Read Kahua ISAIA 61 Bible Online

ISAIA 61 - Kahua bible

ISAIA 61

¹Na Araha God ki angariê, suria ngaia ki ateê, i moneê. Ngaia ki hagatorangeniê, hanana gê merâ me na taroha koro tangara na ani ga matareha, hanana gê kanukanura na ani ga bagahagêguri, hanana gê hagarongora na kare rakuraku ma na ani i ruma ni hagaitangiha, vi ngaira ka aharupa.

²Ngaia ki hagatorangeniê, kê hagarongo renia, vi i râ me noga na matena, na Araha ki page hagatahira igê na kariana, ma ki page teharira igê na merongata. Ngaia ki hagatorangeniê, hanana gê haganakura na ani i rugu na obata, hanana gê hagakoro obata ke vagevage na ani ga angiangi maramara i Sione.

³Na ageageha ma na hagêguringa togo karu urusirerua na enangiha maramara ma na bagahagêguringa. Na enoni ka page mangagi na apinige, i hasigi na Araha marena.

⁴Ngaira ka page katogi ma na tarani, ga oto, ma ka page tagarahigi aporo na hinua, ga bani aruhuruhu me.

⁵Kariaku, na ai ni mahuara ka page tagara tangagamu. Ngaira ka page marupera na totoha na sipi iami ma ka page tagarahigi na mu iami. Ngaira ka page tagara igê na pariki na vaini iami.

⁶Ga page visigamu, vi igamu ka na enoni ni hagarahenga iana na Araha, vi igamu ka na kariana God iaka. Igamu kamu page nahunigi ma kamu page vagevagesigi na nahuninga ma na ruruguha iata na enoni getera i maveta.

⁷I hato vigamu page maki, se vigamu page matareha. Igamu kamu page oga igê na apanena iami maremi. Na nahuninga ma na ruruguha iami ka page aharêsigamu. Igamu kamu page vagevage tare, ki bê ki arâ.

⁸Na Araha ki vi: “Inê kê makuania na otoha. Inê kê kitenira na enoni, ga hanago ma ka hagamamasiagara na enoni. Inê be vurira na kariaku, suria gê hagamonaria na suruha iaku tangara, ma be naka na suruheri henira, na ani i asa vige page hato.

⁹Ngaira ma na raraha iata ka page rongo raha na atata i pasita na enoni hato i maveta. Na enoni hato, ga bâsira, ka page girarara, vi ngaira ka na kariaku, gê koro ngavê tangara.”

¹⁰Jerusaleme ki vi: “Inê kê vagevagesigi i mêrihaku hagenani na tauhana na Araha God iaku tangê. Inê kê manga na enoni, i êragi haoru, i tuguni bâkoro, ki mahemahe ma ki rêni, suria ngaia ki hagamaheê renia na tuguni ni tahinga, ma ki katoê, kê teha.

¹¹Na mako ki katogi na marâ, ga hasigi i mu, ka vavaka ma ka akê. Tagenana ma na Araha God ki page hagatabaria na tahinga, ma na enoni hato i maveta ka page hagarahasia.”