Read Kahua ISAIA 57 Bible Online

ISAIA 57 - Kahua bible

ISAIA 57

¹Na enoni koro ka meme ma ki asa ta na enoni, vige botage renira. Na enoni, ga marupegi na ramata, ka meme, ma ki asa ta na enoni, vige hagakitara. Matena ga meme na enoni, i oto na parongata, na bagabevoani ki asa, vige tarahura.

²Ngaira ka tarahura na marapeha ma ka mamaro i ano.

³Na Araha ki vi: “Igamu na enoni era, mu râ me, be ranganigamu. Igamu kamu matu, kamu marumaru ma kamu harikua. Igamu kamu mangara na kare ni tara, mangara na kareta na enoni, ga gamogamo, mangara na kareta na êrâ.

⁴Ti kamu mamanatenia? Ti kamu ngiria? Mu vatamigi na meami tanga ti? Mu mareha vari, vi na kareta na enoni ni hagaparunga ma na ani ga aharêngigi tare na ramata?

⁵Matena mu vogasira na ataro ni hagarakoniha i ruguhani na apinige raha, ga arubebe, igamu kamu paronga iera ma igê. Igamu kamu vogasira renira na karemi igê na vaba hagarangigi na ve.

⁶Igamu kamu toregi na oruni na hê i ve, ma kamu vogasigi, manga vi ngaigi ki na ataro. Igamu kamu tagarenigi na ngêra tangara, ma kamu karangigi na vaini tangara. Mu takusia vari, vi inê kê obakoro renigi?

⁷Igamu kamu tagere igê na barani, hanana vigamu vogasi ma kamu paronga iera igê.

⁸Igamu kamu nakagi na nunuta na harasimi i ruma iami hagarangigi na maani ruma. Igamu kamu murisigeê. Igamu kamu tasigi râ na gahu iami ma kamu tâtâ igê na bea aberabera iami henira na ani mu rongo era henira. Ma igamu kamu vurira, hanana ga mauru henigamu. Ma i ngekana ka togotogo igê na teniha era iami.

⁹Igamu kamu monegamu renigi na marâ, i sigini koro, tanga vigamu arâ kamu rahesia na ataro o Moleki. Igamu kamu garira na ataro, hanana vigamu vogasira. Tahema mu hagatorangenira na enoni tange na agua hagatê, ma tanga nikâ na agua iata na enoni ga me.

¹⁰I meme na apemi renigi na rârâha ngegana, ma ki asa vigamu rumakaka. Na teniha iami ki angarigamu. Tahema mu pe makumakusiga.

¹¹“Ti nga na ataro, ga hagamagusigamu? Ti nga na ataro, mu magutenira, tahema mu pe toto suriê inê ma kamu pe takusiê, ma kamu tako mu reniê? Renia ta igamu kamu pe hagahigasiê inê? Suria inê kê muni arihu vari?

¹²Igamu kamu takusia, vi na tauhami ki oto, ma inê kê ramatenigi hete na tauhami, ma na nunuta na harasimi ki asa hagetage, vige page tamanigamu.

¹³Matena mu avarasira, nakara ke tamanigamu ngaira, na nunuta na ataro mu rurugura! Naka ma na kere roga sisite, ma ke ahegenigi râ! Ma na enoni, ga rukuruku i pasiku, ka page nahunia na agua ni suruha, ma ka page rahesiê igê na hungana apuna iaku.”

¹⁴Na Araha ki vi: “Hagakoroa na tara! Rikia! Hagarêa na tara! Hagahataraia, hanana ga aporo me igê na kariaku tangê.

¹⁵“Inê nga na Araha gê teha. Ataku ki God Apuna. Inê kê gâga tare ma tarema. Pasiku apuna na enoni ka arisia. Ma inê kê oga henira nikâ na enoni, ga haritagi ma ka angitenigi na tasi iata, hanana gê hagaramonira ma kê kanukanura.

¹⁶Inê kê bani vatera na kariaku na mêriha, ma ki asa be ama ni ranganira nga, se ama ni mangariaga nga tangara. I era ma ke meme.

¹⁷Inê kê mangariaga tangara, suria ngaira ka tasi ga hagatage. Tahema inê kê hagaitangira ma kê murisigera. Ma ngaira ka ama ni arâ surigi ma na obaniha iata mareta.

¹⁸“Inê kê bani bâsira ga tasi. Na ani ga urisi parongata inê be hagakorora ma be bêngenira, be tamanira ma be haganakura.

¹⁹Na marapeha iaku ki tangara na ara ni enoni hato, tangara na ani i na agua hagatê ma hagarangi nikâ. Inê be hagakomagara na kariaku.

²⁰Na enoni era ka manga na asi, i aroborobo ma ki marupi tare ma ki kasikasi i one na ani ma vê na roro.

²¹Na enoni, ga ama ni tasitasi nga, ki asa iata hagetage, vige page tahi.” Ngaia kani visia na Araha.