Read Kahua HAGARAHENGA 15 Bible Online

HAGARAHENGA 15 - Kahua bible

HAGARAHENGA 15

¹Na Araha ki vatererua o Moise mo Aroni renigi na ramata igê

²tangara na Isiraelita. Manga vi na mane ma ki hiraga ma na naana ki huhura me igê na sisina, na mane ngekana ki pe matarotaro,

³henaka vi na naana ki girara i huhura me se i tototo ki bonobono na sisina renia.

⁴Na anima na marâ na mane ngekana ki gâga igê se i tâtâ igê, ngaia ki pe matarotaro nogana.

⁵Na enoni i hataria na bea iana na mane ngekana

⁶se i gâga igê na marâ, na mane ngekana ki bani oga igê i nago, ngaia ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

⁷Na enoni i hataria na mane hiraga, ngaia ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

⁸Manga vi na mane i hiraga ma ki musuria na enoni i matarotaro, na enoni ngekana ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

⁹Na marâ i oga igê na mane i hiraga matena i tagiria na hosi se na tonki se na kamelo, se na anima na âgâga i oga igê, ngaigi ka pe matarotaro nogani.

¹⁰Na enoni i hatarigi na anima na marâ na mane i hiraga i bani oga igê i nago, ngaia ki pe matarotaro mataro ma ki bungibungi. Na enoni i toregi na anima na marâ na mane i hiraga i bani oga igê i nago, ngaia ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

¹¹Manga vi na mane i hiraga ma ki pe tanani rima hagenago ma ki hataria ta na enoni, na enoni ngekana ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

¹²Na apira na hê na mane i hiraga i hataria, ka kamakamaria nga ma na apira na apinige i hataria ka tanania nga.

¹³Manga vi na hira ma ki hato tenia na mane, na mane ngekana ki tananigi nga na gahu iana ma ki mamanu igê na ve marava tenia na ve banga i na ara ni tangiana surigi na tangiani gi pi ma ki kahu matarotaro aporo.

¹⁴Igê na varuta na tangiana ngaia ki torererua me nga na barisumata gi rua se na gâ gi rua tanga na maana na ruma na gahu apuna iana na Araha ma ki tagarenirerua tanga na mane ni vogasiha.

¹⁵Na mane ni vogasiha ki torea nga tani tanga na vogasiha ni bonoteniha ni tasi ma tani tanga na vogasiha ni sungiha. Igê na tarana ngekana ngaia ki katoa nga na hagamatarotaroana na mane ngekana.

¹⁶Matena na mane ma ki ororo, ngaia ki mamanu hagenani nga, ma henaka, ma ngaia ki pe matarotaro mataro me ki bungibungi.

¹⁷Na anima na marâ ga tagarahia renia na gahu se renia na gavona na ganiana, ma na orona ki gogo huria, ka tanania nga, ma henaka ma na marâ ngekana ki pe matarotaro mataro me ki bungibungi.

¹⁸I murina na mane ma na gete garu mauru haku, ngairerua karu mamanu nga, ma henaka, ma ngairerua karu pe matarotaro mataro me ki bungibungi.

¹⁹Matena na gete ki tahataha na obana, ngaia ki pe matarotaro surigi na tangiani gi pi. Na enoni i hataria na gete ngekana, ngaia ki pe matarotaro nogana mataro me ki bungibungi.

²⁰Na anima na marâ na gete ngekana i gâga igê se i tâtâ igê matena i taha na obana, ngaigi ka pe matarotaro nogani.

²¹Na enoni i hataria na bea iana na gete ngekana se na anima na marâ i bani oga igê, na enoni ngekana ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

²⁴Manga vi na mane ma ki memêru na gete i tahataha na obana, na mane ngekana ki pe matarotaro nogana, suria na gete ki pe matarotaro. Na mane ngekana ki pe matarotaro surigi na tangiani gi pi, ma na anima na bea i tâtâ igê ki pe matarotaro nogani.

²⁵Manga vi na gete ma ki gapugapu raha surigi tani na tangiani haritamani ma ki mareha vi igê na matena i tahataha na obana, se i tahataha na obana ma ki hagateharia na matena i mamata igê, na gete ngekana ki pe matarotaro, suria na matena i gapugapu raha, tagenana ma tanga na matena i tahataha na obana.

²⁶Na anima na bea i tâtâ igê se na anima na marâ i gâga igê suria na matena ngekana, ngaigi ka pe matarotaro nogani.

²⁷Na enoni i hatarigi na marâ ngegana, ngaia ki pe matarotaro nogana. Ngaia ki tananigi nga na gahu iana ma ki mamanu, ma henaka, ma ngaia ki pe matarotaro mataro me ki bungibungi.

²⁸I murina i hatohato na gapugapu raha tenia, ngaia ki gâga nga surigi na tangiani gi pi ma ki kahu matarotaro aporo.

²⁹Igê na varuta na tangiana ngaia ki torererua nga na barisumata gi rua se na gâ gi rua tanga na mane ni vogasiha i maana na ruma na gahu apuna iana na Araha.

³⁰Na mane ni vogasiha ki taua nga tani tanga na vogasiha ni bonoteniha ni tasi ma tani tanga na vogasiha ni sungiha. Nga hanana ngekana na mane ni vogasiha i katoa na hagamatarotaroana na gete ngekana.

³¹Na Araha ki vi tanga o Moise hanana i haganunura na Isiraelita, hanana ga gâga matarotaro, i era ma ka hagaerasia na ruma na gahu apuna iana i gupuna na tênga, i era ma ka meme.

³²Ngaigi nga ka na ramata renia na mane i hiraga se i ororo,

³³ma renia na gete i tahataha na obana se renia nikâ na mane i memêru na gete i pe matarotaro.