Read Kahua ISAIA 60 Bible Online

ISAIA 60 - Kahua bible

ISAIA 60

¹Aharaga, Jerusaleme! Ura igê na marara! Na raramohana na Araha ki takirigo.

²Na enoni hato getera i maveta ka page oga igê na roto hono, ma na Araha ki page mavesigo igo, ma ko page togatoga, suria i ngahisigo.

³Na mararamu ki page okera me na enoni getera i maveta henira na maneraha, suria na mararamu ki manga na arito, i raboa.

⁴Gu bâ arigu igo! Na kariamu ka aporo haku me! Na karemu ka page râ me hagatê, ma ka page topera mangara na kare.

⁵Matena go bâsira, igo ko page vagevagesira ngavê, ma ki page koro ngavê na apemu renira. Na enoni getera i maveta ka page tagarenigi tangago na ruruguha ma na nahuninga iata. Ngaira ka page migirâ me tenigi na agua hagatê.

⁶Rako teha na kamelo ni Mitiani me Epa me Seba ka aharêsigo, ma ka page toregi me na golo ma na marâ ga sigini koro, matena na sungigi. Ngaira ka page tarohenia na taroha koro renigi na tauhana na Araha.

⁷Ga page hakura me na sipi ni Ketare me Nebaiote tanga na vogasiha tanga na Araha, hanana ga hagakoro obana renira. Vikana i Ruma ni Rotu iana ngaia ki page hagabângenia igê, vi na raramohana ki raha teha ngavê.

⁸Na ta kani ga manga na parêru igana? Na ta kani ga ahehahe manga na manu igana?

⁹Na haka ka râ me tenigi na agua hagatê ngegana. Na haka iata na ai ni Tasisi ka hagenago. Ga mera aporo me na karemu. Ngaira ka migirâ me na siliva ma na golo, hanana viga hagarahasia re na Araha God iamu, na God Apuna iata na Isiraelita, i katogo, ki rongo raha na atamu.

¹⁰Na Araha ki vi tanga i Jerusaleme, ki vi: “Na ai ni mahuara ka page tagarahigi aporo na para rihigo, ma na maneraha iata ka page tagara tangago. I nago inê kê hagaitangigo, suria gê mangariaga tangago. Ma i ngekê inê be makuanigo ma be takuigo.

¹¹Na maani para ka page tahataha tare ma ki asa vige purupuru, hanana na maneraha henira na kariata ka migibanu tangago na ruruguha iata.

¹²Ma na maneraha henira na kariata, ga usi vige tê viteamu, ka page mutemute ngavê.

¹³“Jerusaleme, na ara ni apinige koro hato, na ani ga oto, ga borahu ma ka bagora, ka page râ me tangago tenigi na vapuni i Libanone, hanana ga page tagarahigo aporo renigi, ma ka page torea aporo re na Ruma ni Rotu iaku. Ngaigi ki page hagabâkoroa na Ruma ni Rotu. Inê be katoa na hinua iaku, ke rongo raha na atana.

¹⁴Na kareta na ani, ga hagamamasiagago i nago, ka page arâ me, ka tu bê, hanana ga hagahigasigo. Ngaira hato na ani, ga ruhigo i nago, ka page susure i maamu. Ngaira hato ka page visigo, vi igo, Sione, go hinua iana na Araha, go hinua iana God Apuna iata na Isiraelita.

¹⁵I nago na enoni ka panigo ma ka usitenigo. Igo ko hihiruga manga na tênga. Ma inê be hagakorogo aporo, ke rongo raha na atamu, ma ko page vora renia na hinua ni vagevageha, na vagevageha i asa vige page hato.

¹⁶Na maneraha i maveta henira na kariata ka page hagangêgo ma ka page marupego, manga na gete i hagasusua na karena. Igo ko page tahetara reniê, vi inê nga na Araha kani gê hagatahigo, vi inê nga God raramohaga huniê i Isiraele ka na tahingamu.

¹⁷“Inê be vatego na golo urusina na siliva. Inê be vatego na siliva urusina na aiani. Inê be vatego na aiani urusini na apinige ma na hê. Na enoni raha iamu ki hato, vige page hagamamasiagago. Inê be katora ke marupego igê na otoha ma na marapeha.

¹⁸Ki asa, vige page vora me nikâ na hearihatani, ga ruhuruhugi na hinua ma ka erasigi na mu. Inê be anumasigo manga na para i rihuigo, ma igo ko page hagarahasiê, suria gê hagatahigo.

¹⁹“Na arito ki hato, vige page mavesigo igê na tangiani. Na hageha ki hato, vige page mavesigo igê na bungiani. Inê nga hete na Araha, kani gê page mavesigo tare ma tarema. Igo ko page togatoga renia na raramohaku inê, God iamu.

²⁰Na matena ni hetakiha iamu ki page hato. Inê na Araha ki na arito iamu, i asa be su. Inê ki na hageha iamu, i asa be su. Inê be mavesigo tare ma tarema.

²¹Na kariamu ka page katogi ma na tarani, ga oto, ma ka page gâga hagahu igê na agua. Inê kê hagavorara ma kê hasira, hanana vi na enoni ka hagarahasiê.

²²Na ahemata, ga pe rako, ki page tataka ma ki page gahuia na agua raha hagenani. Inê nga na Araha kani gê page katokato vikana igê na matena tanga.”