Read Kahua ISAIA 63 Bible Online

ISAIA 63 - Kahua bible

ISAIA 63

¹Ti ki arâ me akana tenia i hinua i Bosera i Etome? Ngaia ki hagesuru bâkoro ngavê. Na tuguni iana ki rotorotoaga memera. Ngaia ki tavo uga ma ki bâ hahaneaga. Inê nga na Araha. Inê kê tarohenia na tahinga. Inê kê nahunia na ramoha ni hagatahinga.

²Tanu hega na tuguni iamu ki rotorotoaga memera? Ngaia ki manga na gahu iana na enoni, i rusirusi na vaini.

³Inê mareku na Araha kê rusirusi na vaini. Inê geteê ma; mareha vige tamaniê. Igê na mangariaganiha iaku inê kê menamenarira na merongaku hato i maveta. Inê kê hagamonaria na siva iaku tangara. Na gaputa ki pisirigi na tuguni ma na gahu iaku.

⁴Na matena iana na siva iaku tanga! Inê kê hagatahira na kariaku, ma kê hagaitangira na merongata.

⁵Inê kê bâ rârâ, ma kê kone, suria i mareha ngavê na enoni, vige tamaniê. Na raramohaku kani tamaniê. Na mangariaganiha iaku kani hagaramoniê. Tahema gê teha.

⁶Igê na mangariaganiha iaku inê kê pu menamenarira na merongaku i maveta ma na gaputa ka tata berabera i ano.

⁷Inê be tarohenia na Araha, suria na takuiha iana ki asa, vige page hato. Inê be hagarahasia renigi na tauhana tangagia. Ngaia ki koro ngavê tangara na Isiraelita, suria ngaia ki makuanira ngavê, ma na takuiha iana ki asa, vige page hato.

⁸Na Araha ki vi: “Ngaira nga ka na kariaku. Ngaira ki asa vige hagaparuê.” Tahema ngaia ki hagatahira

⁹tenigi na mamasiaganiha hato iata. Mareha suria vi na angero ma suria hete na Araha ngaia marena i hagatahira. Ngaia ki hagatahira, suria hete i takuira ma ki makuanira. I nago ngaia ki bani marupera me.

¹⁰Ma ngaira ka guguruga tanga ma ka hagaera obana bâraha. Tahema na Araha ki merongasira ma ki hagaitangira.

¹¹Ma hemuri na kariana ka takusigi aporo na tarani, ga vora me i nago kere vê noga, i na matena iana o Moise na kariana koro. Ngaira ka hagate, ka vi: I he nga na Araha, i hagatahira tenia na asi na kariana henira na maneraha iata?

¹²I he nga na Araha, i angaria o Moise? I he nga na Araha, i vatea o Moise renia na ramoha, hanana i voasia na asi i kokoro ma ki bêngenira na kariana, ka râ mamata igê?

¹³I he nga na Araha, i katoa, ki rongo raha vikana na atana? Na Araha ki bêngenira bâkoro ma ki asa vige tapasu. Ngaira ka ramo ni râha mangara na hosi vasiga igê na masusu.

¹⁴I tagenana manga na avanu ni puruka i hagamamarora igê na bena ni go igê na maruguna, na Araha nogana ki hagamamarora na kariana. Ngaia ki bêngenira, ma ki rongo raha na atana renia.

¹⁵Araha raramohaga hunigo, God Apuna, bâ me tenia i pasimu, ku takuigami. I he nga na marupeha iamu tangagami? I he nga na raramohamu? I he nga na takuiha iamu tangagami? I he nga na botageha iamu tangagami? Siana ko murisigegami!

¹⁶Igo nga ki na vaemamami! O Abaramo mo Jakobo, na êvarimami, karu bani tako mu renigami. Igo, Araha, igo nga ki na vaemamami. Igo ko bani hagatahigami me tare.

¹⁷Tanu hega, ko katogami, kami hagatasia na tara, i tuguhigami, vigami arâ igê? Tanu hega, ko katogami, kami togeaga, kami murisigego? Gu aharigami, hanana gu tamanigami na kariamu, na enoni go bani nahunigami me.

¹⁸Na merongamami ka bani henahuraugami râ nga, igami na kariamu, go bani ategami. Ngaira ka hoge erasia na Ruma ni Rotu iamu.

¹⁹Igo ko katogami, manga vi igo ko pe Araha iamami, ma manga vi igami kami mareha vi na kariamu.