Read Kahua ISAIA 66 Bible Online

ISAIA 66 - Kahua bible

ISAIA 66

¹Na Araha ki vi: “Na vavearo ki na âgâga iaku, ma na maveta ki na êguga iaku. Na ruma ta nikâ kani vi mu kahu torea tangê? Na agua i he nikâ kani vi mu kahu hagarêa tangê, vigê kahu gâga igê?

²Inê mareku kê hagavorara na ara ni marâ ka bani goga. Inê kê marupera na enoni, ga pe hagarahasira mareta ma ka angitenigi maninga na tasi iata, ka hagahigasiê ma ka tê viteaku.

³“Na enoni ka râ suri barisuta. Tangara ngaira na ara ni marâ ka tagenani ma. Ngaira ka vogasi renira na puruka ma renira nikâ na enoni. Ngaira ka vogasi renira na sipi ma renira nikâ na o, ga tahuru ngurira. Ngaira ka vogasi renigi na ngêra ma renigi nikâ na gaputa na bo. Ngaira ka susu tangê inê ma ka rahesira nikâ na ataro. Ngaira ka râ surigi ma na obaniha iata mareta ma ka vagevagesigi na tarani na vogasiha, ga erataga ngavê.

⁴Tahema inê be hagaitangira. Na tarani, ga magutenigi bâraha, ngaigi ka page tarahura, suria na matena gê unira, ngaira ka pe aramiê. Ma na matena gê tamasi, ngaira ka pe rongoê. Ngaira ka pe tê viteaku, ma ka katogi ma na tarani, gê manimanigi tenira.”

⁵Mu rongo, igamu na enoni mu hagahigasia na Araha ma kamu tê viteana. Na Araha ki tamasi, ki vi: “Suria igamu kamu toto suriê inê, tahema kani ga kitegamu na goami ma ka masesi tenigamu. Ngaira ka hagaru renigamu, ka vivi, ‘I he nga na raramohana na Araha, i hagatahigamu, hanana vigami bâsigamu, mu vagevage?’ Ma ngaira hete ka page maki ngavê.

⁶Rongo! Na ta ki rongo raha i hinua? Na ta ki rongo raha i Ruma ni Rotu? Ngaia ki na ringena na Araha, i hagaitangira na merongana.

⁷“Sione, na hinua apuna iaku, ki manga na gete i gasuga ni apara kare ma ki pe hara renia. Ngaia ki pe riki hagenago na gerina ma ki apara me na kare mane.

⁸Ti ki rigia na tarana ngekana? Ti ki rongoa? I hega, igê na agua hagenani ki girara vari i voravora me igê na tangiana gi tage togo? Sione ki riki râ na gerina ma ki aparara na karena.

⁹Siana kamu takusia, vi inê kê nakara na gete ka harate kare ma kê pe nakara ke aparara. Mu takusia vari, vi inê kê nakara na gete ka obara tanga vi ga pe apara kare? Ngaia kani gê visia inê na Araha.”

¹⁰Manga mu makuania Jerusaleme, hoi, mu vagevage henia i ngekê ma kamu ageagesia. Manga mu bani angi maramara renia, hoi, mu vagevagesia i ngekê.

¹¹Na ramana igê ki page tungigamu ngavê, manga na kare i susu masu i pasina kenana. Mu page vagevagesia na ramana, i page aharêsigamu.

¹²Na Araha ki vi: “Inê be katoa na ramana ke aharêsigamu manga na ve oto, i gogogo tare. Na ruruguha ma na nahuninga iata na enoni, ga oga igê na agua getigi i maveta, ka page uguni me tangagamu manga na ve oto, i asa vige page mamata. Igamu kamu page manga na kare, i susu i pasina kenana. Kenana ki puma ma ki hagabarea.

¹³Inê be hagarekogamu i Jerusaleme, manga na kena ni kare i hagarekoa na karena.

¹⁴Igamu kamu page obakoro, matena mu bâsia igê na tarana ngekana, ma kamu page apeape hahaoruga aporo, manga na go i baogo haoru. Ma igamu kamu page aitangisiê, vi inê na Araha kani gê tamanira na kariaku ma kê hagagirarara na merongaku renia na mangariaganiha iaku tangara.”

¹⁵Na Araha ki page arâ me manga na anguruna na gi. Na kati, i tagiria, ki manga na roga raha, hanana i hagaitangira na ani, i mangariaga tangara. Na mangariaganiha iana ki page manga na gi.

¹⁶Ngaia ki page surira na enoni hato i maveta. Na ani ga eratage, ngaia ki page hagaitangira renigi na gi ma na tatapa borahu. Ma ka page rako na ani ga meme.

¹⁷Na Araha ki vi: “Sugia ma vige mutemute na ani ga hagamatarotarora mareta, hanana viga vogasira na ataro, na ani ga bêbê hesurisuri tangagi na mu, hanana viga susu igê tangara na ataro, na ani ga ngaura na bo, na kiki, ma na ganiani getegi, gê manimani tenira.

¹⁸Inê kê bani giraragi na aitangihata ma na tauhata. Inê kê râ me, hanana gê hagahakura na enoni, ga oga igê na agua hato getigi i maveta. Matena ga hakuhaku me, ngaira ka page bâbâ menana na raramohaku.

¹⁹Ngaira ka page tahetare reniê, vi inê nga kani gê hagaitangira. “Inê kê page hagahitara tani na hitangita, hanana gê hagatorangenira tangagi na agua hagatê, tangara na enoni ga hiteniê, ga pe rongo kuruhaku, se vige pe rigigi na bâbâhaku ma na raramohaku. Inê be hagatorangenira i Sipeni, i Libia, ma i Litia, ga oga igê na mane, ga manisingenigi na epage ma na mage, ma i Tubala ma i Agaia. Ma i ngegana ngaira ka page taroheniê igê, vi inê kê raramohaga huniê.

²⁰Ngaira ka page mera aporo me na goami hato tenigi na agua, ga bani henahuraura tange. Ngaira ka page torera aporo me manga na votovoto tangê igê na hungana apuna iaku i Jerusaleme. Ngaira ka page torera aporo me igê na hosi, igê na tonki, igê na kamelo, igê na kati ma igê na kati ni me. I tagenana ma mangara na Isiraelita ga toregi me igê na marâ matarotaro na ngêra, na votovoto tanga na rotu.

²¹Tani na hitangita inê kê page kasira ka voravora re na mane ni vogasiha ma tani ka voravora re na mane ni hagarahenga. Ngaia kani gê visia, inê na Araha.”

²²Na Araha ki vi: “Na maveta haoru ma na vavearo haoru, gê page hagavorarerua, ngairerua ki asa hagetage, vigaru page hato. I tagenana ma na raraha iami ma na atami ngaira ki asa hagetage nikâ, vige page hato.

²³Igê na ara ni matena i rikiriki me na hageha ma igê na ara ni Tangiani ni Mamaroha na enoni hato i maveta ka page rahesiê, ikê i Jerusaleme. Ngaia kani gê visia, inê na Araha.

²⁴Matena ga aporo, ngaira ka page bâsigi na gahuata na enoni, ga guguruga bâraha tangê. Na mamagata ki asa vige page me. Na gi, i ngaugi, ki asa vige page hunuia. Na enoni hato i maveta ka page kakahuru renigi.”