Read Kahua ISAIA 62 Bible Online

ISAIA 62 - Kahua bible

ISAIA 62

¹Na poropete ki vi: “Inê be tamasi, hanana ve kanukanua Jerusaleme. I asa be muni, se vi ve tako bare, mataro me na tahingana ki mave, manga na ahame igê na bungiana, ma ki tehateha.

²Jerusaleme, na enoni getera i maveta ka page bâsigo, go tehateha, ma na maneraha hato iata ka page bâsigi na raramohamu ma na bâbâhamu. Go page nahunia na ata haoru, na Araha ngaia marena ki page hêtamu renia.

³Igo ko page manga na tarepuri bâkoro ngavê tanga na Araha God.

⁴I hato vige page visigo nikâ, vi na ‘Gete Kasikasi’. I hato vige page visia nikâ na apanena iamu, vi ‘Hihirunga.’ Mareha! Ga page hêtamu hete, vi ‘Makuaniha iana God’, suria na Araha ki page obakoro renigo. Ma na apanena iamu ka page hêtana renia, vi ‘Auragiha Koro’, suria na apanena iamu ngaia ki manga o vaniamu.

⁵Tagenana manga na mane kare, i torea na kare viru, na Araha, i hagavorago, ki page torego. Tagenana manga na mane êragi haoru i ageagesia kaniana, God iamu nogana ki page ageagesigo.”

⁶Na Araha ki vi: “Jerusaleme, igê na para rihigo inê kê bani nakara igê na mane ni anumasiha. Siana hagetage ka munimuni igê na tangiani ma na bungiani. Ki tuguhira, viga hagatakusiê renigi na suruha iaku.” Na poropete ki vi: “Igamu na mane ni anumasiha, ki tuguhigamu, vigamu ama ni hagatakusia nga na Araha renigi na suruha iana, i era ma ki bonotenigi.

⁷Mu hagamarâ apena, mataro me ki hagakoroa aporo Jerusaleme, ki rongo raha na atana i maveta hagenani.”

⁸Na Araha ki vi tanga Jerusaleme, ki vi: “Inê kê bani tohe renia na raramohaku, na merongamu ki asa hagetage, vige page hanagogi nikâ na ngêra ma na vaini iamu, hanana viga ngênge ma ka totono, suria igamu kani mu tagara raha renigi.

⁹Na enoni, ga hasihasi ma ka opaopa, ngaira nga ka page ngêngê, ma ka page visiê koro renigi. Na ani ga tagara igê na pariki ni vaini ma ka husihusi, ngaira nga ka page totono igê na mahera igê na Ruma ni Rotu iaku.”

¹⁰Ai ni Jerusaleme, mu hura tenia na hinua! Mu tagarahia na tara tangara na kariami, ga aporo me. Hagarêa na tara raha! Mu rikia! Mu naka na giraraha i pasita na enoni hato i maveta, hanana ga girara, vi na Araha ki hagarongora, ki vi:

¹¹“Hagarongora na ai ni Jerusaleme, kamu vivi: Na tahingami ki hagarangi me noga. Na Araha ki sugi râ me noga, ma ki merarâ me na ani, i bani hagatahira.

¹²Ga page visigamu, vi ‘Kariana apuna God,’ ma ‘Enoni God ki bani hagatahira.’ Ga page visia Jerusaleme, vi ‘Hinua na Makuaniha’ ma ‘Hinua God ki pe kasikasi renia.’”