Read Kahua ISAIA 6 Bible Online

ISAIA 6 - Kahua bible

ISAIA 6

¹Igê na harisi, i me igê na maneraha o Usia, inê kê bâsia na Araha. Ngaia ki oga so igê na atohana. Ngaia ki bâ hahaneaga ma ki bâ rahataga. Na aruhana ki meheavore na Ruma ni Rotu hagenani.

²Na marâ mamauri na gi ka ura rihia. Na ara ni hitangita ki tonga renigi na gagahana ge ono. Na gagahana gi rua karu buhigi na maana, ma ki rua karu aruha na apena, ma ki rua tanga i gaha renirerua.

³Ngaira ka tamasi raha heri, ka vivi: “I apuna teha ngavê na Araha raramohaga hunia. Na raramohana ki uhuana na maveta.”

⁴Na ringeni na ringeta ka ngingia na Ruma ni Rotu. Na robona na gi ki raro i Ruma ni Rotu.

⁵Ma inê kê pe tako ni tahinga, ma kê vi: “E, i era ngavê tangê, suria na tamasinga iaku ki erataga, ma kê oga i berarogata na enoni, ga erataga nogata na tamasinga iata. Naka ma gê manga ngekana, renigi na maaku mareku inê kê bâsia na Araha raramohaga hunia.”

⁶Ma na hitangita na marâ mamauri na gi ki ahisia na maraha na gi tenia na bea ni vogasiha, ma ki megaha so me tangê.

⁷Ngaia ki hataria na gaviharaku renia na maraha na gi, ma ki vi: “Renia na tarana ngekê na tamasinga iamu ka kahu koro. I hato, vigu tangahurigo nikâ, ma ka hato na tasi iamu.”

⁸Ma hemuri inê kê rongoa na Araha, i vi: “Ti kê page hagatorangenia? Ti ki page totora tamasinga iaku?” Inê kê arami, kê vi: “Inê akê! Gu hagatorangeniê!”

⁹Ngaia ki vi: “U râ, ma ko tamasi tangara na enoni, ko vivi: Naka ma mu rongorongo, ma ki asa mu rongogirara. Naka ma mu bâbâ, ma ki asa mu bâgirara.”

¹⁰Ma ngaia ki vi tangê, ki vi: “Gu katora na enoni ngegê ke bonobonoga. Gu katora ke pungu na karingata. Gu katora ke guru na maata, hanana siana ka bâbâgirara, se rongorongo girara, se takotako mataha. Ngaira ka page matiê vari, ma ka page korokoro aporo vari.”

¹¹Inê kê hagate, kê vi: “Araha, i arihu manga i he?” Ngaia ki arami, ki vi: “Mataro me na hinua ka aruhuruhu ma ka hihiruga, mataro me na ruma ka baguru ma ka kakaga, mataro me na agua ki mangagi na hiru ma na manihê.

¹²Inê be katora na merongata ke henahuraura, ma na agua hagenani ke hihiruga ngavê.

¹³Naka ma na ara ni tangahuruta na enoni ka hita so igê na agua, ka page erasira nikâ. Ngaira ka manga na apinige raha, ga tapia, ma ki oga ma na barêrigana.” Ma na barêrigana ki page papêhu.