Read Kahua ISAIA 59 Bible Online

ISAIA 59 - Kahua bible

ISAIA 59

¹Siana kamu takusia, vi na Araha ki pe raramohaga, hanana vige hagatahigamu, se vi i pungu na karingana, hanana vige rongogamu, matena mu avarasia.

²Ma surigi hete na tasi iami, tahema ngaia ki pe aganarigamu. Na tasi iami ka voasigamu tenia God. Tahema ngaia ki pe aganarigamu.

³Igamu kamu nahu enoni. Igamu kamu katogi na tarani ga pe oto. Igamu kamu hagahagaparu.

⁴Igamu kamu torera na enoni igê na tamasinga, ma igamu so maremi hete kani mu pe oto. Igê na kotiha igamu kamu hagahagaparu ma kamu tohetohe vero, hanana vigamu tehateha. Igamu ki heboroge na obami renigi na eraha, ma kamu hagavoregi ma na tarani, ga pe oto.

⁵Igamu kamu abahigi na oruna na ma gara hunu. Manga vi na enoni, ma ki botagia na oruna, na ma ki huhura me ki gagarea, ki meme. Na marâ, mu hêrigi, ka manga na robota ma na rava:

⁶na marâ ga pe ararigamu, vigamu hagesuru renigi. Na bagatauhami, mu harikato renigi, ka erasira na enoni ma ka hagamamasiagara.

⁷Igamu kamu tari surigi tare na eraha. Igamu kamu hagasusu tare ni nahuira ka meme na enoni ga oga suri parongata. Igamu kamu oga sutaga ma kamu makuakua i na ara ni agua, mu arâ igê.

⁸Mareha ta na enoni, vige asitatara renigamu. Igamu kamu giraragi ma na tarani, ga pe oto. Igamu kamu hitenia na marapeha. Suria mu râ maremi igê na tara, mu sutagaia, na enoni, ga arâ igê, ka tarahua na perenga.

⁹Na enoni ka vi: “Monari, igia ka aharê. Tahema God ki pe hagatahigia tenira na enoni, ga hagamamasiaga apeka. Igia ka naasia na mavetana, ma igia ka oga ma igê na roto hono. Igia ka naasia na mavetana, viga arâ suria na tara, ma ki mareha.

¹⁰Igia ka manga na enoni, i guru i arâ tatagara. Naka ma igê na ritovagana, igia ka tapasu igê, manga vi na bungiana, manga vi igia ka oga igê na roto hono igê na agua iata na enoni ga me.

¹¹Igia ka magu ma ka anumanuma. Igia ka angiangi ka mumu manga na kuvê. Igia ka naasia bâraha God, hanana vige hagatahigia tenigi na mamasiaganiha ma na eraha. Ma ki mareha vê! Igia ka naasia na tahinga, ma ka pe bâ bogona rârâ.

¹²“Araha God, igami kami guguruga tangago. Na tasi iamami ka rako teha ngavê ma ka tugurigami. Igami kami giraragi ma ki asa mi bonotenigi.

¹³Igami kami pe tê viteamu. Igami kami hagaigago. Igami kami murisigego. Igami kami hagamamasiagara na enoni getera. Igami kami pe toto surigo. Igami ki na enoni ni hagaparunga ma kami hagahagaparu tare.

¹⁴I mareha ngavê na otoha. Na tarani ga oto ka bani magahuru. Igê na tavani tamasinga na monariha ki mameaga igê. Na hagaparunga ki ramo ngavê i ngekana.

¹⁵Na monariha ki mareha ngavê vige oga. Manga ta na enoni, ma ki usi, vige râ surigi na bagatarihata na enoni, ngaira ka page hagamamasiaga apena.” Na Araha ki bani girara, vi na otoha ki mareha, ma ki oba era ngavê renia.

¹⁶Ngaia ki konekone bâraha, suria i mareha vê ta na enoni, vige tamanira na ani ga mamasiaga. Tahema ngaia ki hagatahira renia na raramohana marena i teha, suria na otoha ki angaria ngavê.

¹⁷Na otoha ki na bêata iana. Na tahinga ki na ngahisina. Na siva na hagaitangiha ni eraha ki na gahu iana. Na aruhana ki na mangariaganiha iana.

¹⁸Ngaia ki page hagaitangira na merongana surigi na bagaparongata hegitigi. Ngaia ki page naka na siva tangara ngaira hato, naka ma na ani i na agua hagatê.

¹⁹Na ai ni kerekê, kereso, me na ara ni agua ngaira ka page magutenia na Araha raramohaga hunia. Ngaia ki page arâ me manga na ve i maganu, se i manga na roga raha.

²⁰Na Araha ki vi tangara na kariana, ki vi: “Inê be râ i Jerusaleme, hanana ve anumasigamu, ma be hagatahigamu igamu hato, na ani mu urisi parongami.

²¹Inê be naka na suruheri henigamu. Inê be angarigamu tare. Na hagesuringa iaku, ge bani vategamu, ki page oga henigamu tare, ki bê ki arâ. Ki tuguhigamu, mu têtê viteaku tare ma kamu hagesurira re karemi, ma na karemi tangara na kareta, hanana ma ki bê ki arâ.”