Read Kahua ISAIA 65 Bible Online

ISAIA 65 - Kahua bible

ISAIA 65

¹Na Araha ki vi: “Inê kê nanê, hanana vigê aganarigi na nunginungiha iata na kariaku, ma ngaira ka pe nungiê rârâ. Inê kê nanêra, hanana vige tarahuê, ma ngaira ka pe gariê rârâ, naka ma inê kê nanê, vigê aramira, kê vivi: ‘Inê ikê. Inê be tamanigamu.’

²“Inê kê nanê tare, hanana vigê unira me na kariaku, ga togeaga ka bagatarihata ma ka râ suri barisuta ma.

³Ngaira ka ama ni hagamangariê nga, ma ka pe maki re. Ngaira ka vogasira na ataro i mu iata ma ka susu tangara igê na bea ni vogasiha.

⁴Igê na bungiani ngaira ka gâga igê na matiku ma na vaba, hanana ga hagatera na atarota na enoni, ga bani me. Ngaira ka ngaugi na bo ma na guguhu ni ganiani, ga vogasira na ataro renigi.

⁵Ma hemuri ngaira ka hagapêpura na enoni getera, ka vivi, ‘Siana kamu karihigami me! I apu tangagamu, vigamu hatarigami.’ Na enoni ngegana ka hagamangariê ngavê. Na mangariganiha iaku ki manga na gi ngatongato.

⁶“Inê kê bani surira, ma kê bani naka na hagaitangiha tangara. I hato ve piringiape.

⁷Inê be hagaitangira renigi na bagaparongata, na anita mareta ma na anita na êvarita, suria ngaira ka susu tangara na ataro igê na ngêsu igê na hungani, ma ka tamasi erasiê. Tahema inê be hagaitangira renia na hagaitangiha, i ararigi na bagatarihata.”

⁸Na Araha ki vi: “Mareha ta na enoni, vige têtê erasigi na hunguni na vaini, suria tani na guani ka era, ma ki rusigi hete na guani koro tanga na tonoha. Inê nikâ ki asa be têtê erasira na ara ni kariaku hato, ma be hagatahira hete na ani ga toto suriê.

⁹Inê be korokoro tanga o Juta, karena o Jakobo, ma na raraha iana ka page nahunia na apanena hunganiga iaku. Na kare mane manimani iaku, ga toto suriê, ngaira ka page gâga igê.

¹⁰Ngaira ka page rahesiê, ma ka page kasira igê na sipi ma na puruka iata ka ngêngê igê na tarasini kereso i Sarone ma igê na maruguna kerekê i Agore.

¹¹“Ma igamu na ani mu kasi reniê, inê na Araha, na ta be katoa tangagamu? Igamu kamu usi vigamu rahesiê hete i Sione igê na hungana apuna iaku, ma kamu vogasirerua ma o Gata mo Mani, na ataro ni hagavonga ma ni hinarunga.

¹²Inê be surigamu kamu me. Ga page reterete nguria na ara ni hitangimi, suria na matena gê unigamu, igamu kamu pe aramiê. Matena gê tamasi, igamu kamu pe rongoê. Igamu kamu pe tê viteaku, ma kamu katogi ma na marâ, gê manimani tenigamu.

¹³Tahema, inê na Araha God, inê kê vi tangagamu, kê vi: Na kariaku ka toto suriê maninga, ki page aharêsira na ngêra ma na tonoha, ma tangagamu igamu, igamu kamu page magê, ma ka page mamata na riomi. Na kariaku koro ka page vagevage ngavê, ma igamu, igamu kamu page maki ngavê.

¹⁴Ngaira ka page kiki, suria ga oba koro, ma igamu kamu page oba era ma kamu page anumanuma, suria mu bagahagêguri.

¹⁵Na kariaku koro inê be hêtata haoru, ma ngaira ka page tê erasira na enoni getera renia na atami, ka vivi, ‘God ke hagamesigamu manga ngaira,’ suria inê, na Araha raramohaga huniê, inê kê page hagamesigamu.

¹⁶Na ani mavê na enoni, i avaravara, ki page avarasiê ma inê, na God, gê pe hagahagaparu. Na ani mavê na enoni, i tohetohe, ki page tohetohe ma reniê inê, na God, gê hagamonarigi tare na tamasinga iaku. Na ara ni mamasiganiha ka page mutemute ngavê ma ka page takotako mu vê renigi.”

¹⁷Na Araha ki vi: “Inê be hagavorarerua na ano haoru ma na vavearo haoru. Na tarani i nago ka page mutemute ngavê ma ka page takotako mu vê renigi.

¹⁸Mu page vagevagesigi ma kamu page ageagesigi tare ma tarema, ki bê ki arâ, na tarani haoru, gê page hagavoragi. Na vagevageha ki page aharêsia Jerusaleme haoru, gê page hagavora, ma na enoni igê ka page obakoro ngavê.

¹⁹Inê mareku be vagevagesia nikâ Jerusaleme ma be ageagesira na enoni igê. I ngekana ki page hato ngavê igê na enangiha se vi na avarasiha.

²⁰Na kare gari ki asa vige page me, ma ki asa ta na enoni, vige page me vurusia. Manga ta na enoni, i tarahua na harisi tangarê gi tage, ma ki me, ngaia ki me karekare mênga. Manga ta na enoni, i pe tarahua na harisi tangarê gi tage, ma ki me, ngaia ki na girarana, vi inê kê hagaitangia.

²¹Na enoni ka page toregi na ruma, ma ngaira mareta ka page oga igê. Na enoni ka page hasihasi na pariki ni vaini, ma ngaira getera ma ka page ngaugi.

²²Na ruma, ga page toregi, ngaira mareta ka page nahunigi, mareha vi na mahuara. Na ngêra, ga page hasigi, ngaira mareta ka page ngaugi, mareha vi na mahuara. Na kariaku ka page mauri arihu mangagi na apinige. Ngaira ka page vagevagesigi ngavê meni na tagaraha iata.

²³I asa vige tagara purua ma. Ma na kareta ki asa, vige tarahura na bagabevoani, suria inê kê page marupera, ngaira ma na raraha iata tare, ki bê ki arâ.

²⁴Naka ma ngaira ki mamênga, vige avarasiê, ma inê kê aganarigi hagenago na avarasiha iata. Matena i mamênga vige nunginungi hato, ma inê kê bani rongora hagenago.

²⁵Na o vasiga ma na kareta na sipi ka page ngêngê haku. Na laione ka page ngêngê na go mangara na puruka. Na ma ki hato vige page garagara. I Sione, igê na hungana apuna iaku, i asa hagetage, vige page oga igê ta na marâ, hanana vige erasira na enoni, nga noga ma na ramana ki gâga igê. Ngaia kani gê visia, inê na Araha.”