare na Tangiana ni Mamaroha, ma ke pe katogi na tarani, i apu vige katogi igê. Ga babarisi na enoni, ga pe oga sutaga.

³“Na mahuara, i hakunira na kariaku, siana ki vivi, ‘Na Araha ki usiteniê vari, vi ve hagarahe henira na kariana.’ Na mane, ga voea, siana ngaia ki vi, ‘Inê ki asa be hakunira na kariana God, suria inê kê manga na apinige i maria ma ki bara ngavê be apara kare.’

⁴Renia inê kê vi tanga na mane vikana, kê vi: Manga igo ma ko marupea na Tangiana ni Mamaroha ma ko hagakoro obaku renigi na tauhamu, ma ko tototo suria na suruheri iaku henira na kariaku,

⁵inê kê naka na giraramu i Ruma ni Rotu iaku i hinua iaku, hanana na kariaku ka page takusigo tare, ma ka page takusia tare na atamu teharira na kare, manga vigu aparara.

⁶“Tangara na mahuara, ga hakunira na kariaku, hanana viga takuiê ma ka tototo suriê, inê kê vivi: Mu marupea na Tangiana ni Mamaroha ma kamu tototo suria maninga na suruheri iaku.

⁷Minê be kasigamu i Sione na hungana apuna iaku. Inê be hagakoro obami i ruma ni nunginungiha iaku ma be aganarigamu, matena mu vogasi ma kamu susu tangê. Na Ruma ni Rotu iaku ki na ruma, ga hagarahe igê na enoni hato i maveta.

⁸Inê be hagahakura me rako na enoni getera, ke hakunira na kariaku na Isiraelita, gê bani torera me tenigi na agua, ga henahuraura tange. Ngaia nga kani gê visia, inê na Araha God.”

⁹Na Araha ki vi: “Ai ni mahuara, mu mangara na marâ vasiga, ga garagara, mu râ me kamu ngasira na kariaku.

¹⁰Na enoni raha, vige bâsurira hete na kariaku, ngaira ka guru. Ngaira ka hite ngavê! Ngaira ka mangara na o ni ngereha ma ki bara vige ngere. Ngaira ka ata ni tâtâ ma vê, ka mauru ma ka marute. Na mêruha ma ki angarira.

¹¹Ngaira ka ngêngê papasi ma ka hagatage ngêra mangara na o. Na enoni raha ngegana ki mareha ngavê, vige tako. Ngaira hato ka râ suri barisuta mareta ma ka takusira mareta ma.

¹²Ngaira ka vivi, ‘Ge tono na vaini! Ke ruguhigia! I gomaga nikâ teharia i ngekê!’”