Read Kahua ISAIA 58 Bible Online

ISAIA 58 - Kahua bible

ISAIA 58

¹Na Araha ki vi: “Ngere! Hagangere raha! Ke rongo raha manga na ahuri! Hagarongora na kariaku na Isiraelita renigi na tasi iata, suria ga pe marupegi na ramata iaku.

²Ngaira ka rahesiê i na ara ni tangiani, ma ka vi ngaira, viga mage ni giraragi na obaniha iaku, ma ka agana, viga marupegi na ramata iaku. Ngaira ka vi, viga obaniê, vigê vatera renigi na ramata oto, ma ka vi, vi ngaira ka vagevagesia na hagarahenga tangê.

³“Ngaira ka hagate, ka vi, ‘Tanu hega igia ka harihari, manga vi na Araha, ma ki pe gagêmaga renigia? Tanu hega igia ka hatamia na magêha, manga vi ngaia, ma ki pe botage renigia?’ “Ma inê kê aramira, kê vi: Bâ, matena mu hari, igamu kamu râ surigi ma na obaniha iami maremi, ma kamu hagamamasiagara ma na enoni tagara iami.

⁴Na hariharinga iami ki katogamu, kamu mangariaga, kamu hekorekore ma kamu herupurupu. Mu takusia vari, vi na hariharinga iami ngekana ki katoê, kê aganarigi na nunginungiha iami?

⁵Matena mu hari, igamu kamu katogamu maremi, kamu mamasiaga. Igamu kamu tu bê manga na go i abarere. Igamu kamu gasigi na tarisigani na gahu ma kamu kangikangi na rahu, kamu tâtâ igê. Mu visigi vari nga, vi na hariharinga ngegana? Mu takusia vari, vigamu hagakoro obaku renigi?

⁶“Na tarana na hariharinga, gê obania, ki manga ikê: Siana kamu hagamamasiagara na enoni. Siana mu hagahigera renigi na tarani, ga pe oto. Rupasira na kare rakuraku. Siana kamu hagamarâ apeta na enoni.

⁷Na enoni, ga magê, mu meratongani na ngêra iami. Mu hagarukuhira na enoni, ga matareha ma ka pe nahunigi na ruma iata mareta. Mu hagesurura na ani ga rupaturi. Mu tamanira na goami.

⁸“Manga mu katokato vikana, na korohami ki page mave manga na arito, i raboa, ma na mara iami ka page mavomavo rêrê. Ma inê be ngahisigamu tare, ma be anumasigamu renia na raramohaku.

⁹Matena mu nunginungi, inê be aganarigamu. Matena mu avarasiê, inê be tamanigamu. “I hato hagetage, vi igamu kamu hagamamasiagara na enoni. Siana kamu usira na enoni ma kamu tugurira. Siana kamu torahurira na enoni.

¹⁰Mu hagangêra hete na enoni, ga magê. Mu tamanira hete na ani i bara tangara. Manga mu katokato vikana, na roto ni mamasiaganiha iami ki page vora re na mavetana na ritovagana.

¹¹Ma inê be hagaotogamu tare, ma be hagakoro obami renigi na marâ koro. Inê be katogamu, kamu ramoramo ma kamu komaga. Igamu kamu page manga na mu i magaroha, se manga na ve banga, i asa vige page mamata.

¹²Igamu kamu page tagarahigi aporo na hinua aruhuruhu igê na agua i bani oga me. Ga page visigamu, vi igamu ka na enoni mu tagarahigi aporo na para ni hinua ma na ruma ga ahogehoge.”

¹³Na Araha ki vi: “Mu marupea na Tangiana ni Mamaroha, suria ngaia ki na tangiana apuna. Siana kamu tari surigi igê na tagaraha iami. Mu vagevagesia hete na tangiana apuna, ma kamu hagahigasia. Mu gâga tonge igê. Siana kamu tagara igê, se mu tamasigi igê na marâ purua.

¹⁴Vikana igamu kamu page vagevagesiê. Inê be katora na enoni hato i maveta, ke hagahigasigamu ma igamu kamu page nahunia aporo na agua, gê bani vatea renia o Jakobo na êvarimi. Ngaia nga kani gê visia inê na Araha.”