Read Kahua ISAIA 8 Bible Online

ISAIA 8 - Kahua bible

ISAIA 8

¹Na Araha ki vi tangê, ki vi: “Gu tavoa na pepa, ma ko segesege raha igê ‘Purupurubêha Rêrê, Hanagoha Garigari’.”

²Inê kê tarahurerua na vererua na mane, gê hagêguri togo renirerua, hanana vi garu hagatanga monari, vi inê kani gê sege. Na hitangiterua ka no Uria, na mane ni vogasiha, ma na ruata ka no Sakaria, karena o Jeberekia.

³Ma hemuri inê kê râ i pasina na gete iaku. Ngaia nikâ ki na poropete. Ngaia ki atui, ki obara, ma ki apara na kare mane. Ma na Araha ki vi tangê, ki vi: “Gu hêtana, vi ‘o Purupurubêha Rêrê, o Hanagoha Garigari’.

⁴I nago tarana i girara i vivi ‘Tete’ ma ‘Mama’, na maneraha ni Asiria ki page henahuraugi na ara ni nahuninga hato i Tamasiko henigi na ara ni marâ hato i Samaria.”

⁵Na Araha ki tamasi tangê nikâ, ki vi:

⁶“Na enoni ngegê ka bani usitenia na nonganonga i Siloa, i pe ogogo, ma ka magutenirerua na maneraha o Resini ma o Peka.

⁷Tahema inê na Araha kê page kasia me na maneraha teha i Asiria henira na me hato iana, hanana ga taharia i Juta. Ngaira ka page manga na ve i Uparatesi, matena i maganu ngavê, ma ki anuigi na mâpasiano.

⁸Ngaira ka page manga na maganuha, i taria i Juta, ma ki nonga ki akê, ka meme igê na enoni, ma ki anuia na agua hagenani.” Imanuele, God ki ngahisigia. Ngaia ki anumasia na agua, manga na manu i benira na karena.

⁹Enoni hato i maveta, mu hakuhaku, ma kamu bubununuga! Agua hagatê i maveta, mu rongo! Mu nanê tanga na hearihatana, ma kamu bubununuga. Mu nanê, ma kamu bubununuga!

¹⁰Mu harikato, ma ki bara tangagamu. Mu tamasi bâraha, ma ki pe vora ta na marâ, suria God ki ngahisigami.

¹¹Na Araha ki hagamaruteê, ma ki haganunuê, hanana siana kê arâ surigi na tarani iata na enoni.

¹²Ngaia ki vi: “Siana ko hakunira na enoni, ga harikato pinihi, ma siana ko magutenigi na marâ, ga magutenigi ngaira. Gu ramo!

¹³Gu takusia, vi inê, na Araha raramohaga huniê, gê apuna teha ngavê. Inê nga nga na ani i araria, go magutenia.

¹⁴Suria inê kê apuna teha ngavê, inê kê manga na hê, ga tapasu igê na enoni. Inê kê manga na kiru na suta, ga page sutasuta igê na ai ni Juta me Isiraele me Jerusaleme.

¹⁵Na ani rako ka page tapasu igê, ka page vota, ma ka page babaro agani. Ngaira ka page sutasuta igê.”

¹⁶Kariaku, ki tuguhigamu, mu taugi gatagata ma kamu marupegi maninga na tamasinga, God ki hagatorê renigi.

¹⁷Na Araha ki rumakaka renira na kariana. Ma inê kê hagêguri togo ma kê raruni togo renia.

¹⁸Igami, inê ma na kareku, na Araha ki vateê renira, kami mangagi na giraraha mamauri tangara na ai ni Isiraele. Igami kami mangagi na haganunuha iana na Araha raramohaga hunia, i oga i hungana i Sione.

¹⁹Ma na enoni ka page vi tangagamu, kamu garigari na tamasinga tenira na enoni, ga matu ma ka hagata. Ma ngaira ka ririri ma, ka ngurunguru ma. Ngaira ka page vi tangagamu, ka vivi: “Mako, ki tuguhira na enoni, viga girarasira na enoni renira na ataro, ma ka garigari na tamasinga tenira na enoni, ga matu.”

²⁰Ma igamu kamu tamasi bê aporo nga, kamu vivi: “Mu karingagi hete na hagesuringa iana na Araha tangagamu. Siana kamu têtê ringeta na enoni, ga hagata ma ka matu. Na tamasinga iata ka page erasigamu ma.”

²¹Na enoni ka page kumukumu suri bemu igê na agua, ka page nanê baranga ma ka page magê. Igê na magêha ma na mangariaganiha iata ngaira ka page visirerua bera na maneraha iata ma God iata nikâ.

²²Ngaira ka page bâbâ kê ma ka page bâbâ so, ma ka page bâsigi ma na bagabevoani ma na roto hono. Ngaira ka page arâ igê na mengo ni anumanumaha, ma ki bara ngavê tangara, vige tahi tenia.