Read Kahua ISAIA 64 Bible Online

ISAIA 64 - Kahua bible

ISAIA 64

¹Tanu hega, ko pe tangahia na vavearo ku so me? Ke gisigisi i maamu na hungani!

²Gu râ me manga na gi raramohaga, i ngatongato igê na ario ma ki katoa na ve ki agobo. Gu hagabângenia na raramohamu tangara na merongamu, hanana ge bubununuga renigo.

³I nago matena go râ me, igo ko katogi na mena, ga hagakangigami ma ka hagamagusigami. Igo ko so me ma na hungani ka gisigisi i maamu.

⁴Haganega tenia i nago ki râ me, mareha vê ta na enoni, vige bâsigi se vige rongogi rârâ na marâ vigana. Mareha vê ta na enoni, vige bâsia na ani ge maratoramu, suria igo ki na God, go marupera maninga na ani ga hagêguri togo renigo.

⁵Igo ko tamanira na ani ga vagevagesigi na tarani, ga oto, ma ka râ suria na tara, gu usia tangara. Igo ko mangariaga tangagami, ma igami kami ama ni tasitasi nga. Naka ma igo ko mangariaga bâraha tangagami, igami kami ama ni tasitasi nga arihu me noga. Manga i he kami girara vigami tahitahi?

⁶Igami hato kami erataga ngavê. Naka ma na parongamami koro ngaigi nikâ ki makoraga, manga na gahu i gapugapuga. Renigi na bagatarihamami, igami kami mangagi ma ahani na apinige, i mêgu, i ahegenigi na roga.

⁷Mareha ta na enoni, vige nungigo se vige avarasigo. Igo ko ahi tenigami, ma ko nakagi na bagaparongamami, ki angarigami.

⁸Ma igo, Araha, igo ki na vaemamami. Igami kami manga na mako memera ma igo ko manga na enoni i tagarahigi. Igo ko hagavoragami.

⁹Tahema, Araha, siana ko ama ni mangariaga nga tangagami. Gu bonotenigi na bagatarihamami. Igami ka na kariamu. Gu takuigami!

¹⁰Na hinua iamu ka manga na manihê raha. Jerusaleme ki aruhuruhu ma ki hihiruga.

¹¹Na gi ki ngêa na Ruma ni Rotu iamami, na ruma apuna i bâkoro ngavê, na êvarimami ka hagarahasigo igê. Na ara ni hinua, mi makuanigi, ka aruhuruhu.

¹²Araha, na marâ hato ngegê ka pe hagamarâ apemu vari? Igo ko pe gagêmaga vari? I hega, na mamasiaganiha iamami ki pe ama ni raharaha nga vari?