Read Kahua HAGARAHENGA 1 Bible Online

HAGARAHENGA 1 - Kahua bible

HAGARAHENGA 1

¹Na Araha ki unia me o Moise ma ki tamasi tanga tenia na ruma na gahu apuna iana na Araha. Ngaia ki vatea renigi na ramata

²tangara na Isiraelita hanana ga arâ surigi, matena ga susu tanga na Araha. Manga na enoni ma ki obania vi susu tanga God, ngaia ki girara i katokato vikana renia na puruka, se na sipi, se na goti.

³Manga i susu renia na puruka, ngaia ki urua me nga na puruka mane, i apeapekoro ma ki pe baubêga. Ngaia ki tagarenia nga i maana na ruma na gahu apuna iana na Araha, hanana na Araha ki aganaria.

⁴Na mane ki naka nga na rimana i bêna na puruka mane ma na Araha ki page aganaria na vogasiha ni bonoteniha ni tasi iana.

⁵Ngaia ki nahuia nga na puruka mane ki meme i ngekana ma na mane ni vogasiha tenia na raraha iana o Aroni ki page tagarenia nga na gapuna tanga na Araha. Hemuri ngaia ki kamusigi re nga na apaneni ge he na bea ni vogasiha, i oga i maana na ruma na gahu apuna.

⁶Hemuri ngaia ki sibuia nga na puruka mane ma ki rukaruka.

⁷Na mane ni vogasiha ka nakagi nga na ario igê na bea ni vogasiha ma ka tanga igê na gi.

⁸Ngaira ka nakagi nga igê na ara ni megani na ganiana henigi na bêna ma na êbena.

⁹Na mane ki tananigi nga na aunâbana ma na êgana ma na hitangita na mane ni vogasiha ki sungigi nga na megani hato ngegana igê na bea ni vogasiha. Na vanuhana na ngêra ni vogasiha ngekana ki hagakoro obana na Araha.

¹⁰Manga na mane ki susu tanga God renia na sipi se na goti, ngaia ki tagarenia nga na ani mane, i apeapekoro ma ki pe baubêga.

¹¹Ngaia ki nahuia nga ki meme igê na apanena na mahana na bea ni vogasiha, ma na mane ni vogasiha ka kamusigi nga na apaneni ge he na bea ni vogasiha renia na gapuna.

¹²Matena na mane ki rukaruka hato, ta na mane ni vogasiha ki nakagi nga na ara ni megana hato igê na gi henigi na bêna ma na êbena.

¹³Na mane ki tananigi nga na aunâbana ma na êgana, ma na mane ni vogasiha ki susu renigi tanga na Araha igê na bea ni vogasiha. Na vanuhana na ngêra ni vogasiha ngekana ki hagakoro obana na Araha.

¹⁴Manga na mane ma ki susu tanga na Araha renia na manu, ngaia ki tagarenia nga na gâ se na barisumata.

¹⁵Na mane ni vogasiha ki torea nga tanga na bea ni vogasiha, ki piropiro musia na riona ma ki sungia na bêna igê na bea ni vogasiha. Ngaia ki hagaguguhia nga na gapuna igê na apanena na bea ni vogasiha.

¹⁶Ngaia ki tavoa râ nga na ngêhurina henigi na marâ i rarona ma ki kasigi râ igê na ukuna na rahu i na apanena bêkê na bea ni vogasiha.

¹⁷Ngaia ki têrerua hegitigi na gagahana ma ki oketahia na apena ma ki mareha vige okehêrerua na gagahana. Hemuri ngaia ki sungia nga hagenani igê na bea ni vogasiha. Na vanuhana na ngêra ni vogasiha ngekana ki hagakoro obana na Araha.