Read Kahua HAGARAHENGA 11 Bible Online

HAGARAHENGA 11 - Kahua bible

HAGARAHENGA 11

¹Na Araha ki vatererua o Moise mo Aroni renigi na ramata igê

²tangara na Isiraelita. Igamu kamu girara mu ngaura na ganiani i bemu,

³ga matanga na ababa ni ugata ma ka ngêngê hurigi na ngêhurita.

⁴Ma siana kamu ngaura na kamelo, na ngongohuriva ma na rabiti. Na ani ngegana ka pe matarotaro surigi na ramata. Ngaira ka ngêngê hurigi na ngêhurita ma ka pe matanga na ababa ni ugata.

⁷Siana kamu ngaura na bo. Ngaira ka pe matarotaro. Ngaira ki matanga na ababa ni ugata ma ka pe ngêngê hurigi na ngêhurita.

⁸Siana kamu ngaura na ganiani ngegana se vigamu hatarigi na gahuata, suria ngaira ka pe matarotaro tangagamu vigamu ngaura.

⁹Igamu ki arari, vigamu ngaura na ani mavê na siare ga tonga renigi na egota, na aheaheta, na heheni na kereta ma na ênahita,

¹⁰ma na anima na ega ga pe tonga renigi na marâ ngegana, siana kamu ngaura.

¹¹Ngaira ka pe matarotaro tangagamu vigamu ngaura. Ngekana siana kamu ngaura se vigamu hatarigi na gahuata.

¹²Na anima na ega ga pe tonga renigi na marâ vigana, siana kamu ngaura.

¹³Siana kamu ngaura na manu igê, suria ga pe matarotaro tangagamu vigamu ngaura: na ahetaronga, na ko makukuni, na tehe, na ani raha ma na ani sisite, na emu, na manu ni waiê, na gauha ma na roke, na ani raha ma na ni sisite.

²⁰Na ara ni marâ mamauri hato ga tonga na gagahata ma ka mareha vi na manu mangara na rango, mamanivo, na hasikoko, na pepe ma na marâ vigana, ngaira ka pe matarotaro tangagamu, vigamu ngaura,

²¹nga noga ma na ani ga rekereke manga na pê.

²²I arari ma mu ngaura na pê, na pâpâ ma na turu.

²³Na marâ getera hato ga sisite ma ka tonga renigi na gagahata ma ka angoango, ngaira ka pe matarotaro tangagamu vigamu ngaura.

²⁴Na ganiani hato, ga tonga renigi na ababa ni ugata ga pe matanga ma ka pe ngêngê hurigi na ngêhurita, ma na ani hato ga tonga renigi na êgata girua ma na rimata girua henigi na kakêta, ngaira ka pe matarotaro tangagamu surigi na ramata, vigamu ngaura. Na anima na enoni i hatarigi na gahuata, ngaia ki pe matarotaro nogana mataro me ki bungibungi. Na anima na enoni i toregi râ na gahuata, ngaia ki tuguhia nga vi tananigi na gahu iana. Henaka, ma ngaia ki pe matarotaro mataro me ki bungibungi.

²⁹Na ani mavê na kiki, na ani raha ma na ani sisite, na tata, na gunu na garagu ma na marâ vigana, ngaira ka pe matarotaro tangagamu, vigamu ngaura.

³¹Na anima na enoni ki hatarigi na gahuata, ngaia ki pe matarotaro mataro me ki bungibungi.

³²Manga vi na gahuata ka votavota huria ta na marâ, na marâ ngekana ki pe matarotaro nogana, naka ma na ta se vi tanga na ta: na marâ ga tagarahia renia na apinige, se renia na gahu, se renia na gavona na ganiana se renigi na varehuna na goti. Ga tanania nga na marâ ngekana. Henaka, ma ngaia ki pe matarotaro mataro me ki bungibungi.

³³Manga vi na gahuata na marâ ngegana ma ka votavota i raronna na apira na hê, na ara ni marâ i rarona ka pe matarotaro nogani ma kamu kamakamaria nga na apira na hê.

³⁴Manga mu karangia na ve tenia na apira na hê ngekana hurigi na ngêra, i ararigamu vigamu ngaugi, na ngêra ngegana ka kahu pe matarotaro tangagamu vigamu ngaugi. I tagenana ma tanga na marâ ni tonoha i rarona na apira na hê ngekana.

³⁵Na anima na marâ, na gahuata na marâ ngegana ga votavota huria, ngaia ki pe matarotaro nogana. Manga vi na umu na mako, mu kamakamaria nga.

³⁶Manga vi na vebanga se na vekaru, ngaia ki ama ni matarotaro nga henaka vi na anima na marâ getea i hatarigi na gahuata, ki pe matarotaro.

³⁷Manga vi na gahua ma ki votavota hurigi na maani ni hasinga, na maani ka ama ni matarotaro nga.

³⁸Ma na maani ga hagavokagi igê na ve ma na gahua ki votavota hurigi, na maani ngegana ka pe matarotaro nogani.

³⁹Manga vi na ganiana, i arari ma vigamu ngaua, ma ki meme marena, ma ta na enoni ki hataria na gahuana, ngaia ki pe matarotaro nogana mataro me ki bungibungi.

⁴⁰Manga vi na enoni ma ki ngaua tagua na ganiana ngekana, ngaia ki tananigi nga na gahu iana. Henaka, ma ngaia ki pe matarotaro mataro me ki bungibungi.

⁴¹Siana kamu ngaura na marâ mamauri ga angoango i ano,

⁴²henaka ga sisiri i ano, se ga arârâ renigi na êgata girua ma na rimata gi rua se ga rakorako.

⁴³Siana kamu ngaura na marâ ngegana, i era ma kamu pe matarotaro nogami.

⁴⁴Inê nga ka na Araha God iami ma kê apuna. Tahema mu bâsigamu nga, hanana mu apuna nogami. Siana kamu pe matarotaro.

⁴⁵Inê nga ka na Araha gê toregamu hura tenia i Esipito, hanana vigê God iami. Tahema mu apuna nga, suria inê nga kanigê apuna.

⁴⁶Ngaigi ngegana nga na ramata renira na marâ mamauri, na manu ma na ega ma na marâ hato ga angoango i ano.

⁴⁷Mu hagakitagi, vi na ta ka matarotaro surigi na ramata ma na ta ka mareha. Mu hagakitara, vi na ganiani ta kaniga ararigamu vigamu ngaura ma na ani ta ka mareha.